कैलारीमे सञ्चालित योजनाके काम समयमे सेकैना निर्देशन

पहुरा समाचारदाता
धनगढी, १० असार । कैलाली जिल्लाको कैलारी गाउँपालिकामे चालु आर्थिक बर्षमे सञ्चालित योजनाके स्थलगत अनुगमन कैगिल बा ।

गाउँपालिका स्तरीय अनुगमन समितिके संयोजक भगवतीकुमारी चौधरीके अगुवाईमे चालु आर्थिक बर्षमे वडा नम्बर १, २ ओ ४ मे संचालन कैगिल योजनाके अनुगमन करल हो । प्रदेश सरकारके बजेटसे निर्माण हुइल वडा नम्बर २ निर्माण हुइल दुर्गा मन्दिरके समितिसे अनुगमन कैगिल बा । उ मन्दिरके काम रु. पाँच लाख रुप्यामे सम्पन्न हुइल बा । वडा नम्बर २ मे निर्माण हुइटी रहल कर्मदेव मन्दिरके अनुगमन कैगिल बा । निर्माण कार्य अन्तिम चरणमे रहल उ मन्दिरके लाग प्रदेश सरकारसे १२ लाख रुप्या विनियोजन करल रहे । समितिसे काम हाली सेक्ना निर्देशन डेहल बा ।

वडा नम्बर १ स्थित दिपेन्द्र्र माविमे निर्माणधिन मिनिकर्वड हलके अनुगमन कैगिल बा । यकर लाग ७ लाख रुप्या बजेट विनियोजन करल रहे । ओस्टेक करके समिति वडा नम्बर ४ मे बन्टी रहल कालोपत्रे सडकके अनुगमन करल रहे । अनुगमनके क्रममे निर्माणधिन योजनाहे समयमे सेकैना निर्देशन डेहल बा ।

अनुगमन समितिके संयोजक भगवती कुमारी चौधरी, सदस्य प्रेमबहादुर चौधरी, लालबहादुर विक, योजना शाखा प्रमुख सन्तोषकुमार चौधरी, इन्जिनियर निर्मल चौधरीसे कैगिल बा ।