३६ जनहन अपाङगता सहायक प्रविधि सामग्री वितरण

पहुरा समाचारदाता
धनगढी, १० असार । कैलालीके चुरे गाउँपालिकाके सक्कु वडामे रहल नेंग्ना असहज हुइल ३६ जाने शारीरिक अपाङता हुइल नागरिकहुकनके पाँच प्रकारके सहायक प्रविधि सामग्री वितरण करल बा ।

चुरे गाउँपालिका ओ डिड मिसन टु नेपाल सस्थाके प्राविधिक तथा लागत साझेदारीमे चुरे गाउँपालिकाके ६ ठो वडाके सहजपुर, खानीडाडा ओ गर्भा दरवार करके तीन कलस्टरमे वितरण करल साझेदार सस्था डिड मिसन टु नेपालके प्रबन्ध निर्देशक तथा अपाङगता अभियानकर्मी नन्दराज भट्ट जानकारी डेलै ।

उ कार्यक्रमके उदघाटन चुरे ३ नम्बर वडामे गाउँपालिकाके उपाध्यक्ष धना थापाके प्रमुख आतिथ्यता ओ डिड मिसन टु नेपालके प्रबन्ध निर्देशक नन्दराज भट्टके अध्यक्षतामे करल कार्यक्रममे वडा अध्यक्ष, सदस्य, सामाजिक अभियानकर्मी, कर्मचारी सहित ६० जानेक उल्लेखनीय उपस्थिति रहे ।

गाउँपालिकाके उपाध्यक्ष धना थापा अपाङगता रहल व्यक्तिहुकनहे पालिकासे आवागमनमे सहज होए कहिके सहायक सामग्री वितरण करल बटैली । पालिकाके अइना नीति कार्यक्रम ओ बजेटमेफे मानवीय विकासके कार्यक्रमसे निरन्तरता पैना प्रतिवद्धता समेत व्यक्त करलै ।