कैलारीके बालिका तथा समावेशी शिक्षा संजालके बैठक सम्पन्न

पहुरा समाचारदाता
हसुलिया, २७ असार । कैलारी गाउँपालिकाके बालिका तथा समावेशी शिक्षा संजालके बैठक सम्पन्न हुइल बा ।

बालिका तथा समावेशी शिक्षा संजालके संयोजक तथा गाउँपालिका उपाध्यक्ष भगवतीकुमारी चौधरीके अध्यक्षतामे हुइल कार्यक्रममे बालिका तथा समावेशी शिक्षा संजालके हाल सम्मके समिक्षा, बजेट विनियोजन, स्थानीय शिक्षा योजना, तथ्याङक संकलन, विद्यालयके रिपोटिङ, कार्ययोजना, गुनासो सुनुवाई, भर्ना अभियानबारे छलफल हुइल रहे ।

छलफलमे विद्यालयसे एसआइपी सम्बन्धी काम करटी रहल, विद्यालयके बालिका तथा समावेशी शिक्षा संजाल गठन हुइल, पालिका स्तरीय बालिका तथा समावेशी शिक्षा संजालके रणनीति उप्पर पालिकामे टमान समितिमे छलफल हुसेकल जनागिल बा ।
ढेर विद्यालयमे लैङिक सम्पर्क व्यक्ति तोकल कुुछमे बाँकी रहल ओरसे ओकर लाग समन्वय हुइटी, गाउँपालिकाके शिक्षा योजना निर्माण हुसेकल ओ वेवसाइटमे रख्ना प्रक्रियामे रहल जनागिल बा ।

छलफलमे इआइइएनके लाग यिहे शिर्षकमे बजेट तोक्के छुटयाइल नैहो मने आवश्यक परल बेला खर्च कैना निर्णय कैगिल बा । पालिकाके १० बर्षे शिक्षा योजना निर्माण हुसेकल ओरसे उ बारे जानकारी सक्कु जनहनहे जनैना ओ विद्यालयहेफे यिहे आधारमे पाठयक्रमके आधारमे एसआइपी अध्यवाधिक कैना निर्णय कैगिल बा ।

पलिका स्तरके विद्यालयमे बालिका तथा समावेशी शिक्षा संजाल सिआरएम, लैङिक सम्पर्क व्यक्ति छनौट हुइल तथ्याङक शिक्षा शाखासे दुसर बैठकमे पेश कैना करके छलफल कैगिल बा । पालिकाभिटर गठन हुइल बालिका तथा समावेशी शिक्षा संजाल, सिआरएम संयन्त्रसे आपन बैठकमे हुइल छलफल तथा पालिकासे कैना सहयोगसहिट प्रतिवेदन यी समितिमे शिक्षा शाखासे पेश कैना निर्णय कैगिल बा ।

कार्यक्रमके सहजीकरण सरिता थापा करल रही । बालिका तथा समावेशी शिक्षा संजालके बैठकमे गाउँपालिका अध्यक्ष राजसमझ चौधरी, प्रमुख प्रशासकीय अधिकृत खगेन्द्रराज जोशी, संजालके सदस्यहुक्रे, सदस्य सचिव गणेश प्रसाद मिश्र, वडा अध्यक्ष, वडा सदस्य, टमान शाखाके प्रमुख, विद्यालयके प्रअहुक्रे, विद्यालय व्यवस्थापन समितिके अध्यक्षहुकनके सहभागिता रहे ।