गोदावरी नगरपालिका पूर्ण खोप सुनिश्चितता घोषणा

पहुरा समाचारदाता
अत्तरिया, ११ असार । कैलालीके गोदावरी नगरपालिकाहे बुधके रोज पूर्ण खोप सुनिश्चितता पालिका तथा दिगोपना घोषणा करल बा ।

नगरप्रमुख विरेन्द्र भट्ट ‘स्थानीय स्रोतको उपयोग, स्वामित्व ओ सहभागिता, पूर्ण खोप पालिका हमार प्रतिबद्धता’
सहित घोषणा करल हुइट । कार्यक्रममे नगरप्रमुख भट्ट स्वास्थ्य क्षेत्रहे प्राथमिकता डेटी खोप कार्यक्रममार्फत नागरिकके जीवनस्तर सुधार कैना नगरपालिका प्रतिबद्ध रहल बटैलै । ‘खोप किल सेवा नैहो, जनस्वास्थ्यमे दीर्घकालीन लगानी हो,’ उहाँ कहलै, ‘स्वास्थ्य क्षेत्रके सुदृढीकरण ओ जनताके सशक्तिकरण हमार प्रमुख लक्ष्य हो ।’

नगरपालिकाके स्वास्थ्य शाखा प्रमुख नवराज अवस्थीके अनुसार पूर्ण खोप सुनिश्चितता घोषणाके लाग आवश्यक सक्कु मापदण्ड पूरा करल बटैलै । खोपके महत्व, उपलब्धि, औचित्य ओ पालिका तथा वडास्तरीय घोषणा आधार विश्लेषण कैके निर्णय लेहल हो । उहाँ कहलै, ‘गोदावरी नगरमे हालसम ९३ प्रतिशत खोप कार्यान्वयन होसेकल बा, ओ आगामी बरस यी संख्या आउर बह्राब ।’

कार्यक्रममे खोप कार्यक्रममे उत्कृष्ट योगदान पुगुइया अनमी ओ अहेब सहित ३६ जनहनहे खादा ओ प्रमाणपत्रसे सम्मान करल बावै । नगरप्रमुख भट्ट खोप अभियान सफल बनाइक लाग दिनरात खटुइया स्वास्थ्यकर्मीप्रति आभार व्यक्त कैटी उहाँ कहलै, ‘स्वास्थ्य सेवामे समर्पित जनशक्तिके योगदान बिना यी सम्भव नैरहे । स्वास्थ्य क्षेत्रमे आउर सुधार लानक लाग हम्रे प्रतिबद्ध बटी ।’

कार्यक्रममे उपप्रमुख शारदा देवी रोकाया, प्रमुख प्रशासकीय अधिकृत धर्मराज विनाडी, स्वास्थ्यकर्मी, जनप्रतिनिधि, कर्मचारी तथा सरोकारवालाके उपस्थिति रहे ।