आदिवासी जनजाती संस्थाके कार्यालय व्यवस्थापन तालिम

पहुरा समाचारदाता
धनगढी, २३ असार । आदिवासी जनजाती संस्थाके कार्यालय व्यवस्थापन सम्बन्धी एक दिने तालिम अँटवारके रोज धनगढीमे सम्पन्न हुइल बा ।

आदिवासी जनजाति उत्थान राष्ट्रिय प्रतिष्ठानके आयोजक तथा नेपाल आदिवासी जनजाति महासंघ सुदूरपश्चिम प्रदेश समन्वय परिषदके संयोजन सुदूरपश्चिम प्रदेशमे रहल आदिवासी जनजाती संस्थाके कार्यालय व्यवस्थापन तालिम हुइल हो ।

आदिवासी जनजाति उत्थान राष्ट्रिय प्रतिष्ठानके केन्द्रीय उपाध्यक्ष रेशम गुरूङके अध्यक्षतामे हुइल कार्यक्रममे प्रतिष्ठानके शाखा अधिकृत हितकाजी गुरुङ प्रतिष्ठानके परिचय, आदिवासी जनजाती संस्थाके कार्यालय व्यवस्थापन ओ आदिवासी जनजातीके अमूर्त सांस्कृतिक सम्पदा बस्तु विवरण सूचिकरण विषयक प्रस्तुतीकरण करल रहिट ।

सुदूरपश्चिम प्रदेशके कैलाली, कञ्चनपुर, डोटीलगायत टमान जिल्लासे सहभागी आदिवासी जनजाती अगुवाहुक्रे आदिवासी जनजातीहुकनके अवस्था, आदिवासी जनजाती समुदायके संचालन कार्यालय करल कार्यालयके अवस्थाबारे जानकारी डेहल रहिट ।

२०७८ सालके जनगनणा अनुसार नेपाल भर आदिवासी जनजाती समुुदायके कुल जनसंख्या १ करोड ६४ लाख ४३० रहल बा । कार्यक्रमके संचालन नेपाल आदिवासी जनजाति महासंघ सुदूरपश्चिम प्रदेश समन्वय परिषदके अध्यक्ष दलबहादुर घर्तीमगर करल रहिट ।