४० जहनहे मनोसामाजिक अपांगता सहयक सामग्री वितरण
पहुरा समाचारदाता
धनगढी, १५ जेठ । “स्वस्थ्य मन, सुखी जीवन” कना नाराके साथ धनगढी उप–महानगरपालिका वडा नं. १८ मे मनोसामाजिक अपांगता स्वास्थ्य सम्बन्धी चेकजाँच तथा अपांगता सहयोग सामग्री वितरण करल बा ।
कोशिश, कैलालीके आयोजनामे तथा धनगढी उपमहानगरपालिका वडा नं. १८ के सहकार्यमे कार्यक्रममे मानसिक रोग विशेषज्ञ डा. रामप्रसाद लामिछानेके टोलीसे मनोसामाजिक अपांगता स्वास्थ्य परीक्षण करनाके साथे मनोसामाजिक अपांगता रहल व्यक्तिहुकनहे आवश्यक सहयोग सामग्री फेन वितरण करल बा ।
कार्यक्रमके प्रमुख अतिथि वडा नं. १८ के अध्यक्ष भुवन रिजाल वडाबासीके समग्र स्वास्थ्यप्रति चास व्यक्त करलटि बलैं, “वडाबासी शारीरिक किल नैहो, मानसिक रूपमे फेन स्वस्थ रहेपरठ । स्वास्थ्य सुखी जीवनके आधार हो ।”
कार्यक्रमके सभाध्यक्ष मनोज चौधरी कलैं, यी स्वास्थ्य कार्यक्रम धनगढीके नमुना कार्यक्रम रहल उल्लेख करलैं । उहाँ कलैं, “टमान मनै अभिन फेन मनोसामाजिक अपांगता समस्याहे चिन्हे सेकल नैहुइटैं ओ सेवासे वञ्चित बटैं । हम्रे उहाँहुकनहे पहिचान कैक्े उपचारके पहुँच पुगैना प्रयास करटि बटि । कार्यक्रम मार्फत १–२ महिनाके औषधि फेन प्रकृति हेरके वितरण करले बटि ।” यी स्वास्थ्य कार्यक्रमसे ४० जाने सेवा लेले बटैं ।
कोशिश कैलाली विगतके दिनसे मनोसामाजिक अपांगता सम्बन्धी जनचेतना, पहिचान, उपचार तथा सामाजिक समावेशीताके क्षेत्रमे निरन्तर काम करटि बा । यीचोके कार्यक्रम फेन ओक्रहे निरन्तरताके रुपमे सञ्चालन करल हो ।
कार्यक्रममे धनगढी–१८ के वडा सदस्य देवबहादुर विक, स्वास्थ्य शाखा प्रमुख डेपु राना, स्वास्थ्यकर्मी लगायत स्थानीय बासिन्दाहुकनके उल्लेखनीय सहभागिता रहल यी कार्यक्रमसे मनोसामाजिक अपांगता स्वास्थ्यप्रति समुदायके चास ओ सचेतनाके संकेत करल आयोजक बटैलैं ।
