विपन्न परिवारहे सुरक्षित आवास हस्तान्तरण
पहुरा समाचारदाता
सुखड, १७ असार । कैलालीके घोडाघोडी नगरपालिकामे विपन्न परिवारके लाग निर्माण कैगिल सुरक्षित आवास हस्तान्तरण कैगिल बा ।
ह्याबिट्याट फर ह्युमिनिटी, राष्ट्रिय दलित नेटवर्क ओ घोडाघोडी नगरपालिकाके लागत साझेदारीमे निर्माण करल २२ ठो घर सीमान्तकृत वर्गहुकनहे हस्तान्तरण करल हो । वडा नम्बर ५ सृजना टोलमे निर्माण करल ७ ठो आवास, वडा नम्बर ७ उत्तर टोल करैचामे निर्माण करल ५ ठो आवास ओ वडा नम्बर १२ शान्ति टोलमे निर्माण करल सुरक्षित आवास ओइनहे हस्तान्तरण करल हो ।
ह्याबिट्याट फर ह्युमिनिटी ओ राष्ट्रिय दलित नेटवर्कसे नमुनाके रुपमे वडा नम्बर ५ सृजना टोलमे निर्माा करल २ ठो सुरक्षित आवास समेत हस्तान्तरण करल बा ।
घोडाघोडी नगरपालिकाके नगर प्रमुख खडकबहादुर रावत उ परिवारहे सोम्मार एक कार्यक्रमबिच सुरक्षित आवास हस्तान्तरण करल रहिट ।
कार्यक्रममे बोल्टी नगर प्रमुख रावत आवास विहीन हुइल मुक्त कमैया, दलित, भूमिहीन ओ सुकुम्वासीके घर बनैना काम नगरपालिकासे करल बटैै । नगरपालिका उ वर्ग उ समुदायहे सुरक्षित आवासमे बैठना वातावरण सृजना करके आघे बह्रल उहाँ बटैलै ।
अपन कार्यकालमे नगरपालिकाभिटरके सक्कु वडामे सीमान्तकृत वर्गके सुरक्षित आवास बनाके हस्तान्तरण कैना योजना रहल उहाँ बटैलै । यिहीसे उ वर्ग उ समुदायहे ढेर बाट सहज हुइना नगर प्रमुख रावत बटैलै ।
सुरक्षित आवासमे दुई ठो पक्की कोठा ओ एक शौचालय रहल बा । सुरक्षित आवास विहीन परिवार घर निर्माणसंगे हस्तान्तरण हुइलपाछे खुसी हुइल बटै । २२ ठो घर निर्माण कैना घोडाघोडी नगरपालिकाके ६० लाख, ह्याबिट्याट फर ह्युमिनिटी, राष्ट्रिय दलित नेटवर्क नेपालके ५९ लाख ९० हजार ४ सय ८५ ओ जनश्रमदान २८ लाख ८१ हजार ८ सय ८६ दुई रुप्या लागत साझेदारीमे सुरक्षित आवास निर्माण करल हो ।
वडाके सिफारिसमे आवास विहीन रहल सीमान्तकृत वर्गहुकनहे लागत साझेदारीमे घोडाघोडी नगरपालिकासे सुरक्षित आवास निर्माण करल हो । यी आघे पालिकासे वडा नम्बर ३ सृष्टिनगर मुक्त कमैया वस्तीके नागरिकहे १२ ठो सुरक्षित आवास, वडा नम्बर ४ सिम्थरीमे निर्माण करल ६ ठो आवास ओ वडा नम्बर ९ गोदनीमे निर्माण करल ६ करके २४ ठो सुरक्षित आवास ओइनहे हस्तान्तरण करसेकल बा ।
सुरक्षित आवास हस्तान्तरण कार्यक्रममे नगर प्रमुख, शिक्षा शाखाके उप–सचिव खगेन्द्र्रबहादुर सिंह, सम्बन्धी वडाके वडा अध्यक्ष, वडा सदस्य, हयाविटयाट् नेपाल प्रतिनिधि, राष्ट्रिय दलित नेटवर्कके प्रतिनिधि ओ लाभग्राही समुदायके उपस्थिति रहे ।
