घोडाघोडीसे स्थानीय पाठ्यक्रममे मानसिक स्वास्थ्यके विषय समावेश कैना
पहुरा समाचारदाता
घोडाघोडी, ३ असार । घोडाघोडी नगरपालिकासे स्थानीय पाठ्यक्रममे मानसिक स्वास्थ्यके विषयवस्तु समावेश कैना हुइल बा ।
बह्रटी रहल मानसिक स्वास्थ्य समस्या बारे सचेतना एवं न्यूनीकरणके लाग नगरपालिकासे मानसिक स्वास्थ्यके विषयवस्तु समावेश कैना हुइल हो । सोम्मारके घोडाघोडी नगरपालिका ओ सीएमसी–नेपालके साझेदारी एवं फेल्म नेपालके आर्थिक सहयोगमे सञ्चालनमे रहल अप्रावासी कामदार ओ ओइनके परिवारके मानसिक स्वास्थ्य ओ मनोसामाजिक सुस्वास्थ्य प्रवद्र्धन परियोजनाके परियोजना सल्लाहकार समितिके बैठकसे उक्त विषयवस्तु समावेश निर्णय करल हो ।
उहीसे आघे नगरपालिकासे तयार पारल स्थानीय पाठ्यक्रम परिमार्जन करे लागल ओ पाछेक समय घोडाघोडी नगरपालिकामे मानसिक स्वास्थ्य समस्या रहल व्यक्तिनके संख्या बह्रटी रहल ओरसे ओकर न्यूनीकरण एवं विद्यालय तहसे प्रचारप्रसार मार्फत सचेतना फैलैना उद्देश्यसे उक्त विषयवस्तु समावेश कैना हुइल हो ।
उक्त कार्यक्रममे नगरप्रमुख खडक बहादुर रावत आर्थिक बरस २०८२/०८३ के नीति, कार्यक्रम ओ बजेटमे मानसिक स्वास्थ्यके विषय समावेश कैना प्रतिवद्धता समेत व्यक्त करल रहिट । उहाँ अपने मानसिक स्वास्थ्य सवाल प्रति गम्भीर रहल ओ मानसिक स्वास्थ्य समस्या रहल व्यक्तिनके सामुदायिक पुर्नस्थापनाके लाग बिषयगत शाखासँगके समन्वयमे आयआर्जनमुलक कार्यक्रम जोर्ना फेन बिषयगत शाखा प्रमुखहे निर्देशन डेहल रहिट ।
ओस्टके उक्त परियोजना सम्झौता अनुरुप ३१ डिसेम्वर २०२५ मे परियोजना ओरैना हुइल ओरसे उक्त परियोजनाके असल अभ्यासहे कार्यन्वयन कैना निर्णय समेत करल बा । उक्त बैठकमे सीएमसी–नेपालके कार्यक्रम अधिकृत अनत चौधरीले परियोजना मार्फत जनवरीसे जुन २०२५ करल क्रियाकलाप, उपलब्धी ओ बर्हिगमनके चरणमे कैना भावी रणनीतिके बारेम प्रस्तुतीकरण करल रहिट ।
बैठकमे सीएमसी–नेपालका नीति, रणनीति तथा सुशासन प्रमुख हिमाल गैरे मानसिक स्वास्थ्य नीतिके कार्यन्वयनके लाग मनोसामाजिक परामर्श सेवाके निरन्तरता, स्थानीय पाठ्यक्रममे मानसिक स्वास्थ्य, तनाव व्यवस्थापन, आत्महत्या रोकथाम लगायतके विषयवस्तुहे समेट्ना ओ स्थानीय तहसे कार्यक्रमके असल अभ्यासहे अबलम्वन कैना आवश्यक नीति, कार्यक्रम ओ बजेटके बारेम आपन सुझाव राखल रहिट ।
कार्यक्रम सञ्चालन घोडाघोडी नगरपालिकाके स्वास्थ्य शाखा प्रमुख कैलाश रावत करल रहिट । बैठकमे वडा नम्बर १ के वडा अध्यक्ष तथा नगर प्रवक्ता घनश्याम ओझा, वडा नम्बर २ के वडा अध्यक्ष लक्ष्मी राज चौधरी, वडा नम्बर ३ के वडा अध्यक्ष कृष्णप्रसाद गौतम, शिक्षा शाखा प्रमुख खगेन्द्र बहादुर सिंह, महिला तथा बालबालिका शाखा प्रमुख इन्दु जोशी, मेडपा कार्यक्रमके फोकल पर्सन जुगिना चौधरी, स्वाबलम्वन समूहके अध्यक्ष सीताराम चौधरी, साथी सहयोगी स्वयंसेवक कल्पना चौधरी, मनोसामाजिक कार्यकर्ता सुशीला चौधरी लगायतके उपस्थीति रहल रहे ।
