छाउपडी प्रथा उन्मुलनके लाग अभियान चलैना निर्देशन
पहुरा समाचारदाता
धनगढी,३ सावन । सामाजिक कुरीति छाउपडी प्रथा विरुद्ध जनचेतनामूलक कार्यक्रम सञ्चालन कैना प्रदेशभिटरके सक्कु स्थानीय तह ओ जिल्ला प्रशासन कार्यालयहे निर्देशन डेना निर्णय हुइल बा ।
शनिच्चरके रोज मुख्यमन्त्री तथा मन्त्रीपरिषद्के कार्यालयमे छाउपडी प्रथाजन्य कुरिती उन्मुलन नीति २०७६, अन्तर्गत प्रदेश सुपरिवेक्षण तथा निर्देशन समितिके बैठक समितिके संयोजक सुदुरपश्चिम प्रदेशके मुख्यमन्त्री कमलबहादुर शाहके अध्यक्षतामे हुइल बैठकमे उ निर्णय हुइल हो ।
कञ्चनपुर जिल्लाके कृष्णपुर न.पा.–१, निगालीमे छाउगोठमे सुटल अवस्थामे सपुवक कटाईसे एक जाने महिलाके मृत्यु हुइल भर्खरके घटनाके गाम्भीर्यताहे मध्यनजर करटी छाउगोठके उन्मूलन ओ समाजमे डेखल सामाजिक विभेद एवं छुवाछुतयुक्त व्यवहारके नियमन कार्यहे थप प्रभावकारी ढंगसे आघे बह्रैना तथा सामाजिक कुरीति विरुद्ध जनचेतनामूलक कार्यक्रम सञ्चालन कैना प्रदेशभिटरके सक्कु स्थानीय तह ओ जिल्ला प्रशासन कार्यालयहे निर्देशन डेना निर्णय हुइल बा ।
छाउपडी प्रथाजन्य कुरीति उन्मूलन नीति, २०७६ तथा कार्ययोजनाके प्रभावकारी कार्यान्वयनके सुनिश्चितता कैना प्रदेश, जिल्लास्तरीय ओ स्थानीय तह स्तरीय समितिसे नियमित बैठक कैना ओ नियमित रुपमे आ–अपन कार्यक्षेत्रमे अनुगमन करके सक्रियता बह्रैना जनागिल बा ।
सामाजिक विकास मन्त्रालयसे विद्यालय, समुदाय ओ धार्मिक संघ–संस्था लक्षित प्रदेशस्तरीय वार्षिक कार्ययोजना बनाके छाउपडी प्रथाजन्य कुरीति तथा जातीय विभेद विरुद्ध आवश्यकता अनुसार जनचेतनामूलक कार्यक्रम तथा अभियान सञ्चालन कैना निर्णय हुइल बा ।
