कैलारीमे महिलनसे ढकिया, डालो व बास्केट उत्पादन व्यवसाय सुरु

पहुरा समाचारदाता
धनगढी, ६ सावन । कैलाली जिल्लाके कैलारी गाउँपालिका उद्यम विकास शाखा (मेडपा ) से संचालित ढकिया डालो ओ बास्केट बनैना तालिम पाइल महिलाहुँक्र ढकिया डालो ओ बास्केट उत्पादन व्यवसाय संचालन करले बटै ।
तालिममे सहभागी सप्तरंगी लघु उद्यमी समूहसे छोट उद्यमीहे माया करी, अपन स्थानीय उत्पादनके प्रयोग करी कना नाराके लेके ढकिया डालो ओ बास्केट उत्पादन व्यवसाय संचालन करलक हुइट ।

महिलनसे संचालन कैलक व्यवसायहे कैलारी गाउँपालिकाके उपाध्यक्ष भगवती कुमारी चौधारी मंगरके रोज उदघाटन करल रही । कार्यक्रममे सम्बोधन करटी उहाँ महिलनके लाग सीपमुलक तालिम संचालन कैलक ओ अब्बे उपलब्धी डेखके खुशी लागल बटैली ।
उहाँ कहली, गाउँपालिकासे आयमुलक सीपमुलक ढेर तालिम डेहल बा । तालिम लेहुइयाहुक्रे आपन व्यवसाय सुरु कैलसे ढेर यूवा यिहे ठाउँमे रोजगार बनेसेक्ठै ।

महिलनसे संचालन कैलक ढकिया, डालो व बास्केटकहन गाउँपालिकासे ठप बजारीकरण कैडेना उहाँ बटैली ।
उ व्यवसाय उदघाटन कार्यक्रममे कैलारी गाउँपालिका उद्यम विकास शाखामे कार्यरत उद्यम विकास सहजकर्ता निर्मला चौधरी व सप्तरंगी लघु उद्यमी समूह लगायतके उपस्थित रहे ।
