लागु औषध ओ सामान तस्कारी रोक्न समन्वय आवश्यक

पहुरा समाचारदाता
धनगढी, २६ असार । लागु औषध ओ सीमा क्षेत्रसे हुइना सामान तस्कारी रोक्ना सुरक्षा निकाय, स्थानीय सरकार ओ जनसमुदायके समन्वय आवश्यक रहल कैलालीके प्रमुख जिल्ला अधिकारी गोगन हमाल बटैले बटै ।

समुदाय–प्रहरी साझेदारी कार्यक्रम अन्र्तगत जिल्ला प्रहरी कार्यालय कैलालीके आयोजनामे लागु औषध, शान्ति सुरक्षा लगायत विषयबस्तु उप्पर कैलारीके हसुलियामे हुइल अन्तरक्रिया कार्यक्रममे प्रमुख जिल्ला अधिकारी हमाल उ बाट बत्वाइल रहिट ।
जिल्ला प्रहरी कार्यालय कैलालीके गैल बर्षके तुलनामे यी बरस काम सन्तोषजनक हुइल बा, उहाँ कहलै, ‘लागु ओषध नियन्त्रण, भन्सार छलि नियन्त्रण सन्र्दभके ढेर प्रगती हुइल बा । लागु औषध नियन्त्रण प्रहरीके केल्ह नैहोके यकर नियन्त्रण कैना सक्कु जानेक काम हो । नियन्त्रण कैना सबसे ढेर डाई बाबाके हो । छावा छाईके का करटै । कहाँ जाइटै किहीसे भेट करटै ध्यान डेना जरुरी बा ।

उहाँ कहलै, जिल्ला प्रहरी कार्यालय कैलाली लागु औषध नियन्त्रण कैना कार्यविधि बनाके कार्यान्वयनमे जाइटा । यिहीहे कार्यान्वयन कैना वडा वडामे अभियानके रुपमे जाई पर्ना बा ।

लागु औषध नियन्त्रण कैना अभियानके रुपमे लैजैना ओ यूवाहुकनके उत्पादनशिल कामसे जोरना जरुरी बा, प्रजिअ हमाल कहलै । प्रहरीहुकनहे इमान्दारीपूर्वक काम कैना आग्रहफे करलै । सीमा क्षेत्रके जनता अनाहक पाइल दुःखके बारेमे दुई देशके अधिकारीके बैठकमे बाट रख्ना उहाँ बटैलै ।

सुदूरपश्चिम प्रदेश प्रहरी प्रमुख प्रहरी नायव महानिरिक्षक डम्बर बहादुर विक सीमा सुरक्षाके बल्गर स्तम्भ कलेक प्रहरी रहल बटैलै । प्रहरी इमान्दार बन्ना जरुरी बा, उहाँ कहलै, ‘नागरिकके समस्यामे आत्मसात कैना जरुरी बा । प्रहरीके कमी कम्जोरी बा कलेसे उहीहे सच्याके आघे बह्रलेसे जनता गुनासो नैकरही । प्रहरीहुक्रे जनतासे आँखीमे आँखी जुधाके सेवा प्रदान कैना प्रहरी चाहल हो ।

प्रदेश प्रहरी प्रमुख विक कहलै, जनता मोरथेन गुनासो करठै । मै उहीहे लिपिवद्ध करके धरले बटु । महीहे बल्गर प्रहरी चाहल नैहो, महीहे सम्राट प्रहरी चाहल नैहो । महीहे जनता समस्यामे परल बटै कलेसे हातेमालो करके आघे बह्रना प्रहरी चाहल हो ।
आचारण विपरित काम कैना, तस्कारहुकनसे संलग्ना हुइलेसे, गुण्डासे मिल्ना प्रहरीहे नैछोरना चेतावनीफे डेलै । लागु औषध दुव्र्यशनीके समस्या भयवाह अवस्थामे बा, हिरासात, कारागारामे रहल हुकनके अवस्था हेरलेसे ओस्टे पत्ता चलजाइठ । सीमा प्रहरीहुकनहे गस्ती बह्रैनाफे उहाँ निर्देशन डेलै ।

कैलारी गाउँपालिकाके अध्यक्ष राजसमझ चौधरी यी पालिका डुबान, पटानके जोखिम रहल बटैलै । कैलारी दुधुवा नेशनल पार्कसे जोरसे कारण वहाँसे अइना जंगली जनावरके कारण प्रत्येक बर्ष किसान पीडित हुइल अवस्था बा ।

कैलारीमे थारु समुदायके बसोबास बा, यहाँके करिब ८५ प्रतिशत जनता कृषिमे निर्भर बटै । सरकारसे मल उपलब्ध कराइल कलेसे ठिक बा नैकी किसानहुकन कैसिक उपलब्ध कराईपर्ना हो यहाँहुक्रे ध्यान डैडेना आग्रह करलै । छोटी भन्सार नैहोके यहाँके जनता, व्यवसायीह्ुक्रे मारमे परल गाउँपालिका अध्यक्ष बटैलै ।

