अवैध रूपमे जडीबुटी तथा औषधी बिक्री वितरणमे रोज
पहुरा समाचारदाता
धनगढी, १२ भदौ । सुदूरपश्चिम प्रदेशके प्रमुख व्यापारिक केन्द्र धनगढी बजारमे अवैध रूपमे जडीबुटी तथा औषधी बिक्री वितरण कैना कार्यहे कडाइके साथ नियन्त्रण कैना स्वास्थ्य कार्यालय कैलालीसे विशेष अभियान सञ्चालन करले बा ।
यी अभियान अन्तर्गत स्वास्थ्य कार्यालयके टोलीसे बजारके टमान स्थानमे अनुगमन करटी अवैध कारोबारमे संलग्नहुकनके कारबाहीके दायरामे ल्यन्ना प्रयास करल बा ।
स्थानीय बासिन्दा तथा उपभोक्ताके स्वास्थ्य सुरक्षा सुनिश्चित कैना यी कदम चालल स्वास्थ्य कार्यालय कैलालीके कार्यालयके प्रमुख रमेश कुँवर बटैलै ।
धनगढी बजार, जिहीहे सुदूरपश्चिमके आर्थिक हबके रूपमे चिन्हजाइठ, यहाँ दैनिक हजारौं मनैनके आवतजावत रहठ । यहाँके सडक किनार, फार्मेसी तथा छोट पसलमे जडीबुटी तथा औषधीजन्य वस्तुके बिक्रीवितरण हुइना करल पाइल बा । मने, यी मध्ये ढेर जैसिन अवैध बटै । स्वास्थ्य कार्यालय कैलालीके अनुसार, यैसिन जडीबुटीमे मुख्यतः आयुर्वेदिक तथा प्राकृतिक औषधिके नाममे बिक्री हुइना वस्तु समावेश करल बा । यिहीसे उपभोक्ताके स्वास्थ्यमे जोखिम बह्रैटी रहल बा ।
स्वास्थ्य कार्यालय कैलालीके प्रमुख रमेश कुँवरके अनुसार, यैसिन अवैध जडीबुटीके सेवनसे गम्भीर स्वास्थ्य समस्या निम्त्यई सेकठ । “यी जडीबुटीमे विषाक्त पदार्थ मिसाइल हुई सेकठ, जिहीसे कर्जा, मिर्गौला तथा पाचन प्रणालीमे असर पारठ” उहाँ कहठै । “हम्रे पछिल्का समयमे धनगढीके टमान सडक सडक पेटी कुछ फार्मेसीमे अनुगमन करके अवैध औषधि तथा जडीबुटी बरामद करल बटैलै । उहाँ कहलै यम्ने आयुर्वेद स्वास्थ्य केन्द्र तथा औषधि व्यवस्था विभागसँगके सहकार्यमे काम हुइटी बा, कुँवर कहलै, “अइना दिनमे यैसिन गतिविधि करुइयाहे कडा कारबाही कैजाई । हम्रे जिल्लाभर यी अभियानहे निरन्तरता डेना बटैलै ।
यी अभियानके क्रममे स्वास्थ्य कार्यालयके टोलीसे धनगढी उपमहानगरपालिकाके वार्ड नम्बर १ लगायतके क्षेत्रमे विशेष निगरानी बह्राइल बा । जिल्ला स्वास्थ्य कार्यालय कैलालीसे यी अभियानहे निरन्तरता डेनाके साथे स्थानीय बासिन्दाहेफे सहयोग कैना आह्वान करले बा ।
कैलाली जिल्लाभिटर कौनोफे स्थानमे यैसिन अवैध बिक्रीवितरण डेख्लेसे फोटो वा प्रमाणसहित जानकारी डेना अनुरोध करल बा । “जनताके सहयोग बिना यी समस्या पूर्ण रूपमे नियन्त्रण कैना कठिन बा,” प्रमुख कुँवर कहलै । “हम्रे यी अभियानहे जिल्लाके सक्कु पालिकामे विस्तार कैना योजना बनैले बटी । अवैध कारोवारीहे कानूनी कारबाही करके स्वास्थ्य सुरक्षाहे प्राथमिकता डेहल स्वास्थ्य कार्यालय प्रमुख कुवंर बटैलै ।
”यी अभियानहे धनगढी बजारमे अवैध जडीबुटी तथा औषधिके कारोबारमे कमी अइना अपेक्षा करल बा । जिल्ला स्वास्थ्य कार्यालयसे अइना दिनमे थप अनुगमन टोली खटैना ओ जनचेतना कार्यक्रम सञ्चालन कैना योजना बनैले बा । यिहीसे कैलाली जिल्लाहे स्वास्थ्य सुरक्षित जिल्लाके रूपमे स्थापित कैना मद्दत पुग्न विश्वास करल बा ।
