निर्वाचनके विकल्प नैहोः प्रचण्ड
पहुरा समाचारदाता
धनगढी, १२ अगहन । नेपाल कम्युनिष्ट पार्टी (नेकपा)के संयोजक एवं पूर्व प्रधानमन्त्री पुष्प कमल दाहाल ‘प्रचण्ड’ निर्वाचनके विकल्प नैरहल बटैले बटै ।
सुदूरपश्चिमके धनगढीमे आयोजिक नेपाल कम्युनिष्ट पार्टीके पार्टी एकता सन्देश सभाहे सम्बोधन कैटी उहाँ निर्वाचनके विकल्प नैरहल बटाइल हुइट । ‘निर्वाचनके विकल्प नैहो’, उहाँ कहलै, ‘अब्बेक अस्थिर राजनीतिक परिस्थितिहे स्थिरतामे लानक लाग ओ जनताके आत्मनिर्णय अधिकार सुनिश्चित करक लाग निर्वाचन एकठो किल उपाय रहल बा ।’
उहाँ चुनावके लाग उपयुक्त वातावरण बनाइक लाग सरकारहे सक्कु मेरके दबाब डेना आवश्यक रहल फेन जोड डेलै । उहाँ, सुरक्षा, स्वतन्त्रता ओ लोकतान्त्रिक अधिकार सुनिश्चित कैके शान्तिपूर्ण निर्वाचन हुइ पर्ना बटाइल रहिट ।
यकर साथे उहाँ आगामी निर्वाचनपाछे देशमे स्थिरता, लोकतन्त्र ओ सुशासन कायम करे सेकजैना ओ वर्तमान राजनैतिक जटिलताके समाधान फेन हुइना विश्वास करले बटै ।
कार्यक्रमहे सम्बोधनके क्रममे उहाँ संघीय लोकतान्त्रिक गणतन्त्र कौनो राजनीतिक स्वार्थ वा दलके लहड किल नैहोके सामाजिक न्याय ओ समृद्ध नेपाल निर्माण कैना साझा सपना रहल बटाइल रहिट ।
सम्बोधनके क्रममे उहाँ जेनजीके माग ओ आपन पार्टीके एजेन्डा मेल खैना बटाइल रहिट । उहाँ जेनजी आन्दोलनसे देशमे लावा राजनीतिक चेतना जगाइल फेन बटाइल रहिट ।
ओस्टके उहाँ थारू समुदायके अधिकार, पहिचान ओ संवैधानिक मान्यता, दलित, जनजातिके माग मुद्धाके सम्बोधन माओवादी जनयुद्ध ओ आन्दोलनसे लानल उपलब्धि रहल बटाइल रहिट ।
ओस्टके सहसंयोजक माधवकुमार नेपाल पार्टीले स्वच्छ राजनीतिके अगुवाइ कैना बटैले बटै । नेपालसे दलमे दलालीकरण, ठेकेदारीकरण, व्यापारीकरण, भ्रष्टीकरण ओ अपराधीकरण व्याप्त रहल बटैलै । उहाँ कुशासन ओ भ्रष्टाचार अन्त्य कैना काममे पार्टीसे अगुवाइ कैना ओ राजनीतिमे इमान्दारी ओ समर्पण आवश्यक रहल उल्लेख करलै ।
‘दलमे दलालीकरण, ठेकेदारीकरण, व्यापारीकरण, भ्रष्टीकरण, अपराधीकरणके प्रवृत्ति चुलल् बा,’ उहाँ थप्लै, ‘उहीहे अन्त्य कैके नेपालके राजनीतिहे स्वच्छ बनैना कामके अगुवाइ आब नेपाली कम्युनिष्ट पार्टी कैना बा ।’
ओहे कार्यक्रमहे सम्बोधन कैटी नेकपाके नेता डा. भीम रावल अइना निर्वाचनमे सुदूरपश्चिमसे नेपाली कम्युनिष्ट पार्टी एक नम्बर बन्ना दाबी करले बटै । पार्टी एकता सन्देश सभामे बोल्टी नेता रावल नेपाली कम्युनिष्ट पार्टी सुदूरपश्चिममे सबसे बरवार दल बन्ना दाबी करल हुइट ।
‘नेपाली कम्युनिस्ट पार्टी सुदूरपश्चिमसे एक नम्बरमे आइल कना सन्देश अब्बेक सभासे डेले बा । चुनावमे समेत हम्रे एकजुट होके सक्कु जाती, भाषा, धर्म क्षेत्रके जनता एकजुट हुइबी,’ रावल कहलै ।
देशके मुहार फेरक लाग नेपाली कम्युनिष्ट पार्टीके निर्माण हुइल फेन बटाइल रहिट । उहाँ एमाले अध्यक्ष केपी शर्मा ओलीके स्वेच्छाचारी शासनसे मुलुक दुर्घटना व्यहारे परल बटाइल रहिट ।
ओली विगतमे दुई÷दुईचो संसद विघटनके प्रयास करल सन्दर्भ कोट्याइटी नेता रावल ओली पार्टी सदृढ ओ लोकतान्त्रिक बनैना १० बुँदे सहमतिहे लत्याइल समेत बटाइल रहिट । उहाँ एमालेसे विपरित सिद्धान्त बोकल काँग्रेससँग बाँटचुडके खाइक लाग सत्ताझादेरी करल टिप्पणी फेन करल रहिट ।
कार्यक्रममे संक्षिप्त मन्तव्य राखल नेता रावल एमाले अध्यक्ष केपी शर्मा ओलीहे उहीसे आघे मिसन ०८४ नभइ पतन ०८४ आइ कहिके अपने कहल बटाइल रहिट ।
सुदूरपश्चिमके धनगढीसे सुरु हुइल यी कार्यक्रम क्रमशः लुम्बिनी, गण्डकी, कोशी, उपत्यका विशेष, कर्णाली, सङ्घीय संरचना समन्वय प्रदेश, मधेश ओ बागमती प्रदेशमे आयोजना हुइना जनाइल बा ।
ओस्टके, विदेशमे रहल पार्टी संरचनाके लाग अगहन २१ गते साँझ ६ बजे भर्चुअल एकता सभा सञ्चालन करजैना कार्यक्रम समेत तय करल बा ।
