सडक स्तरोन्नतिसे फेरजैटी धनगढीके स्वरुप

पहुरा समाचारदाता
धनगढी, २५ असार । पाछेक बरस सडक पूर्वाधार स्तरोन्नति होके धनगढी सहरके स्वरूप फेरे लागल बावै । सुदूरपश्चिम प्रदेशके अस्थायी राजधानी धनगढीके मुख्य ओ शाखा सडक स्तरोन्नति पूरा हुइना चरणमे बा ।

व्यवस्थित एवं आकर्षक सहरके रूपमे विकास कैना क्षेत्रीय सहरी विकास आयोजनाअन्तर्गत टमान सडकखण्डके करिब १० किलोमिटर सडक पक्की नालीसहित स्तरोन्नति करल बा । एसियाली विकास बैंकके ऋण सहयोगमे सञ्चालित यी आयोजना अन्तर्गत सहिद गेटसे क्याम्पस, गुल्मसे चर्चसमके सडक, मालपोत सडक, मुख्यबजार कैलाली पुलसे ट्राफिक चौराहाके सडक, डिभोटी होटेलसे दाहाल टोलके सडक स्तरोन्नति पूरा हुइल बा ।

सडकके दायाँबायाँ फुटपाथसहित सुरक्षाके लाग फलामे बार लगाइल बा । ओस्टके आयोजनाअन्तर्गत धनगढी उपमहागरपालिका–७ पटेला क्षेत्रमे रु एक अर्ब २५ करोड लागतमे एकीकृत फोहरमैला व्यवस्थापनसम्बन्धी योजना निर्माण आघे बह्रल बा । धनगढी उपमहानगर क्षेत्रबाहेक कैलालीके गोदावरी नगरपालिका कञ्चनपुरके शुक्लाफाँटा ओ भिमदत्त नगरपालिकामे फेन सडक स्तरोेन्नति, सार्वजनिक भवन निर्माण, ढलनिकास, फोहरमैला व्यवस्थापनलगायतके काम हुइटी रहल बा ।

संघीय सहरी विकास तथा भवन कार्यालय धनगढीमार्फत आयोजना कार्यान्वयन हुइटी रहल बा । पञ्चवर्षीय यी आयोजना कार्यान्वयनके लाग धनगढी उपमहानगरपालिका ओ सहरी विकास आयोजनाबीच सम्झौता हुइल रहे । प्रदेश सरकारके बजेटसे मुख्य बजार क्षेत्रके कैलाली पुलसे क्याम्पस चोकसमके सडक स्तरोन्नति हुइटी रहल बा ।  । सहरी विकास मन्त्रालय, नेपाल विद्युत् प्राधिकरण ओ धनगढी उपमहानगरपालिकाके संयुक्त पहलमे टमान सडकखण्डमे ‘स्मार्ट स्ट्रिट लाइट,’ ‘हाइमास्ट लाइट,’ ‘फ्लड लाइट’ ओ ‘स्ट्रिपलाइट’ जडान करल बा । सडक बत्ती जडानसँगे ‘ओजरार धनगढी’ बनल बा ।

फूलक बोटबिरुवासहितके हरियाली, सडक दायाँबायाँ फुटपाथ निर्माण ओ जडान हुइल रंगीविरंगी बत्तीसे रातके झिलिमिली हुइना हुइल बावै । झिलिमिली बत्तीमे साँझके टिकटक बनुइया ओ तस्बिर लेहुइयाके समूह डेखजैठै । ‘ओजरार धनगढी अभियान’ अन्तर्गत उपमहानगरके सक्कु वडामे बत्ती जडान कैना उपमहानगरपालिकाके इञ्जिनियर अशोक अवस्थी बटैलै । सघन सहरी विकास कार्यक्रमअन्तर्गत बेहडी ओ तारानगरके सडक स्तरोन्नति हुइटी रहल बा कलेसे धनगढी गाउँसे बेली गाउँसमके सडकके साथे हसनपुरके सडक स्तरोन्नतिके लाग ठेक्का आह्वान हुइल बा । पार्क मोडमे ‘सपिङ कम्प्लेक्स’ निर्माण हुइटी रहल बा ।

