धनगढी उपमहानगरपालिका पूर्ण खोप सुनिश्चितता तथा दिगोपना घोषणा

पहुरा समाचारदाता
धनगढी, २२ असार । कैलालीके धनगढी उपमहानगरपालिकाहे पूर्ण खोप पालिका सुनिश्चितता तथा दिगोपना घोषणा करल बा ।

अँटवारके रोज एक कार्यक्रम करके उपमहानगरहे पूर्ण खोप पालिका तथा दिगोपना घोषणा करल हो । २०८१ फागुनसे २०८२ बैशाखसम करल घरधुरी सर्वेक्षणके नतिजाके आधारमे पूर्ण खोप सुनिश्चितता तथा दिगोपना घोषणा करल स्वास्थ्य शाखा प्रमुख योगेश अवस्थी बटैलै ।

घर धुरी सर्वेक्षण करेबेर धनगढी उपमहानगरपालिका भिटर १६ से ५९ महिनासमके बालबालिका संख्या ८ हजार २१० रहलमे यी मध्ये कौनोफे खोप नैलगाइल बालबालिका ५ ओ ड्रप आउट हुइल ५९ जनहनहे १५ महिनासमके उमेरभिटर पाई पर्ना सक्कु खोप लगाके पूर्ण खोप सुनिश्चितता ओ दिगोपना घोषणा करल शाखा प्रमुख अवस्थी बटैलै । सक्कु बालबालिकासे खोप पाइल सुनिश्चितता करलपाछे प्रत्येक वडाहे पूर्ण खोप सुनिश्चतता ओ दिगोपना प्रमाण पत्र प्रदान करल रहे ।

कार्यक्रममे नगर प्रमुख गोपाल हमाल, नगर उपप्रमुख कन्दकला राना, जिल्ला समन्वय समितिके सभापति टिकाकुमारी चौधरी भुल, वडाहुक्रे, कार्यपालिका सदस्य, वडा सदस्यलगायत उपमहानगरपालिकाके टमान शाखाके प्रमुख, स्वास्थ्यकर्मी, महिला स्वास्थ्य स्वयं सेविकाहुकनके सहभागिता रहे ।