कैलारी गाउँपालिका वडा नम्बर ४ के वडा अध्यक्ष ठागुराम चौधरी लागु औषधके कारण छोट छोट लर्काफे फस्टी रहल बटैलै । थारु समुदायके सीमा पार मच्छी मारेगैल बेला आनश्यक दुःख पाइल बटैलै ।

धनगढी उपमहानगरपालिका–१९ के वडा अध्यक्ष बाँधुराम चौधरी पहिलेक तुल्नामे अब्बे सुरक्षाके अनुभूति हुइल मने बहुलिया प्रहरी चौकीमे दरबन्दी अनुसार प्रहरी नैहोके सुरक्षा चुनौती ठपल बटैलै । वडा नम्बर १४ नुक्लीपुरमे पहिले छोटी भन्सार रहलमे फेरसे पुनःस्थापना कैना उहाँ माग करलै ।

कैलारी गाउँपालिका–७ के वडा अध्यक्ष दिपेन्द्रबहादुर बम प्रहरी जनताके संघरीया कहल ओरसे समन्वय करके जैना जरुरी रहल बटैलै । सरकारसे किसानहुकनके मल उपलब्ध कराई नैसेकल ओरसे किसानहे चाहल एक दुई कटट मल उपलब्ध कराडेलेसे मजा हुइना उहाँ आग्रह करलै । कक्षा ६ मे पह्रना विद्यार्थी लागु औषधमे फसल ओरसे यकर अवस्था नाजुक रहल उहाँ बटैलै । कैलारी–७ एक गाउँ मोहना पारी रहल ओरसे उहाँके किसानहे् दुई देशके प्रहरीसे ज्यादती खेपे परल उहाँ बटैलै ।

कैलारी–६ के वडा अध्यक्ष प्रेमबहादुर चौधरी इप्रका हसुलियाके जनशक्ति कम हुके पालिका भर सहजे सुरक्षा डेना समस्या हुइल बटैलै । उहाँ कहलै, वडा ६ ओ ८ मे प्रहरी उपस्थिति न्यून होके लागु औषधसहित चोरी तस्कारी बह्रल बा ।

कैलारी–५ के वडा अध्यक्ष विष्णु प्रसाद चौधरी इप्रका हसुलिया ओ पालिका चौकी वडा नम्बर ५ मे रहल बटैलै । उहाँ कहलै, पालिका प्रहरी चौकीसंगे सशस्त्र प्रहरी वलफे खासे दुर नैहो पालिका प्रहरी चौकी वडा नम्बर ६ या ८ मे सरे सेक्लेसे उ ठाउँमे प्रहरी सक्रिया बह्राई सेक्जाई ।

कैलारी–३ के वडा अध्यक्ष सन्तराम चौधरी यी वडाके दुई गाउँ मोहना पारी रहल ओरसे उ गाउँमे चोरीके घटना बह्रना ओ भारतिय जमदारके दुःद पाइल बटैलै ।

धनगढी–१०के वडा अध्यक्ष शिवराज राना भारतसे लागु औषध ओसारपसारहे रोक्ना गस्ती बह्रैना आग्रह करलै । कृषि कार्यके लाग किसानसे चाहल सामाग्रीमे सहजुल बनाडेना आग्रह करलै ।

समाजसेवी मनिराम चौधरी सक्कु जाने सहकार्य करलेसे मजा काम करे सेक्ना बटैलै । यहाँसे चन्दनचौकी जाईबेर मोटरसाइलक लैजाई नैपैना मने भारतीयहुक्रे ल्यान्टी रहल बटैलै । कैलारीमे भौगोलिक ओ जनसंख्याके तुल्नामे इप्रका हसुलियामे प्रहरी दरबन्दी न्यून रहल ओ खोनपुरमे छोटी भन्सार पुनःस्थापना कैना जरुरी रहल बटैलै । कार्यक्रममे जिल्ला प्रहरी कार्यालय कैलारी वरिष्ठ प्रहरी निरक्षिक दर्शन खडका जिल्ला प्रहरी कार्यालय कैलालीसे गैल बरस ओ यी बरसके अब्बेसम करल प्रगतीबारे प्रस्तुतीकरण करल रहिट ।

कार्यक्रममे कैलारी गाउँपालिका उपाध्यक्ष भगवतीकुमारी चौधरी, जिल्ला प्रहरी कार्यालय कैलालीके प्रमुख प्रहरी उपरिक्षक बाल नरसिंह रानालगायत कैलालीके सीमा प्रहरी चौकीके प्रमुखहुकनके सहभागिता रहे ।