सीप सिखके जानकारी लेके केल्ह वैदेशिक रोजगारीमे जाई: गाउँपालिका उपाध्यक्ष भगवती

पहुरा समाचारदाता
धनगढी, २४ असार । सुरक्षित आप्रवासन सामीमे आयोजनामे कैलारीमे स्थानीय जनप्रतिनिधि, विषयगत समिति संयोजकहुकनसे मंगरके रोज हसुलियामे अन्तरक्रिया कार्यक्रम कैगिल बा ।

कैलारी गाउँपालिका उपाध्यक्ष भगवतीकुमारी चौधरीके अध्यक्षतामे हुइल कार्यक्रममे सम्बोधन करटी उहाँ सेकटसम अपने स्वदेशमे रोजगारी कैना जाई परलेसे सीप सिखके सक्कु जानकारी लेके केल्ह वैदेशिक रोजगारीमे जैना आगह्र करली ।
उहाँ कहली, ‘अब्बे स्वदेशमे रोजगारी नैमिलठ कना आममनैनके गलत धारणाके विकास हुइल बा, करे सेक्लेसे अपने देशमे प्रसष्ट काम रहल बा । इच्छा हुइलेसे उपाय जहाँसेफे निकरजैना हो ।’

कैलारी गाउँपालिकासे यहाँके यूवाहुकनके अपने गाउँठाउमे रोजगारी पाइट कहिके टमान सीपमुलक आयमुलक तालिमके आयोजना करटी आइल उहाँ बटैैली । यहाँके यूवा ठोरचे पैसाके लालचमे वैदेशिक रोजगारीमे जैना ओ ढेर यूवा बाकसमे प्याक हुके आइल डेखगैल बा ।

कार्यक्रममे सुरक्षित आप्रवासन सामी कार्यक्रमके जिल्ला संयोजक विष्णु प्रसाद चौधरी वैदेशिक रोजगारीके परिवेश ओ सामी कार्यक्रमबारे जानकारी, आप्रवासी स्रोत केन्द्रसे वैदेशिक रोजगारीके समस्यामे करल प्रसासबारे प्रस्तुतीकरण करल रहिट ।
देशभरसे प्रतिवर्ष करिब ५ लाखसे श्रमशक्ति श्रम बजारमे प्रवेश कैना करल बटैलै । मुलुकमे सीमित रोजगारीके अवसर, गरिबी लगायतके कारण वैदेशिक रोजगारीप्रति आकर्षित, नेपाले श्रम स्वीकृत लेके वैदेशिक रोजगारमे जउइयाके संख्या ८३ लाख नाघसेकल बा । हाल दैनिक सरदर २३०० जाने वैदेशिक रोजगार जैना करल बटै । आ.ब. २०८०÷८१ मे श्रम स्वीकृति (पुनः श्रम स्वीकृति समेत) प्रदान करल संख्या ७ लाख ४१ हजार २९७ रहल बटै ।

ओम्ने कुल पुरुष ६ लाख ६१ हजार १२५ ओ ८० हजार १७२ जाने श्रम स्वीकृती नैलेके वैदेशिक रोजगारमे जउइयाके संख्याफे उल्लेख्य करल बा । मख्य गन्तव्य (१० देश)ः संयुक्त अरब इमिरेट्स, साउदी अरेविया, कतार, मलेसिया, कुवेत, क्रोसिया, रोमानीया, जापान, द.कोरिया, बहराइन रहल बा । वैदेशिक रोजगारके लाग खुल्ला करल देश १११ ठो (नम्मा समयसे रोक्का करल देश अफगानिस्तान, लिविया ओ ईराक) (रसिया ओ युक्रेन ) रहल उहाँ जनैलै ।

आ.व.२०८०÷८१ मे बिप्रेषण आप्रवाह १६.५ प्रतिशतसे बृद्धि हुके रू १४ खर्व ४५ अर्व ३२ करोड (२५.३प्रतिशत कुल जिडिपीमे हिस्सा ) पुगल बा । आ.व.२०८०।८१ मे वैदेशिक रोजगारीमे मृत्यु हुइल कामदारके हकवालाहे आर्थिक सहायताः पुरूष १३०५, महिला ४१, जम्मा १३४६ (सुदुरपश्चिम प्रदेशके ३१ जाने) रहल बटै ।

आ.व.२०८०।८१ मे बैदेशिक रोजगारीके क्रममे बिरामी एवं अंगभंग हुइल कामदारहे स्वास्थ्य उपचार खर्च ः पुरूष ६१७, महिला ३६, जम्मा ६५३ (सुदुरपश्चिम प्रदेशके २६ जाने ) रहल बटै ।

ओस्टेक करके वैदेशिक रोजगारीके नीति एवम कानूनी व्यवस्था ओ स्थानीय सरकारके भूमिकाबारे गाउँपालिकाके सामाजिक विकास शाखा प्रमुख यगम कलेल प्रस्तुतीकरण करल रहिट । कार्यक्रममे उहाँ वैदेशिक रोजगारीमे जैना आघे उ देशके कानूनबारे समान्य जानकारी लेके केल्ह जैना आग्रह करलै । वैदेशिक रोजगारी गैलसे विप्रेशन आइठ मने ओकर काम कटरा लागठ मुल्याङकन कैना जरुरी रहल बटैै ।

कैलारी गाउँपालिका रोजगार शाखाके प्रमुख निता भण्डारी कैलारीसे अब्बेसम १२ जाने श्रम स्वीकृति लेहल बटैलै । कार्यक्रममे कैलारी गाउँपालिका रोजगार शाखाके मनोसामाजिक परामर्शकर्ता मन्जिला चौधरी कार्यक्रमके उद्देश्य तथा स्वागत मन्तव्य राखल रहिट । कार्यक्रम वैदेशिक रोजगारके वर्तमान अवस्था बारेमे छलफल करके वैदेशिक रोजगारके सवालमे साझा बुझाई निर्माण कैना, स्थानीय तहके नीति, कार्य योजना ओ योजना तर्जुमा वैदेशिक रोजगारके क्षेत्र सम्बोधन कैना, विषयगत समितिके संयोजकसे वैदेशिक रोजगारके क्षेत्रमे सहकार्यके लाग सम्भावनाके पहिचान कैना अभिमुखीकरण करल बटैली ।

कार्यक्रममे स्थानीय जनप्रतिनिधि, विषयगत समितिके संयोजक, स्वास्थ्य शाखा, योजना शाखा, रोजगार शाखा संयोजक, महिला तथा बालबालिका शाखा प्रमुखलगागत सहभागिता रहे ।