लक्षित वर्गहुकनहे स्वास्थ्य बीमामे समेटना जरुरी बाः गापा अध्यक्ष राजसमझ
पहुरा समाचारदाता
हसुलिया, २ असार । स्वास्थ्य बीमा कार्यक्रमके कैलारी गाउँपालिका स्तरीय समिक्षा कार्यक्रम सोम्मारके रोज हसुलियामे सम्पन्न हुइल बा ।
कैलारी गाउँपालिका स्वास्थ्य शाखाके आयोजनामे हुइल कार्यक्रममे गाउँपालिका अध्यक्ष राजसमझ चौधरी स्वास्थ्य बीमा कार्यक्रममे लक्षित वर्गहुकनहे समेट जरुरी रहल बटैलै । उहाँ कहलै, ‘स्वास्थ्य वीमा कार्यक्रम कैलाली जिल्लासे सुरुवाट हुइलेसेफे अभिनफे ढेर घरपरिवार स्वास्थ्य बीमा कार्यक्रममे नैसमेटल हुइट । स्वास्थ्य जोखिम न्यूनिकरणके लाग यी कार्यक्रममे सक्कु क्षेत्रहे समेट जरुरी बा । मने समेटे नैसेकल हो ।’
लक्षित वर्गहुकनहे यी कार्यक्रममे समेटक लाग दर्ता सहयोगीहुक्रे सक्रियता हुईना जरुरी रहल उहाँ बटैलै । दर्ता सहयोगी सक्रिय हुइलेसे पालिकासे ओइनहे थप सहयोगके व्यवस्था मिलैना गाउँपालिका अध्यक्ष बटैलै ।
कार्यक्रममे स्वास्थ्य बीमा बोर्डके प्रदेश संयोजक जनकबहादुर साउद कैलारी गाउँपालिकामे जम्मा स्वास्थ्य विमा कार्यक्रममे २० हजार ३ सय ७० आवद्ध रहल बटैलै, कलेसे अभिन ढेर जाने आवद्ध हुई नैसेकल कहलै । यी कार्यक्रममे वडा नम्बर १ से २३ सय १६ जाने व्यक्ति ६५२ परिवार, वडा–२ मे २३ सय ५४ व्यक्ति ७४५ परिवार, वडा नम्बर ३ मे १६ सय १ व्यक्ति ४५७ परिवार, वडा नम्बर ४ मे २ हजार ९३ व्यक्ति ५७७ परिवार, वडा नम्बर ४ मे १२ सय ३६ व्यक्ति ४४२ परिवार केल्ह स्वास्थ्य बीमामे समेटल बटैलै ।
ओस्टेक वडा नम्बर ६ मे १९ सय ७४ व्यक्ति ५०२ परिवार, वडा नम्बर ७ मे २३ सय ८० व्यक्तिमे ६७३ परिवार, वडा नम्बर ८ मे ३९ सय ९८ व्यक्तिमे ९५१ परिवार ओ वडा नम्बर ९ मे २४ सय १८ व्यक्ति ५८९ परिवार स्वास्थ्य बीमामे समेटल बटैलै ।
स्वास्थ्य वीमा कार्यक्रम सेवा समेटक लाग एक परिवारके ५ जाने सहभागीहुइक लाग ३५ सय रुप्या तिरे पर्ना बा । उहीसे ढेर हुइलेसे प्रतिव्यक्ति थप ७ सयके दरसे पैसा थपे पर्ना रहठ ।
स्वास्थ्य बीमा निशुल्क ७० बर्ष उप्परके जेष्ठ नागरिक, एचआइभी पीडित, कुष्ठरोगीहुकनहे कैना व्यवस्था बा, कलेसे महिला स्वास्थ्य स्वम सेविका प्रदेश ओ स्थानीय मिल्के एक लाख उपचार पैना कहिके स्वास्थ्य बीमा कैना व्यवस्था रहल प्रदेश संयोजक साउद बटैलै ।
ओस्टेक करके कैलारी गाउँपालिका स्वास्थ्य शाखा प्रमुख नरेशकुमार चौधरी कार्यक्रममे सहजीकरण करटी गाउँपालिकासे दीर्घरोगी, मानसिक रोगी, अपाङता रहल व्यक्ति रातो कार्ड रहल बाहेकहे, द्वन्दपीडित परिवार, सिकलसेल एनिमिया रहल व्यक्तीहुकनहे निशुल्क स्वास्थ्य बीमा कैना करल बटैलै । स्वास्थ्य बीमा स्वास्थ्य जोखिम न्यनिकरण करेक लाग सुरुवाट हुइल उहाँ बटैलै ।
कार्यक्रममे वडा नम्बर ५ के वडा अध्यक्ष विष्णु प्रसाद चौधरी स्वास्थ्य बीमा कार्यक्रमसे आर्थिक अवस्था कम्जोर रहल व्यक्तिहुकनहे फाइदा पुगल बटैलै । उहाँ कहलै, ‘जौन व्यक्ती अस्पालतके ढोकामे पुग्न अवस्था नैहो । ओइनहे सहजुल हुइल बा । दर्ता सहयोगीहुक्रे आब जौन जौन लक्षित वर्ग नैसमेटल हुइट ओइनहे समेटन जरुरी बा ।’
कार्यक्रममे गाउँपालिका उपाध्यक्ष भगवतीकुमारी चौधरी, वडा अध्यक्षहुक्रे, स्वास्थ्य शाखाके प्रतिनिधि, दर्ताहुकनहे सहभागिता रहे ।
