पार्टीहे गतिशील ओ क्रियाशील बनैना निष्कर्ष
पहुरा समाचारदाता
धनगढी, ११ असार । नागरिक उन्मुक्ति पार्टीके संघीय ओ प्रदेशके सांसदहुक्रे पहिलचो काठमाडौंमे सामूहिक छलफल कैके एकताके सन्देश डेले बटै । संघीय तथा प्रदेशसभामे पार्टीके १६ जाने सांसद बटै । मधेश प्रदेशके एक सांसदबाहेक अन्य १५ सांसद अक्के स्वरमे एकजुट होके आघे बह्रना प्रतिबद्धता जनैले बटै । मंगरके रोज सिंहदरबारमे सामूहिक छलफलपाछे पार्टीहे एकताबद्ध बनैटी आघे लैजैना वातावरण सृजना हुइल उहाँहुक्रनके बुझाइ रहल बा ।
सामूहिक छलफलमे ४ जाने संघीय, लुम्बिनी प्रदेशसभाके ४ ओ सुदूरपश्चिम प्रदेशसभाके ७ जाने सहभागी रहिट । सक्कु जनहनसे छलफल ओ परामर्शपाछे पार्टी अध्यक्ष रञ्जिता श्रेष्ठ पार्टीभिट्टर एकमत रहल, नीति ओ नेतृत्वउपर प्रश्न नैरहल ओ आगामी दिनमे समस्या नैअइना सन्देश डेटी सामाजिक सञ्जालमे सामूहिक तस्बिर पोस्ट करले बटी । तस्बिरसँगे उहाँ पार्टी रहटसम किल सांसद रहना कहटी पार्टी बचैना आजके आवश्यकता रहल औँल्याइले बटी ।
‘पार्टी रलेसे सांसद रहीही । एकता ओ संघर्षके आधार नैरलेसे न पार्टी बची, न टे पहिचान टिकी’, उहाँ फेसबुकमे लिख्ले बटी, ‘आज नागरिक उन्मुक्ति पार्टीके १५ जाने सांसदके सामूहिक उपस्थिति हमार आन्तरिक एकता, उद्देश्यप्रति प्रतिबद्धता ओ जनताके विश्वासके प्रतिविम्ब हो ।’ सामूहिक छलफलमे पार्टीके संरक्षक रेशम चौधरी पाछेक समय पार्टीमे अनुशासनहीन ओ अराजकता मौलाइ लागल कहटी सक्कु सांसदहुक्रनहे आपन जिम्मेवारीमे रहना निर्देशन डेहल रहिट । उहाँ आपन पार्टी अध्यक्षके निर्देशनअनुसार आघे बह्रना फेन सक्कु सांसदहे निर्देशन डेहल रहिट ।
सुदूरपश्चिम प्रदेशके मुख्यमन्त्री कमलबहादुर शाह पार्टीके ओरसे उद्योग पर्यटन वन तथा वातावरणमन्त्री रामेश्वर चौधरीहे राजीनामा डेना कहल विषयहे फेन सामूहिक छलफलमे चर्चाके विषय बनल रहे । मन्त्री चौधरी १९ जेठमे मन्त्रीस्तरीय निर्णयसे खप्तड क्षेत्र पर्यटन विकास समितिके कार्यकारी निर्देशकमे डोटीके खेमराज जोशीहे नियुक्त करल रहिट । मुख्यमन्त्री एमालेसँग सत्ता सहकार्य रहल कहटी नियुक्तिके विषय सामूहिक छलफलपाछे किल आघे बह्रैना सुझाव डेहल रहिट । मने मन्त्री चौधरी आपन क्षेत्राधिकारभिट्टर पर्ना कहटी मुख्यमन्त्रीके सुझाव उल्लङ्घन कैटी कार्यकारी निर्देशक नियुक्त करल रहिट । वहाँ आर्थिक चलखेल हुइल आरोप लागलपाछे मुख्यमन्त्री चौधरीसँग राजीनामा मागल रहिट ।
झन्डै एक साता बिट्लेसे फेन उहाँ राजीनामा नैडेहल हुइट । बरु गल्ती करल रलेसे फेन बर्खास्त गर्न चुनौती डेले बटै । मंगरके बैठकमे फेन मन्त्री राजीनामा नैडेना पक्षमे सक्कु सांसद रहल बटै । ‘क्षेत्राधिकारभिट्टर रहीके कार्यकारी निर्देशक नियुक्त करल मन्त्रीज्यू जानकारी करैलै । उहे विषयमे मुख्यमन्त्री राजीनामा मागल कहटी छलफलमे बात उठल रहे’, पार्टी अध्यक्ष श्रेष्ठ कहली, ‘गल्ती वा कमजोरी रहल रहट कलेसे मुख्यमन्त्री आपन कदम आघे बह्रैटै, नियुक्ति करल विषयमे राजीनामा नैबुझैना बात हुइल बा ।’
छलफलमे उहीसे आघे जनतम पार्टीसँग एकताके अन्तिम तयारी हुइटी रहल, मने आब एकता सम्भव नैरहल कहटी नागरिक उन्मुक्ति पार्टीहे बलगर ओ एकताबद्ध बनैटी लैजैना फेन सक्कु जाने सहमत हुइल उहाँ सुनैली । ‘विगतमे कुछ कमीकमजोरी हुइल रहे । अब्बे सक्कु सांसदहुक्रे आत्मालोचना कैटी आब पार्टीहे एकताबद्ध बनैना सकारात्मक डेखगैल बटै’, उहाँ कहली, ‘आब सक्कु जाने विगतके सक्कु तिक्तता भुलाके पार्टीहे गति डेना सहमति हुइल बा ।’
पार्टीके नीति ओ नेतृत्वहे सम्मान कैटी अध्यक्ष ओ संरक्षकके निर्देशन पालना कैटी पार्टीहे गतिशील ओ क्रियाशील बनैना छलफलसे निष्कर्ष निकारल बटैटी अध्यक्ष श्रेष्ठ आगामी दिनमे पहिलेक जैसिन विवाद ओ किचलो सार्वजनिक नैहुइना सुनैली ।
