मानव अधिकार सहायता कक्ष सवलीकरण विषयक छलफल सम्पन्न
पहुरा समाचारदाता
धनगढी, १० असार । अनौपचारिक क्षेत्र सेवा केन्द्र(इन्सेक) सुदूरपश्चिम प्रदेश कार्यालय, धनगढीके आयोजनामे मानव अधिकार सहायता कक्षके सवलीकरण विषयक छलफल मंगरके रोज धनगढीमे सम्पन्न हुइल बा ।
इन्सेक पदेश संयोजक खडकराज जोशी मानव अधिकार सहायता कक्षमे आइल निवेदनमे छलफल करके वास्तविक पीडितहे कानूनी प्रकृयामे जाइक लाग आवश्यक प्रकृया तथा कागजात पुरा करके अइना पीडितहे आर्थिक सहयोग करटी आइल बटैलै । उहाँ वास्तविक पीडत अभिनफे बाहेर आई नैसेकल अवस्थाके घटनाहे बाहेर ल्यन्ना न्यायिक प्रकृयामे सहयोग करेपर्ना बटैलै ।
गैरसरकारी संस्था महासंघ सुदूरपश्चिम प्रदेशके अध्यक्ष तथा मानव अधिकार सहायता कक्षके संयोजक देवीप्रसाद खनाल मानव अधिकार सहायता कक्ष मार्फत ५ महिनाके अवधीमे १२ जाने लैङ्गिक तथा यौन हिंसामे परल मने आर्थिक समस्यामे परल पीडितहे न्यायिक प्रकृयामे सहयोग करसेकल ओ दुई जनहनहे सहयोग कैना प्रकृयामे रहल बटैलै ।
दलित महिला अधिकार मञ्चके कार्यक्रम संयोजक सृजना पराजुली भजनी नगरपालिकामे बौद्धिक अपाङ्गता हुइल महिलाहे दिनहँु बलात्कार हुइटी करल घटना बाहेर आइ नैसेकल ओरसे ओसिन घटनाके अनुगमन करके पीडितके उद्धार करेपर्ना बटैलै ।
मानव अधिकारका लागि महिला एकल महिला समुहके संयोजक वेद अवस्थी समुदायस्तरमे घरेलु ओ यौन हिंसा पीडित केल नैहुके अन्य घटनाके पीडित फे आर्थिक समस्यामे परल ओरसे छावा छाई पढाई नैसेकल अवस्थामे रहल बटैलै ।
