सुदूरपश्चिममे लगानीमैत्री वातावरण बनैना सरकार तयार ः मुख्यमन्त्री शाह
पहुरा समाचारदाता
धनगढी, १४ भदौ । सुदूरपश्चिम प्रदेशके मुख्यमन्त्री कमलबहादुर शाह लगानीकर्ताहुकनके सुझावअनुसार लगानीमैत्री वातावरण बनैना प्रदेश सरकार तयार रहल बटैले बटै ।
शनिच्चर काठमाडौंमे हिन्दु इकोनोमी फोरमके प्रतिनिधिहुकनसंगके अन्तरक्रिया कार्यक्रममे मुख्यमन्त्री शाह स्वदेशी तथा विदेशी सक्कु लगानीकर्ताहे सुदूरपश्चिममे स्वागत कैना आतुर रहल उल्लेख करटी “अपनेहुक्रे निर्धक्क हुके लगानी करी, हम्रे वातावरण तयार परबी” कहले बटी ।
शाहसे सुदूरपश्चिमहे समस्या केल्ह हुइल क्षेत्र नैठानके सम्भावना भरिपूर्ण प्रदेशके रूपमे हेर्न आग्रह करलै । उहाँ कुछ समयआघे भारत भ्रमणमे भारतीय मुख्यमन्त्रीहुकनसंग सुदूरपश्चिममे लगानी ल्यन्ना विषयमे छलफल हुइल ओ यी बारके लगानी सम्मेलनमे भारतओरसे सकारात्मक संकेत मिल्न विश्वास व्यक्त करलै ।
अन्तरक्रिया कार्यक्रममे हिन्दु इकोनोमी फोरमके प्रतिनिधिहुक्रे धार्मिक पर्यटन क्षेत्रहे प्राथमिकता डेके लगानी ल्यन्ना पहल कैना प्रतिवद्धता जनैलै । नेपाल संयोजक सुरज वैद्यसे सुदूरपश्चिममे ढेर धार्मिक स्थल रहल बटैटी “विश्वभरके हिन्दुहुकनहे नेपालमे लगानी कैना प्रोत्साहित कैबी” कहलै ।
पूर्व राजदूत तथा महासचिव महेश दाहालसे नेपालमे हिन्दुहुकनके चासो उच्च रहल कहटी धार्मिक पर्यटन प्रवद्र्धनमे जोड डेलै । उद्योग वाणिज्य महासंघके पूर्व अध्यक्ष कुशकुमार जोशी ओ पूर्व गभर्नर चिरञ्जीवी नेपाल सुदूरपश्चिमममे पर्याप्त सम्भावना रहल कहटी भारत ओ चीनसँगके ट्रान्जिट तथा भारतीय राज्य उत्तर प्रदेश ओ उत्तराखण्डके लगानीकर्ताहे आकर्षित करेपर्ना सुझाव डेलै ।
कार्यक्रममे नीति तथा योजना आयोगके सदस्य नृप सुनार प्रदेशके सम्भावना ओ अवस्थाबारे कार्यपत्र प्रस्तुत करलै कलेसे परियोजना विज्ञ दिलीप भट्ट अइना अगहन १ ओ २ गते हुइना लगानी तथा विकास सम्मेलनके तयारीबारे जानकारी डेलै ।
