धनगढीके सामुदायिक ओ संस्थागत विद्यालय सम्मानित
पहुरा समाचारदाता
धनगढी, २७ असार । धनगढी उपमहानगरपालिकासे एसईईके नतिजामे सुधार करल कहटी सामुदायिक विद्यालयहुकनहे सम्मान करले बा ।
धनगढी उपमहानगरपालिकासे औपचारिक कार्यक्रम आयोजना करके परीक्षामे सहभागी हुइल २६ सामुदायिक विद्यालयके प्रधानाध्यापकहुकनहे सम्मान करल हो ।
सम्मान कार्यक्रममे सामुदायिक विद्यालयसे ४ जिपिए ल्यन्ना त्रिभुवन माध्यमिक विद्यालयके छात्र अशोक अवस्थीहे समेत सम्मान करल बा । उप–प्रमुख कन्दकलाकुमारी राना प्रधानाध्यापक ओ छात्र अवस्थीहे माला घलाके सम्मान करल हुइट ।
धनगढीके सामुदायिक विद्यालयके २०८० के एसईईमे २६ दशमलव ९७ प्रतिशत उत्तीर्ण हुइल रहिट कलेसे २०८१ के नतिजा सुधार करटी ५४ दशमलव ७४ प्रतिशत विद्यार्थी उत्तीर्ण हुइल उपमहानगरपालिका जनैले बा ।
सम्मान कार्यक्रममे सत प्रतिशत नतिजा हासिल कैना सफल धनगढी–१४ के सर्वोदय माध्यमिक विद्यालय, ९३ दशमलव ५ प्रतिशत नतिजा ल्यन्ना धनगढी–५ हसनपुरके पञ्चोदय माध्यमिक विद्यालय ओ ७८ दशमलव ९५ प्रतिशत विद्यार्थी उत्तीर्ण हुइल धनगढी–३ के त्रिभुवन माध्यमिक विद्यालयहे सम्मान करल हो ।
धनगढीके २६ सामुदायिक विद्यालय मध्ये २३ विद्यालय गैल वर्षके तुलनामे नतिजामे व्यापक सुधार करल उपमहानगरपालिका जनैले बा ।
ओस्टेक धनगढी उपमहानगरपालिकासे औपचारिक कार्यक्रम करके नगरके ४६ ठो संस्थागत विद्यालयहेफे सम्मान करले बा । २०८१ के एसईईके नतिजामे सुधार करल कहटी संस्थागत विद्यालयहे सम्मानित करल उप– प्रमुख कन्दकला कुमारी राना बटैली । उप–प्रमुख रानासे उत्कृष्ट नतिजा ल्यन्ना सफल विद्यालयहे बधाई तथा शुभकामना डेले बटी । “शैक्षिक उपलब्धी महत्वपूर्ण विकासके सूचक हो । मेहनत करके प्रतिस्पर्धाके माध्यमसे उत्कृष्टता हासिल करलमे सक्कु विद्यालयहे शुभकामना बा,“ उहाँ कहली ।
संस्थागतओर सात विद्यालयके सत प्रतिशत नतिजा
धनगढीके ४६ संस्थागत विद्यालय २०८१ के एसईईमे सहभागी हुइल रहिट । परीक्षामे सात संस्थागत विद्यालयसे सत प्रतिशत विद्यार्थी उत्तीर्ण हुइल बटै ।
धनगढी–८ क्याम्पस रोडके थ्री स्टार्स अङ्ग्रेजी आवासीय माध्यमिक विद्यालय, धनगढी–८ कान्तिपुर टोलके डिस्कभरी अङ्ग्रेजी आवासीय विद्यालय, धनगढी–४ उत्तरबेहडीके गुरूकूल अँग्रेजी आवासीय माध्यमिक विद्यालय, धनगढी–१३ के किङ्गफिसर अँग्रेजी आवासीय माध्यमिक विद्यालय, धनगढी–५ हसनपुरके वाल्मीकि अँग्रेजी माध्यमिक विद्यालय, धनगढी–३ विशालनगरके सिटी स्कुल ओ धनगढी–७ देवहरियाके साइपाल शिक्षा सदनसे सतप्रतिशत नतिजा हासिल करल हुइट ।
धनगढीके संस्थागत विद्यालयसे २०८० के एसईईमे ६८ दशमलव ३७ प्रतिशत विद्यार्थी उत्तीर्ण हुइल रहिट । २०८१ मे नतिजामे थप सुधार करटी ८७ दशमलव ४६ प्रतिशत विद्यार्थी उत्तीर्ण हुइल उपमहानगरपालिका जनैले बा ।
२०८१ के एसईईमे धनगढीके चार जाने विद्यार्थी ४ जिपिए ग्रेड हासिल करले बटै । सामुदायिक विद्यालयओर धनगढी–३ बोराडाँडीके अशोक अवस्थी ४ जिपिए ल्यानल हुइल कलेसे संस्थागतओर एरिष्टो माध्यमिक विद्यालयके गौरव उपाध्याय ओ प्रदिप गिरी तथा धनगढी–२ बैयाँबेहडीके जेसिस एभरेष्ट माध्यमिक विद्यालयके छात्र जस्टिन चन्द ४ जिपिए हासिल करल हुइट ।
