सुदूरपश्चिमके वनमन्त्री चौधरी बर्खास्त
पहुरा समाचारदाता
धनगढी, १९ असार । सुदूरपश्चिम प्रदेश सरकारके उद्योग पर्यटन वन तथा वातावरणमन्त्री रामेश्वर चौधरी बर्खास्तीमे परल बटैं ।
बिफेक रोज बैठल मन्त्रीपरिषद् बैठक उहाँहे पदसे बर्खास्त करल हो । मुख्यमन्त्री कार्यालय वनमन्त्री चौधरीहे मन्त्रीपरिषद् बैठकसे बर्खास्त करल पुष्टि करले बा ।
मुख्यमन्त्री कमलबहादुर शाह मन्त्रालय अपनसँग ढरले बटैं । कुछ दिनआघे मुख्यमन्त्री शाह पदसे राजीनामा डेना मन्त्री चौधरीहे निर्देशन डेले रहैं । मने, नागरिक उन्मुक्ति पार्टी (नाउपा) गैल जेठ ४ मन्त्री बनल चौधरी अटेर करले रहैं ।
कृषि मन्त्री रहल बेला अनुदानमे पावर टिलर वितरण करना कटि किसानसे रकम असुल्ना समूहसँग चौधरीके नाम मुछल रहे । उ मेरिक संलग्न कञ्चनपुरके कृष्णपुर नगरपालिका–८ के सुशीला खड्कासहितके कुछ व्यक्तिहे पक्राउ कैके प्रहरी अनुसन्धान करटि बा ।
नाउपाके तत्कालीन उद्योग पर्यटन वन तथा वातावरण मन्त्री लक्ष्मणकिशोर चौधरी दिगो वन व्यवस्थापन कार्यविधिमे बनैना आर्थिक लेनदेन करना योजना बनाके प्रकरणमे मुछलपाछे पदसे राजीनामा डेले रहैं । ओकरवाद नाउपा रामेश्वर चौधरीहे पठैले रहे ।
