धनगढीमे गुरहीके मुर्ति स्थापना

पहुरा समाचारदाता
धनगढी, १४ असार । कैलालीके धनगढी उपमहानगरपालिका–८ क्याम्परोडके गुरही चोकमे शनिच्चरके रोज गुरहीके मुर्ति स्थापना कैगिल बा ।

थारु कल्याणकारिणी सभा, थारु लेखक संघ, सखी सञ्जालके अगुवाई तथा धनगढी उपमहानगरपालिकाके नगर उपप्रमुख कन्दकला रानाके विशेष उपस्थितिमे गुरही चोकमे गुरहीके मुर्ति ठरहयागिल हो ।

धनगढीके क्याम्पस रोडस्थित गुरही चोकमे थारु समुदायके विगत २०६६ सालसे सामुहिक रुपमे भव्यताके साथ गुरही टिहुवार मनैटी आइल बटै ।

गुरही चोकमे अब्बे मुर्ति ठरहयागिल ओ ओकर विधिवत अनावरण गुरही अस्रैना दिन कैना थारु कल्याणकारिणी सभा कैलालीके पूर्व जिल्ला उपसभापति माधव थारु बटैलै ।

उहाँ कहलै, ‘अब्बे गुरहीके मुर्ति स्थापना कैगिल बा । अभिन फिनिसिङ रंगरोगन ओ घेरबार कैना बा । ओकर काम हुके सेक्के गुरही अस्रैना दिन ओकर अनावरण हुई ।’

मुर्ति ठरहयइना कार्यक्रममे प्रमुख अतिथि नगर उपप्रमुख कन्दकला राना गुरही थारु समुदायके पहिचान जोरल बटैठी ।
ओस्टेक थारु कल्याणकारिणी सभाके पूर्व केन्द्रिय सदस्य प्रभातकुमार चौधरी, धनगढी उपमहागरपालिका वडा नम्बर १८ के वडा अध्यक्ष भुवन रिजाल,थारु कल्याणकारिणी सभाके धनगढी नगरसभापति सूर्य प्रसाद चौधरी, संखी संजालके कार्यवाहक संयोजक उन्नती चौधरी गुरही चोकमे विगत २०६६ सालसे सामुहिक रुपमे मनैटी आइल टिहुवारहे संस्थागत कैटी पहिचान स्थापित कार्य महत्वपूर्ण रहल बटैलै ।

गुरहीके मुर्ति ठरहयइना कार्यक्रममे थारु कल्याणकारिणीसभा, थारु लेखक संघ, संखी सञ्जालके प्रतिनिधि, थारु बुद्धिजिवीहुकनके सहभागिता रहे । असौक साल गुरही टिहुवार साउन १३ गते परल बा ।