एक महिने ढकिया, दालो ओ बास्केट बनैना तालिम सम्पन्न
पहुरा समाचारदाता
हसुलिया, १२ असार । कैलाली जिल्लाके कैलारी गाउँपालिकामे एक महिने ढकिया, दालो ओ बास्केट बनैना तालिम विफेक रोज सम्पन्न हुइल बा ।
कैलारी गाउँपालिका गरिबी निवारणका लागि लघु उद्यम विकास कार्यक्रम मेड्पा अन्तर्गत ८ दिने उद्यमशीलता विकास तालिम पासेकल वडा नं १ ओ ३ के सम्भाबित उद्यमीहुकनके माग तथा सम्भाव्यतामे उ तालिम संचालन कैगिल रहे ।
गाउँपालिका उपाध्यक्ष भगवतीकु्मारी चौधरीके वरका पहुनामे हुइल तालिम समापन कार्यक्रममे उहाँ गाउँपालिका महिलाके आर्थिक शसक्तीकरणमे जोर डेहल बटैली ।
उहाँ कहली गाउँपालिकासे महिलाहुकनहे आर्थिक रुपमे सवल बनाइक लाग टमान मेरके तालिम संचालन करटी आइल बा । महिला उद्यमीहुकनसे तयार पारल सामाग्री बजारीकरण कैना जरुरी बा ।
उपाध्यक्ष कहली, ‘गाउँपालिकासे ढकिया, डालो, बास्केट लगायत लेहङगा सिल्ना तालिम संचालन कैगिल बा । आर्थिक रुपमे कम्जोर महिलाहुकनहे लैङिक हिंसाफे भोगे परल बा । हिंसा न्यूनिकरणके लागफे महिलाहुकनहे सीप ओ आयआर्जनसे जोरना आवश्यक बा ।
महिलाहुकनके बनाइल ढकिया, दालो ओ बास्केटमे निखार बा, अपनेहुक्रे व्यवसायिक रुपमे आघे बह्री ओ उत्पादन करटी यकर बजारीकरण कैना जिम्मा गाउँपालिकास लेना गाउँपालिका उपाध्यक्ष बटैली ।
ढकिया, दालो तथा बास्केट बनैना सीप बिकास तालिम कैलारी गाउँपालिका वडा नम्बर १ के वडा अध्यक्ष धोज हरिपाल बोहराके अध्यक्षतामे हुइल रहे । कार्यक्रममे विशिष्ट पहुना सामाजिक विकास समिति संयोजक तथा वडा नम्बर ३ के वडा अध्यक्ष सन्तराम चौधरी रहल रहिट । तालिम समापन कार्यक्रममे कैलारी गाउँपालिका गरिबी निवारणका लागि लघु उद्यम विकास कार्यक्रम मेड्पाके निर्मला चौधरीलगायतके सहभागिता रहे ।
