प्रशासनिक भवन ध्वस्तपाछे सेवा प्रवाहमे समस्या

पहुरा समाचारदाता
धनगढी, ३० भदौ । गैल भदौ २३ ओ २४ गते हुइल जेनजी आन्दोलनके क्रममे सार्वजनिक सम्पति सरकारी कार्यालयके प्रशासनिक भवनमे तोडफोडसंगे आगी लगाके ध्वस्त बनाइलपाछे सेवा प्रवाहमे समस्या आइल बा ।

सुदूरपश्चिम प्रदेशके अस्थाई राजधानी समेट रहल धनगढीमे अवस्थित प्रदेश सरकारके मन्त्रालय, सरकारी कार्यालय ओ कैलाली जिल्लाके टमान स्थानीय तहमे जेनजी आन्दोलनके क्रममे आन्दोलनकारीसे प्रशासनिक भवनमे तोडफोड, कार्यालयमे रहल सरसमानमे आगजानी तथा लुटपाट हुइल कारण सेवा प्रवाहमे समस्य आइल हो । अँटवारके रोज जिल्ला प्रशासन कार्यालय, भन्सार कार्यालय ओ जिल्ला अदालत कार्यालयसे आंशिक रुपमे सेवा प्रवाह करलेसेफे कम्प्युर, प्रिन्टर, टेबललगायत इलेक्ट्रिक मेसिन नैहुके सहज रुपमे सेवा प्रवाह कैना समस्या आइल जिल्ला प्रशासन कार्यालय कैलालीके सूचना अधिकारी शिवराज जोशी बटैलै ।

कैलाली जिल्लाके गोदावरी नगरपालिका, गौरीगंगा नगरपालिका, घोडाघोडी नगरपालिका, कैलारी गाउँपालिकाके प्रशासनिक भवन वडा कार्यालय ध्वस्त बनाइलपाछे सेवा प्रवाहमे समस्या आइल हो ।

कैलारी गाउँपालिकाके प्रशासनिक भवनमे रहल कम्प्युटर, प्रिन्टर्स, टेबल, कुर्सी, डराज महत्वपूर्ण समानमे आगजानी करलपाछे सहजे सेवा प्रवाह सूचना अधिकारी यगम कलेल बटैलै । उहाँ कहलै, पालिकाके प्रशासनिक भवनसंगे सक्कु वडा कार्यालयमे तोडफोड आगजानी हुइल बा । अब्बे उ ठाउँसे सेवा प्रवाह कैना समस्या बा । कार्यपालिकाके निर्णय अनुसार जराइल भवनके मर्मत ओ समान नैजुरलसम वडाके सक्कु सेवा पालिकासे डेना कहल बा ।

ओस्टेक करके सोम्मारके रोज कैलारी गाउँपालिकासे सार्वजनिक सूचना जारी करटी सहयोग तथा समन्वयके लाग अपिल करले बा ।

गैल भदौ २४ गतेके दिन जेन जी आन्दोलनके क्रममे कैलारी गाउँपालिकाके प्रशासकीय भवनमे आगजनी तथा वडा कार्यालय जरके ध्वस्त हुइलपाछे गाउँपालिकासे सहयोग तथा समन्वयके लाग अपिल करल हो ।

भवनमे हुइल भौतिक क्षतिके कारण दैनिक प्रशासनिक कामकाज तथा सेवा प्रवाहमे असहजता उत्पन्न हुइल ओरसे कैलारी गाउँपालिका बासी नागरिकहुकनहे सहज रुपमे सेवा प्रवाह करेक लाग स्वच्छिक रुपमे सहयोगके कैडैना गाउँपालिका उपाध्यक्ष राजसमझ चौधरी आग्रह करले बटै ।

उहाँ उद्योगी, व्यापारी, सहकारी, गैर सरकारी संस्था, औद्योगिक प्रतिष्ठान, ईच्छुक व्यक्तिहुकनहे स्वच्छिक रुपमे सहयोग (कम्प्युटर, ल्यापटप, प्रिन्टर, फर्निचर, सूचना प्रविधि उपकरण तथा अन्य मसलन्द) सहयोगके लाग अपिल करल हुइट ।

साथे यी गाउँपालिकाके कार्यालय तथा वडा कार्यालयके सरसामान कौनो व्यक्ति लैगिल हुइलेसे गाउँपालिकामे बुझाई डेनासमेत अनुरोध कैगिल बा ।

वर्तमान परिस्थितिके कारणसे गाउँपालिका तथा वडा कार्यालयसे सुलभ तथा सहज रुपमे सेवा प्रवाह सहज रुपमे उपलब्ध कराई नैसेकलमे कैलारी गाउँपालिका परिवार क्षमाप्रार्थी हुइल अध्यक्ष कहले बटै ।

ओस्टेक करके घोडाघोडी नगरपालिका ओ वडा कार्यालयमे हुइल आगजनी ओ तोडफोडसे सेवा प्रवाहमे समस्या आइल कहटी आन्दोलनके क्रममे कार्यालयके कम्प्युटर, ल्यापटप, प्रिन्टर, स्क्यानर, प्रोजेक्टर, टि.भी., क्यामेरा, कुर्ची, भाडाकुडा, हार्ड डिक्स, विपत व्यवस्थापनके सामग्री लगायतके महत्वपुर्ण कागजात नष्ट हुइल निमित्त प्रमुख प्रशासकीय अधिकृत उमेशराज रेग्मी जनैलै । सोम्मारके रोज सार्वजनिक सूचना जारी करके उहाँ कोई कहु नगरपालिकाके उ सामाग्री डेखल हुइलेसे वा कौनो माध्यमसे आपनसंग रहल हुइलेसे यी कार्यालयमे बुझाके सहयोग कैडेना आग्रह करलै ।

सामाग्रीके सम्बन्धमे कौनो जानकारी हुइलेसे देहायके सम्पर्क नम्बर वा ईलाका प्रहरी कार्यालय सुखडमे जानकारी डेना अनुरोध कैगिल बा । सूचना डेहुइया व्यक्तिके परिचय गोप्य रख्ना उहाँ जनैलै ।