३१औं विश्व आदिवासी दिवस सप्ताहव्यापी मनैना

पहुरा समाचारदाता
काठमाण्डौं, १९ सावन । नेपाल आदिवासी जनजाति महासंघ (नेफिन)से अगष्ट ९ हे जोड डेटी ३१औं विश्व आदिवासी दिवस सप्ताहव्यापी मनैना हुइल बा ।

नेफिनसे यी वर्ष “प्राकृतिक श्रोत, जल, जमिन ओ जंगल उप्पर आदिवासी जनजातिके अधिकार सुनिश्चित कर, संयुक्त राष्ट संघके एजेन्सी संस्था युएनड्रिप ओ आईएलओ १६९ सम्बन्धी सर्बोच्च अदालतके निर्देशनात्मक आदेश कार्यन्वयन करंं” कना मूल नारा सहित ३१औं विश्व आदिवासी दिवस मनाई लागल हो ।

उ अवसरमे नेफिनसे जातीय भेषभुषा ओ झाँकी सहित पाँच हजारके बृहत र्याली निकर्ना हुइल बा । अँटवार नेफिनसे पत्रकार सम्मेलनके आयोजना करटी अगष्ट ९ अर्थात सावन २४ गतेसे सावन २८ गतेसम सप्ताहव्यापी कार्यक्रम आयोजना हुइना जानकारी डेहल हो ।

विश्वके आदिवासीहुक्रे विगत ३१ वर्षसे मनैटी अइटी रहल अन्तराष्ट्रिय विश्व आदिवासी दिवस नेपालके आदिवासी जनजातीहुक्रेफे विशेष उत्सवके रुपमे मनैटी आइल बटै । नेफिनके अध्यक्ष गेल्जे लामा शेर्पासे आदिवासी जनजातिहुकनके जातीय, भाषीक, साँस्कृतिक तथा धार्मीक पहिचानहे स्थापित कैना, आदिवासीहुकनके मौलिक ज्ञान सीप ओ ओइनके थाकथलोके संरक्षण एवम् प्रवद्र्धन करीं आदिवासीके भूमि ओ प्राकृतिक स्रोत उप्परके अधिकार सुनिश्चित कैना तथा राज्यके हरेक निकायमे समानुपातिक समावेशी सिद्धान्तके आधारमे अर्थपूर्ण ओ सम्मानजनक सहभागिता जनैना मुद्दाहे राष्ट्रिय वा अन्तराष्ट्रिय रुपमे बहस पैरवी कैना महत्वपूर्ण अवसरके रुपमे यिहीहे मनाई लागल बटैलै ।

३१औं विश्व आदिवासी दिवस नेपालमे आदिवासी जनजातीहुकनके उत्सवके रुपमे आयोजना हुइना ओरसे नेपालके आदिवासी जनजातीहुकनके पहिचान झल्कन साँस्कृतिक झाँकी, नृत्य, खानाके परिकारके प्रदर्शन समेत हुइना नेफिनके महासचिव दिवस राई बटैलै ।

उत्सबमे आदिवासी जनजातीहुकनके मातृभाषा ओ लोकभाकामे बनल गीत, साँस्कृतिक झाँकी, स्थानीय ओ रैथाने प्रकृतिके आदिवासी जनजातीय कलाकृति सहितके प्रदर्शनी, टमान जातीय भेषभुषा सहित राजधानीके मध्य भाग भृकुटीमण्डपसे र्याली सुरु हुके टमान स्थान परिक्रमा करके फेरसे प्रदर्शनीमार्गके राष्ट्रिय सभागृहसम आदिवासी जनजातीहुकनके खुला ओ भव्य प्रस्तुतिहे सडकभर गुञ्जयमान बनैना बा ।

नेफिनसे साँस्कृतिक झाँकी सहितके र्याली ११ बजे भृकुटिमण्डपमे जम्मा हुके भद्रकाली, सून्धारा, वीर अस्पताल, रत्नपार्क, पूरानो बसपार्क हुके प्रदर्शनीमार्ग राष्ट्रिय सभागृहके सभाहलमे प्रवेश करके मूल समारोहमे परिणत कैना तयारी करल बा ।
मूल समारोहमे संवैधानिक निकायके प्रमुखहुक्रे, माननीय सांसद, पार्टी प्रतिनिधि, महासंघके पूर्ब प्रमुख, टमान आदिवासी जनजाती विशिष्ट ब्यक्तीत्व, जातीय संस्था ओ सम्बन्धन संगठनके अध्यक्ष लगायत टमान क्षेत्रके आदिवासी जनजाती संघ संस्थासे हजारौके उपस्थिति रना नेफिन बटैले बा ।

बागमतीमे तामाङ ओ नेपाल भाषा (नेवारी) भाषा ओ गण्डकी प्रदेशके सरकारी कामकाजके भाषामे मगर ओ गुरुङ भाषाहे मान्यता डेहल बा । जनजातीहुकनके कला, संस्कृति, पहिचान, भेषभुषा, खानाके परिकारसहितके उत्सब हुइल ओरसे ५ हजारसे ढेरके उपस्थित रना दावी करटी आयोजकसे राष्ट्रिय सभागृह बाहेर समेत कार्यक्रम प्रत्यक्ष प्रसारण कैना तयारी हुइल बटाइल बा ।

नेफिनसे सावन १७ गते आदिवासी जनजाति अपांग महासंघके सम्मेलन, २० गते महिला महासंघके बहस कार्यक्रम, २२ गते आदिवासी जनजाती उत्थान राष्ट्रिय प्रतिष्ठान, एफएओ ओ युनेस्कोके आदिवासीहुकनके मातृभाषा ओ खाद्य सुरक्षा सम्बन्धी अभिमूखिकरण कार्यक्रम तथा उत्सव, २२ गते आदिवासी जनजाती आयोगसे आदिवासी जनजाती ओ एआईवारे कार्यशाला, २३ गते गुरुङ राष्ट्रिय परिषद्के चियापान तथा शुभकामना आदानप्रदान, २४ गते नेफिनके मूल समारोह, २५ गते नेपाल मगर संघके अन्तरकृया, २५ गते युवा महासंघके पैदल यात्रा तथा अन्तरसम्वाद, २५ गते विद्यार्थी महासंघके आदिवासीके भविष्य ओ एआई विषयक अन्तरक्रिया, २६ गते आदिवासी जनजातीहुकनके सवलमे संवाद कार्यक्रम, २७ गते नेपाल आदिवासी जनजाती पत्रकार महासंघ (फोनिज)के २६औं स्थापना दिवस तथा फोनिज अवार्ड ओ २८ गते सुनुवार सेवा समाजके कला साहित्य पुरस्कार वितरण कार्यक्रमलगायतके सूची तयार करल बा ।