सिकलसेल परिक्षण ओ निशुल्क रगतके व्यवस्था करुइया कैलारी पहिल पालिका होः अध्यक्ष राजसमझ

पहुरा समाचारदाता
हसुलिया, २९ जेठ । कैलाली जिल्लामे पालिकास्तरमे सिकलसेल परिक्षण करुइया कैलारी गाउँपालिका पहिल पालिका रहल अध्यक्ष राजसमझ चौधरी बटैले बटै ।

प्रादेशिक स्वास्थ्य प्रवद्र्धन केन्द्र धनगढी कैलालीके आयोजना एवं स्वास्थ्य कार्यालय कैलाली तथा कैलारी गाउँपालिकाके कार्यालय हसुलियाके समन्वय ओ सहकार्यमे कैलारी गाउँपालिकामे ‘स्वास्थ्य प्रवद्र्धनके सवालमे संचार’ विषयमे समुदायके अगुवा, सेवाग्राही ओ स्वास्थ्य प्रदायक तथा जनप्रतिनिधिसंग स्थानीय तहमे गुणस्तरीय स्वास्थ्य सेवाके सुनिश्चितता ओ दिगोपनके लाग अन्तरक्रिया तथा छलफल कार्यक्रममे उहाँ बाट बत्वाइल रहिट ।

कैलारी गाउँपालिका थारु समुदायके बाहुल्यता रहल पालिका हो,’ उहाँ कहलै, थारु समुदायमे सिकलसेल एनिमिया रोग डेखा परल बा । यी रोग लग्लेसे बार बार रगत चढाई पर्ना रहठ । सिकलसेल एनिमिया रोग नियन्त्रणके लाग सिकलसेल परिक्षण ओ निशुल्क रगतके व्यवस्था करले बटी ।’

उहाँ दाबी करलै सिकलसेल परिक्षणफे पालिकास्तरमे हम्रे सुरवाट करली ओ निशुल्क रगतके व्यवस्थाफे हम्रे करली । हम्रे तीन बरस पहिले सुरुवाट करली अब्बे और पालिकाफे सुरुवाट करले बा । गाउँपालिका सिकलसेल रोग ग्रासितहुकनके समस्याप्रति गम्भीर बा, उहीहे मध्य नजरके पालिका निशुल्क रगतके व्यवस्था करल हो । कैलारी–३ ओमनगरमे एक जाने एक बरसमे ४८ चो रगत चह्र्रैलै ।

गाउँपालिकासे सिकलसेल रोग जाँचके लाग प्रत्येक वडा वडामे सिकलसेल रोग जाँच शिविर संचालन करल रहे । कलेसे पिएसी उदासीपुरमे नियमित जाँच करटी रहल बा ।

भोज विहा करेबेर सिकलसेल पोजेटिभ रहल दुनुजाने बटै कलेसे बच्चाहेफे सिकलसेल हुइना १०० प्रतिशत रना सम्भावना रहठ । उ विषयमे हम्रे प्रचार प्रसार करठी । पालिकासे सिकलसेल रोगके उपचार करे जउइयाहुक्रन अस्पतालमे समस्या अइलेसे पालिकाहे जानकारी करैलेसे समन्वय कैडेना गाउँपालिका अध्यक्ष बटैलै ।

कैलारी गाउँपालिका खुला सिमानाका हुइल कारण यहाँके यूवा ढेर लागु औषध दुव्र्यशनीमे फसल बटै । तथ्याङक हेरलेसे यहाँके यूवा ढेर लागु औषधमे फसल बटै । थोरके पैसाके लोभमे महिलाहुक्रे प्रयोग हुइल डेखल बा ।

गाउँपालिका उपाध्यक्ष भगवतीकुमारी चौधरी गाउँपालिकासे स्वास्थ्य, शिक्षा, कृषिमे ढेर ध्यान डेहल बटैली । उहाँ कहली, गाउँपालिकाके गृहणी जस्टे हो । मै अनुगमनके संयोजकके नातासे अनुगमनके क्रममे सक्कु ओरके समस्या बुझना प्रयास करठु । सिकलसेल रोगके समस्या रहल व्यक्तिहुक्रे सेती प्रादेशिक अस्पतालमे सेवा लेहल गैलबेला सहजे सेवा नैपाइल गुनासो आइल बा । सक्कुजाने सहजे सेवा पैना जरुरी बा ।‘

