नेफिन सुदूरपश्चिममे अल्पसख्यक समुदायहे न्याय
प्रदेश अध्यक्षमे बासमति राजी निर्वाचित
पहुरा समाचारदाता
धनगढी, १४ अगहन । नेपाल आदिवासी जनजाती महासंघ सुदूरपश्चिम प्रदेश समन्वय समितिके अध्यक्षमे अल्पसंख्यक राजी समुदायके वासमति राजी निर्वाचित हुइल बटै ।
शनिच्चरके रोज हुइल दुसरा अधिवेशनसे उहाँहे अध्यक्ष पदमे निर्वाचित करल हो । समितिके उपाध्यक्षमे कृतिबहादुर थापामगर, कविराम तामाङ, रुकमाया भुजेल रहल बटै । चार जाने उपाध्यक्ष रना व्यवस्था अनुसार तीन जानेक केल्ह उम्मेदवारी परल रहे ।
ओस्टेक सचिवमे तमान सिंह गुरुङ निर्वाचित हुइल बटै । यम्नेफे पाँच जाने सचिव रना व्यवस्था अनुसार एक जानेक केल्ह उम्मेदवारी परल रहे । नेपाल आदिवासी जनजाती महासंघ सुदूरपश्चिम प्रदेश समन्वय समितिके अध्यक्ष दलबहादुर घर्ती मगरके अध्यक्षतामे अधिवेशन हुइल रहे ।
समितिके कोषाध्यक्षमे विजयकुमार राई निर्वाचित हुइल बटै । परिणाम ओ सहमतिके नतिजा शनिच्चर रातके नौ बजे ओर आइल रहे ।
