भरतके परिवारहे प्रदेश सरकारसे पाँच लाख डेना निर्णय
पहुरा समाचारदाता
धनगढी, २६ सावन । कारागार कार्यालय कैलालीमे सावन २३ गते कैदी बन्दीहुँक्रनबीच हुइल झै–झगडाके घटनामे मृत्यु हुइलक कैदी भरत चौधरीके परिवारहे राहतस्वरुप प्रदेश सरकारसे रु. पाँच लाख आर्थिक सहायता उपलब्ध करैना जनागिल बा ।
सुदूरपश्चिम प्रदेश सरकारसे कारागारलगायतके समग्र आन्तरिक सुरक्षाके विषयमे समन्वयकारी भूमिका निर्वाह कैना सन्दर्भमे माननीय मुख्यमन्त्री कमलबहादुर शाहके उपस्थितिमे सुदूरपश्चिम प्रदेश प्रहरी ऐन, २०७९ के दफा ९१ बमोजिमके प्रदेश सुरक्षा समितिके बैठक बैठके आर्थिक सहायता उपलब्ध निर्णय करल हो ।
सुदूरपश्चिम प्रदेश सुरक्षा समितिके सदस्य सचिव आमोद दाहाल आन्तरिक मामिला तथा कानून मन्त्रालयसे उ निर्णय करल सार्वजनिक विज्ञप्ती जारी कैटी उ जानकारी डेहल हुइट । उ घटनामे हुइल घाहेलके सरकारी खर्चमे उपचार कैना व्यवस्था मिलैना, कारागार भिटर हेलोजन लाइट, सि.सि क्यामरा शिघ्र जडान कैना ओ कारागारके छानालगायतके आवश्यक मर्मत सम्भारके कार्य आन्तरिक मामिला तथा कानून मन्त्रालयसे तत्काल सुरु कैना प्रदेश सुरक्षा समितिक सदस्य सचिव दाहाल जनैलै ।
विज्ञप्ती मार्फत कारागार प्रशासन ओ आन्तरिक मामिला तथा कानुन मन्त्रालयके समन्वयमे कारागार सुरक्षाके लाग तत्काल आवश्यक पर्ना उपकरण तथा साधन व्यवस्थापन कैना, वर्तमान अवस्थामे कारागारमे डेखल सुरक्षा व्यवस्थापन सम्बन्धमे डेखल समस्या समाधानके लाग कारागार ऐनमे आवश्यक सुधारके लाग संघीय सरकारहे अनुरोध कैना उहाँ जनैलै ।
कैलाली कारागार भिटर रहल कैदीबन्दीके संख्या उ कारागारके क्षमतासे झण्डे पाँच गुणा ढेर डेखल (क्षमता १७५ जानेक रहल ओ हालके मितिमे ६९९ कैदीबन्दी रहल ओकर कारण उत्पन्न सुरक्षा चुनौती न्यूनीकरण कैना कारागारके क्षमता अनुसार कैदीबन्दी व्यवस्थापनके लाग कारागार विभागसँग समन्वय कैना सचिव दाहाल जनैलै ।
कारागार भिटर जैना खाद्यान्न टिना तथा अन्य वस्तुके निगरानी ओ चेकजाँच बह्रैना कारागार प्रशासन ओ सुरक्षाकर्मीहुकनहन प्रमुख जिल्ला अधिकारी मार्फत निर्देशन डेना, कैदीबन्दीक संख्यासे हालके कारागारके क्षमता बहुट कम रलक कारण सुरक्षा चुनौती उच्च डेखल सन्दर्भमे कारागारके क्षमता वृद्धि कैना ओ सुविधासम्पन्न कारागारके पूर्वाधार तथा खुला कारागारके अवधारणा कार्यान्वयन करेक लाग संघीय सरकार समक्ष अनुरोध कैना कहल बा ।
प्रदेश सरकार आन्तरिक मामिला तथा कानुन मन्त्रालय ओ कारागार प्रशासनवीच समन्वय करके कारागार भिटर कैदीबन्दीहुकनहे मनोवैज्ञानिक परामर्श ओ सकारात्मक सोच विकास कैना खालके कार्यक्रम सघनरुपमे संचालन कैना ओ कैदीबन्दीके लाग पुस्तकालय सुविधा उपलब्ध करैना कहल बा ।
कारागार सुरक्षार्थ खटना सुरक्षाकर्मीहुकनहे तीन–तीन महिनामे अदली बदली कैना व्यवस्था मिलैना, कारागार कार्यालय, कैलाली लगायतके प्रदेशभिटरके कारागारमे भोजनगृह, स्नानगृह ओ शौचालय निर्माण तथा मर्मत कार्यहे आन्तरिक मामिला तथा कानून मन्त्रालय, सुदूरपश्चिम प्रदेश मार्फत आघे बह्रैना विज्ञप्तीमे जानकारी डेहल बा ।
भरत चौधरीके शव अभिन नैउठल
कारागार कार्यालय कैलालीमे सावन २३ गते राते कैदी बन्दीहुँक्रनबीच हुइल झै–झगडाके घटनामे मृत्यु हुइलक कैदी भरत चौधरीके शव अभिन नैउठल हो । उहाँ शव सेती प्रादेशिक अस्पतालक शव गृहमे धारल बा ।
मृतक भरत चौधरीके डिडी बिभा चौधरी ओ भैया विजय चौधरी घटनाके उचित छानविन नैहुइटसम शव नैउठैना जनैले बटै ।
जिल्ला प्रशासन कार्यालयके प्रशासकीय अधिकृत शिवराज जोशी पीडित परिवारहुकनसँग बार्ता हुइल रहल जनैलै ।
