कैलारीमे शीत भण्डारण हाटबजार तथा तरकारी संकलन केन्द्रके उदघाटन

पहुरा समाचारदाता
धनगढी, १२ असार । कैलाली जिल्लाके कैलारी गाउँपालिकामे शीत भण्डारण हाटबजार तथा तरकारी संकलन केन्द्रके उदघाटन कैगिल बा ।

कैलारी गाउँपालिका ओ सहस नेपालके संयूक्त साझेदारीमे निर्माण हुइल उ शीत भण्डारण हाटबजार तथा तरकारी संकलन केन्द्रके उदघाटन गाउँपालिका उपाध्यक्ष भगवतीकुमारी चौधरी करल रहिट । उदघाटन कार्यक्रममे सम्बोधन करटी उहाँ किसानहुकनहे आर्थिक आयआर्जनसे जोरना उद्देश्ये आघे बह्रल बटैली ।

उहाँ कहली, ‘कैलारीमे हाट बजार संचालन हुई नैसेकलपाछे व्यवसायिक रुपमे तरकारी खेती करुइया कृषकहुकनहे बजारीकरणके समस्या बा । गाउँपालिकासे यहाँ हाट बजार लगैना कहटी अवधारण लेके आघे बह्रल बा । हाट बजारमे कृषकहुक्रे टिना विक्री कैही । बाँचल टिना शित भण्डारणमे धारजाई । उ टिना कुहीहे जिम्मा लगाके धनगढी लगायत थोक विक्रेतासम पुगाई सेक्जाई ।

नेपालीहुक्रे बाह्रोमास अभिन टिनामे निर्भर हुई नैसेकल हुइट, उहाँ कहली, ‘आपन लगाइल आलु, पियाज, मिर्चा ओराइलपाछे भारतसे ल्याने पर्ना बाध्यता बा । आपन लगाइल टिना अर्गानिक रहठ । भारतिय टिनामे ढेर विपादीके प्रयोग करल रहठ ।
गाउँपालिकासे व्यवसायिक टिना खेती करुइया कृषकहुकनहे प्रोत्साहन लगायत सहयोग करटी आइल बटैली ।
कैलारीमे कृषि हाट संचालन हुईलेसे महिलाहुक्रे टिना बेचके आत्मनिर्भर हुइना उहाँ बटैली ।

शीत भण्डारण हाटबजार तथा तरकारी संकलन केन्द्रके उदघाटन कार्यक्रममे वडा अध्यक्षहुक्रे, कार्यपालिका सदस्य, गाउँपालिकाके टमान शाखाके प्रमुखहुक्रे, सहास नेपालके कार्यक्रम संयोजक सौरभ भण्डारी, नर जिरेल लगायत सहास नेपालके टिम, कृषक समुहके सहभागिता रहे ।