कैलालीमे मानव अधिकारके अवस्था चिन्तजनक

६ महिनामे १ सय ९१ घटना संकलन, बलात्कार ओ बलात्कार जन्य घटना ४७

पहुरा समाचारदाता
धनगढी, १० असार । कैलाली जिल्लामे मानव अधिकार उलंघनके घटना वृद्धि हुइटी गैल डेखल बा ।

मानव अधिकार अवस्थाके बारेमे जानकारी करैना उद्देश्यसे अनौपचारिक क्षेत्र सेवा केन्द्र (इन्सेक) सुदूरपश्चिम प्रदेश कार्यालय, धनगढीसे नेपाल मानव अधिकार वर्ष पुस्तक प्रकाशन पूर्व अर्धवार्षिक तथा वार्षिक समीक्षा करटी उ जानकारी डेहल हो ।
कैलाली जिल्लामे सन् २०२५ जनवरीसे सन् २०२५ जुनसम हुइल मानव अधिकार उल्लङ्घनके घटनाके पुष्टि तथा पुनर्युष्टि कैना उद्देश्यसे राष्ट्रिय मानव अधिकार आयोग, सरोकारवाला निकाय, संचारकर्मीनसे छलफल कार्यक्रमके आयोजना करल रहे ।

सन् २०२५ जनवरीसे जुनसमके अवधीमे कैलाली जिल्लामे अनौपचारिक सेवा केन्द्र (इन्सेक) सुदूरपश्चिम प्रदेशके संकलन करल १ सय ९१ घटनामे १ सय ५३ महिला, ३० बालिका ओ आठ जाने पुरुष करके १ सय ९१ जाने पीडित हुइल प्रदेश संयोजक खडकराज जोशी बटैलै । यी अवधीमे राज्य पक्षसे दुई महिलासहित चार जानफे पीडित हुइल इन्सेकसे अभिलेख करल उहाँ जनैलै ।
६ महिनाके अवधीमे महिला अधिकारसे १ सय ५३ जाने पीडित हुइलै । जेम्नेसे घरेलु हिंसासे १ सय २६, बलात्कारसे १८ जाने, छाउगोठमे एक जाने महिला बाघके आक्रमणसे घाहिल, प्रहरीसे दुव्र्यवहार एक जाने, जातीय विभेदसे एक जाने ओ प्रहरीके कुटपिटसे एक जाने पीडित हुइल इन्सेकसे अभिलेख करले बा ।

यी अवधीमे बाल अधिकारसे ३० जाने पीडित हुइल बटै । जेम्ने वलात्कारसे २१. यौनदुव्र्यवहारसे ६, बलात्कार प्रयाससे दुई ओ बेचविखनसे एक जाने पीडत हुइल इन्सेकसे अभिलेख करल बा । गरैराज्य पक्षसे यी अवधीमे आठ जाने पुरुष पीडित हुइल बटै । जेम्ने एक जाने पत्रकारहे धम्की, एक जाने डाक्टरहे कुटपीट, एक जाने कार्यालय प्रमुखहे कुटपीट, एक जानहे कालो मोसो दलके दुव्र्यवहार, एक जाने जातीय विभेद, एक जाने बालक घाहिल ओ एक जानेक हत्या करल बा । कारगारमे धारल एक जाने कैदीके उपचारके क्रममे मृत्यु हुइल इन्सेकसे अभिलेख करले बा ।

६ महिनाके अवधिमे कैलालीमे बलात्कारके घटना एकदम बह्रल ओरसे ओकर कारण पत्ता लगाईपर्ना राष्ट्रिय मानव अधिकार आयोग सुदूरपश्चिम प्रदेश प्रमुख प्रकाशदत्त भट्ट बटैलै । कार्यक्रमके संचालन इन्सेक प्रलेख अधिकृत कृष्ण विक करल रहिट ।