तनाव व्यवस्थापनसे टमान रोगसे बाँचेसक्जाइठः प्रदेशसभा सदस्य महरा

पहुरा समाचारदाता
धनगढी, ७ असार । मानव अधिकारका महिला एकल महिला समुह सुदूरपश्चिम प्रदेशके आयोजना तथा कुर्वे विष्ट्रोके सहयोगमे स्थानीय लिडर ओ कार्यससमितिके पदाधिकारीहुकनहे दुई दिने तनाव व्यवस्थापन तालिम डेगिल बा ।

मानव अधिकारका महिला एकल महिला समुहके जिल्ला अध्यक्ष भगवती हमालके अध्यक्षतामे हुइल कार्यक्रममे सुदूरपश्चिम प्रदेश सभा सदस्य माननीय डम्मरी महरा प्रमुख अतिथि रहल रहिट । कार्यक्रममे सम्बोधन करटी तनावके कारण ढेर रोगके शिकार हुइना ओरसे जीवनहे सार्थकता बनाइक लाग तनाव व्यवस्थापन तथा तनावहे कम बनैना जरुरी रहल बटैली ।

यहाँ कहली, जटरा लेबो ओटरे समस्या आइसेकठ । तनावमुक्त जीवन जिएक लाग सकारात्मक सोच आवश्यक रहल बा । अभिन पितृ सत्तात्मक समाज रहल ओरसे पुरुषवादी सोच चिन्तनसे समाज दुर जाई नैसेकल बेला कतिपय ठाउँमे महिलाके शत्रु महिला रहल डेखजाइठ ।

विना प्रमाण कौनोफे महिलाके बारे बोल्ना वा सामाजिक सञ्जालमे डारेबेर सक्कु महिला मिल्के ओकर प्रतिकारण कैना जरुरी रहलफे उहाँ बटैलै । कार्यक्रममे राष्ट्रिय मानव अधिकार आयोग सुदूरपश्चिम प्रदेश प्रमुख प्रकाशदत्त भट्ट मुलुक विकास हुइटी गैलबेला सक्कु जाने कौनो ना कौनो मेरिक तनावसे ग्रासित रहल बटैलै । यी तालिम आवश्यकताके आधारमे हुइल ओरसे बहुट महत्वपूर्णफे रहल बटैलै । तालिम उदघाटन कार्यक्रमके संचालन मानव अधिकारका लागि एकल महिला समुह सुदूरपश्चिम प्रदेशके कार्यक्रम संयोजक वेद अवस्थी ओ संचालन समुहके प्रदेश उपाध्यक्ष शान्ति महत करल रहिट ।

तालिममे कृष्ण महरा ओ समिता भट्ट सहजीकरण करटी तनावके कारणसे कैना असर ओ ओकर व्यवस्थापन कैना तरिकाबारे छलफल कराइल रहिट । कृष्ण महरा तनावके परिचय÷परिभाषा, तनावके कारण÷लक्षण, तनाव मापन कैना तरिका, तनाव व्यवस्थापनके उपाय, आत्म हेरचाहके महत्व, समुहगत अभ्यासबारे जानकारी डेहल रहिट । ओस्टेक करके तनाव हुइना कारण ओ ओकर व्यवस्थापन सम्बन्धी समुहगत छलफलके साथे योग, मनोरञ्जनसे तनावहे कैसिक कम करे सेक्ना तरिकाबारे जानकारी डेहल रहे ।

कार्यक्रममे मानव अधिकारका महिला एकल महिला समुहके कार्यक्षेत्र रहल, धनगढी उपमहानगरपालिका, कैलारी गाउँपालिका, गोदावरी नगरपालिकाभिटर समुहके स्थानीय लिडर तथा कार्यसमितिके पदाधिकारीहुकनके सहभागिता रहे ।