सिकलसेल रोग जाँचके लाग शिविर संचालन करली । मने सूचनाके पहुँचके अभावमे कोई कोई छुटे सेकल हुइही । सही कामके प्रचार प्रसार कैना जरुरी बा । विकासके क्रमागत हुइटी बा । आज हम्रे बटी काल्हके दिनमे और जाने अइही । विरोध केल्ह कैलेसे विकास कबु नैहुई । यकर लाग समन्वय सहकार्य जरुरी बा ।

संविधान सभा सदस्य विरमान चौधरी नितिगत समस्याके कारण १५ शैयाके अस्पताल संचालनमे आइल नैसेकल बटैलै । उहाँ कहलै, ‘जनता किहीहे जिटैलै उ भारी बाट नैहो सत्ता फेरबदल हुइटी रही । यी सरकारफे काम करठी बा । और सरकार आई टे उ फे काम करी । ओकर लाग पालिका ओ सक्कु राजनितिक दल लग्लेसे केल्ह विकास हुई ।’

उहाँ कहलै, ‘कैलारी गाउँपालिका वडा नम्बर ५ मे निर्माण हुइल १५ शैया अस्पतालके लाग पालिकाके बजेटसे नैभ्याई । संघ ओ प्रदेश सरकारहे सहयोग अनिवार्य बा । संघसे डाक्टरके व्यवस्था, इकुपमेन्टके व्यवस्था हुइलेसे पालिकाके थोर–थोर सहयोग हुइलेसे केल्ह उ अस्पताल संचालनमे आइसेक्ना अवस्था बा । यी अस्पतालके ८ ठो डाक्टर ओ तलबके व्यवस्था संघसे कैडी ओ १०÷१२ ठो प्रदेशसे व्यवस्था कडेलेसे पालिकाहे ओकर भारी नैपरी ।’

प्रादेशिक स्वास्थ्य प्रवद्र्धन केन्द्रके प्रमुख हेमराज खड्का स्वास्थ्य आपन लाग हो, सक्कु जाने आपन स्वास्थ्यप्रति सचेत रना आग्रह करलै । उहाँ कहलै, नियमित स्वास्थ्य जाँच, आपन घरके खाना ओ नियमित रुपमे व्ययाम करलेसे शरिरहे स्वास्थ्य बनाई सेक्जाई । ओस्टेक करके सेती प्रादेशिक अस्पतालके हाडजोर्नी रोग विशेषज्ञ डा अभुष मिश्र नियमित चेकजाँच ओ समयमे उपचार करलेसे रोगके बाँचेसेक्ना बटैलै ।

कैलारी गाउँपालिका स्वास्थ्य शाखा प्रमुख नरेशकुमार चौधरी कैलारी गाउँपालिका सिकलसेल विरामीहुकनके सेती प्रादेशिक अस्पतालमे उपचारके जउइयाहे यातायत खर्च कहिके एक हजार रुप्या व्यवस्था करटी आइल बा । सिकलसेल रोग उपचार करे जउइयाहे समस्या अइटी रहल ओरसे आब पालिकामे एक ठो सिकलसेल अस्पतालके आवश्यकताके आधारमे डिपिआर करके केन्द्रमे फाइल पेश करल बटैलै । कैलारीमे अब्बे निर्माण हुइटी रहल भौतिक संरचना अपाङततामैत्री बनैटी रहल बटैलै । सिकलसेलसे रोगसे पीडितहुक्रे सेती प्रादेशिक अस्पतालमे उपचारके लाग गैल बेला हेल्हा करुवा पाइल बटैठै । रगत चढाइक लाग लाइनमे बैठे पर्ना बाध्यता, एक्के बेडमे दुई जनहनहे धारडेना, हाली सुनुवाई नैहुइना, सिकलसेल रोगके विरुवा नैपैना समस्या झेल्टी आइल बटैठै ।

कार्यक्रममे नेत्रहिन यूवा संघ नेपालके अध्यक्ष हिमाल रोकाय अब्बे तीन तहके सरकारसे नीति तथा कार्यक्रम ओ बजेट बनैटी रहल ओरसे अपाङता रहल व्यक्तिहुकनके हक अधिकारहे सुनिश्चिता कैना आग्रह करलै ।

कार्यक्रममे कैलारी गाउँपालिका सामाजिक विकास समितिके संयोजक तथा वडा नम्बर ३ के वडा अध्यक्ष सन्तराम चौधरी, स्वास्थ्य कार्यालय कैलालीके मिनबहादुर धामी, भल्मन्सा, महिला तथा स्वास्थ्य स्वम सेविका, सेवाग्राहीहुकनके सहभागिता रहे ।