यूवाहुकनहे गलत डगरमे लग्नासे बचाइलक लाग सीपमुलक तालिममे सहभागी करैना अनिवार्य बा, गाउँपालिका उपाध्यक्ष भगवती
पहुरा समाचादाता
हसुलिया, २३ जेठ । कैलारी गाउँपालिका वडा नम्बर २ मे तीन महिने क्षमता विकास तथा कम्प्यूटर तालिम सम्पन्न हुइल बा ।
कैलारी गाउँपालिकाके सहयोग तथा श्री पूर्णगिरी क्लवके आयोजनामे हुइल तीन महिने क्षमता विकास तथा कम्प्यूटर तालिम सम्पन्न कार्यक्रमके प्रमुख अतिथि गाउँपालिका उपाध्यक्ष भगवतीकुमारी चौधरी हुइल विद्यालय छोरल यूवाहुक्रे लागु औषध दुव्र्यशनीमे फस्टी गैल ओरसे ओइनहे टमान मेरिक सीपमुलक तालिममे सहभागी कराके स्थानीस्तरके रोजगारी सृजना कैटी आत्मनिर्भर बनैना जरुरी रहल बटैली ।
नेपालमे रोजगारी नैहो कहिके मनै विदेश जैना परिपाटीके विकास हुइल बा, गाउँपालिका उपाध्यक्ष कहली,अब्बे कम्प्यूटर तालिम डेहल बा । कम्प्यूटरमे दक्ष हुइलेसे सब मेरिक काम करे सेक्जाएइठ । जमना कम्प्यूटर युगके बा । जेकर प्रयोग करके ढेर चिज सिखे सेक्ना अवस्था बा । महिलाहुक्रे सिलाई कटाई, बुटिक तालिम लेना कठै । कम्प्युटरके सहयोगसे गुगलमे अनुसन्धान करके ढेर ज्ञान लेहे सेक्जाइठ । कम्प्यूटरके ज्ञान रहलेसे प्रविधिके प्रयोगसे अथाहा लेके सेक्जाइठ ।
गाउँपालिकासे जबसे रोजगारमुलक, सीपमुलक तालिम संचालन करटी रहल उहाँ बटैली । उहाँ कहली, समाज रुपान्तरणसंगे महिला तथा यूवाहुकन आर्थिक रुपमे सशक्त बनाई पर्ना बा । कम्युटरके लाग अब्बे आधारभूत तालिम डेहल बा । यिहीसे नैपुग्ना कहटी उहीसे उप्पर सिखैना प्रयास रही । गाउँपालिका उपाध्यक्ष यूवाहुकनहे मजा काम करके हाथेक १० अंगरीके गनना काम करके डेखैना आग्रह करली ।
कार्यक्रममे वडा नम्बर २ के वडा सदस्य सन्तराम चौधरी अब्बेक यूवाहुकनके समय ओ उमेर अनुसार आघे बह्रे पर्ना समय आइल बटैलै । गाउँपालिका वेरोजगार यूवाहुकनके स्थानीयस्तरमे रोजगारी पाइट कहिके सीपमुलक आयमुलक तालिममे डोर डेहल बटैलै ।
थारु कल्याणकारिणी सभा क्षेत्र नम्बर ३ क्षेत्रीय सभापति कृष्ण प्रसाद चौधरी पहिले पहिले कम्प्यूटरमे जमना नैरहे । महिलाहुक्रनफे नैपह्रैना चलन रहे । अब्बे महिलाहुक्रे पह्रना लिखनामे आघे बटै । जिहीसे आघे बह्रना मौकाफे पाइल बटैलै । सीपमुलक आयमुलक तालिमसे महिला सशक्तीकरणफे हुइटी गैल सभापति बटैलै । थारु समुदाय राज्य सट्टासेफे पाछे परल उहाँ बटैलै ।
कार्यक्रममे बसौटी गाउँक भल्मन्सा धनीराम चौधरी, लक्ष्मी प्रसाद चौधरी, प्रशिक्षार्थी विरु चौधरीलगायत मन्तव्य राखल रहिट । श्री पूर्णगिरी क्लवके अध्यक्ष जनक चौधरीके अध्यक्षतामे हुइल कार्यक्रममे यी क्लवसे टमान कार्यक्रम सम्पन्न कैसेकल बटैलै । अइना दिनमे लोकसेवा कक्षा संचालन योजना रहल बटैलै ।
तालिम समापन कार्यक्रममे स्वागत मन्तव्य श्री पूर्णगिरी क्लवके सचिव राजकुमार चौधरी करल रहिट । कम्प्यूटर तालिममे प्रशिक्षके रुपमे कोयल चौधरी रहल रहिट । तालिम समापन कार्यक्रममे क्लव, स्थानीयके जनप्रतिनिधि, बुद्धिजीवीहुकनके सहभागिता रहे । कार्यक्रम संचालन राजाराम चौधरी करल रहिट । तालिम चैत ६ से सुरु हुइल रहे ।