ओस्टके मोहना पुलसे गोदावरी नगरपालिकाके अत्तरिया चोकसम १४.२ किलोमिटर सडक स्तरोन्नति पूरा हुइल बा । मोहनापुलसे गेटा खण्डसम ‘छ लेन’, गेटासे मनोहरा पुलसम ‘चार लेन’ ओ मनोहरा पुलसे अत्तरिया चोकसम ‘आठ लेन’ सडक निर्माण एवं स्तरोन्नति पूरा होसेकल सडक डिभिजन कार्यालय जनैले बा । सडक स्तरोन्नति एवं निर्माण लागत एक अर्ब ७८ करोड रहल बाु, कार्यालयके इञ्जिनियर सन्तोष चन्द कहलै, निर्माणाधीन मनोहरा खोला ओ मोहनामे पुलके लाग बजेट अभाव हुइल बा । सडकखण्डके बीच भागमे बनाइल ‘मिडियन’मा फूलक बोटबिरुवा लगाइल बा । सडकके दायाँबायाँ दुई मिटर चौडा ‘फुटपाथ’ निर्माण करल बा । विसं २०७७ मे निर्माण सम्झौता हुइल सडक कुल एक अर्ब ७६ करोडके लागतमे निर्माण पूरा हुइल हो । अयोजनाअन्तर्गत गेटा खण्डके मनहरा खोलुवा ओ धनगढीके मोहना लडियामे पुल निर्माणाधीन बा ।

बिनायोजना सहरके रूपमे विकास हुइटी गैल धनगढीमे बर्सेनि ढेर संख्यामे घर संरचना निर्माण हुइटी रहलसँगे सामान्य वर्षा हुइलेसे जम्ना पानीके उचित निकासके व्यवस्था नैहोके नगरवासीसे डुबानके समस्या भोग्टी आइल बटै । उपमहानगर क्षेत्रमे खुटिया लडिया ओ मोहना लडियाके कटानके समस्या बा । उपमहानगरपालिकासे एक बरससे सहरी क्षेत्रमे दैनिक जम्मा हुइना फोहरमैलाके निजी क्षेत्रमार्फत व्यवस्थापन करल बा । सहरी क्षेत्रमे विकास पूर्वाधार जुट्टी रलेसे फेन ग्रामीण क्षेत्रके कतिपय वडाके बासिन्दा आभिन उचित सडक, स्वच्छ खानेपानी जैसिन आधारभूत सुविधासे वञ्चित रहल बटै ।

उपलब्ध साधनस्रोतसे उपमहानगरपालिका कार्यालयमार्फत हुइना करल कतिपय विकास निर्माणके काम शक्ति ओ पहुँचवालाके वडामे किल केन्द्रित कैना करल ओरसे विकासके प्रतिफल पाइ नैसेकल गुनासो नगरवासीके रहल बा । विसं २०३३ मे स्थापना हुइल धनगढी नगरपालिकाहे कुछ बरस आघे साविकके बेलादेवीपुर, फूलवारी ओ उर्मा गाविसके साथे गेटा गाविसके कुछ वडाहे समेत समेटके उपमहानगरपालिका बनाइल रहे । स्थानीयवासी यज्ञराज भट्ट सडक स्तरोन्नतिसँगे बल्ना झिलिमिली बत्तीसे धनगढीके स्वरूप फेरल बटैलै । उहाँ कहलै, धनगढी आब पहिलेक जस्टे कुरूप एवं फोहोर सहर नैहो ।
धनगढीहे सुन्दर ओ हराभरा सहर बनाइक लाग उपमहानगरपालिका कार्यालयसे ‘हरियाली धनगढी अभियान’ अन्तर्गत सार्वजनिक सडक तथा स्थानमे वृक्षरोपण कैटी आइल बा ।