भल्मन्साहुकन कानूनी प्रशिक्षण
पहुरा समाचारदाता
धनगढी, १४ भदौ । कैलाली जिल्ला कैलारी गाउँपालिका अन्र्तगतके नौ वडाके भल्मन्साहुकनहे कानूनी प्रशिक्षण डेहल बा ।
थारु कल्याणकारिणी सभा कैलारीके आयोजना तथा लाहुर्निप केन्द्रीय कार्यालयके सहयोगमे शुकके रोज हसुलियामे भल्मन्साहुकनहे सर्वोच्च अदालतक निर्देशनात्मक आदेश कार्यान्वयन सम्बन्धी प्रशिक्षण डेहल हो ।
कैलारी गाउँपालिकाके अध्यक्ष राजसमझ चौधरीके वरका पहुना हुइल कार्यक्रममे विशिष्ट पहुना गाउँपालिका उपाध्यक्ष भगवतीकुमारी चौधरी रहल रहिट । कार्यक्रममे सम्बोधन कैटी वरका पहुना गाउँपालिका अध्यक्ष चौधरी भल्मन्साहुँक्रन कानून ज्ञान नैहोके गाउँघरमे आइल विवाद तथा मुद्दा समाधान कैना समस्या हुइटी आइल बटैलै ।
उहाँ भल्मन्साहुकन आपन अधिकारमे पर्ना विवाद ओ मुद्दा केल्ह मिलैना आग्रह करलै । पहिले पहिले गाउँघरमे भल्मन्सा मार्फत टमान विकासके गतिविधि होए अब्बे भर छोट छोट कामके लागफे स्थानीय तहके असरा लग्ना प्रविधि बटैलै ।
गाउँपालिका उपाध्यक्ष भगवतीकुमारी चौधरी कैलारी पालिकासे भल्मन्सा ऐन संशोधन करल ओ हाली कार्यविधि बनैना जनैली । गाउँघर पहिले बेठबेगारी कर्ना प्रचलन रहे अब्बेफे हेराइल ओरसे आपन गाउँघर सफा सुग्घर बनाइक लाग सरसफाईमे ध्यान डेना आग्रह करली ।
कार्यक्रममे वडा नम्बर ४ के वडा अध्यक्ष, अधिवक्ता जोहरीलाल चौधरी लगायत मन्तव्य राखल रहिट ।
कार्यक्रममे लाहुर्निपक केन्द्रीय अध्यक्ष दिनेश घले सहजीकरण कैटी आइएलओ महासन्धी ओ संविधानमे आदिवासी जनजाती समुदायक हक अधिकारके लाग बनल ऐन कानून ओ व्यवस्थाबारे जानकारी डेहल रहिट ।
प्रशिक्षण कार्यक्रममे पालिका अन्र्तगतक नौ भल्मन्सा, वडाध्यक्षहुँक्र, कार्यपालिका सदस्य, वडा सदस्य, नेपाली काँग्रेसक प्रतिनिधी, नेकपा एमालेक केन्द्रीय सल्लाकार सदस्य होरीलाल चौधरी, नेकपा माओवादी केन्द्र कैलारी गाउँपालिका अध्यक्ष बतासु चौधरी, थारु कल्याण कारिणी सभा कैलारीके पदाधिकारीहुँक्रनके सहभागिता रहे ।
कार्यक्रम थारु कल्याण कारिणी सभा कैलारीके सभापति अशोक चौधरीके अध्यक्षतामे सम्पन्न हुइल रहे । ओस्टेक करके लाहुर्निप केन्द्रीय कार्यालयके सहयोगमे भजनी नगरपालिका, जोशीपुर गाउँपालिका ओ जानकी गाउँपालिकाके भल्मन्सा तथा थारु बुद्धिजीवीहुकनहे प्रशिक्षण डेना जनागिल बा ।
