पुनर्स्थापनासे वञ्चित मुक्तकमैया, कमलरीके पुनर्स्थापना आवश्यक

मुक्तकमैया महिला विकास मञ्चके अध्यक्ष फेरसे सीमा चौधरी निर्वाचित

पहुरा समाचारदाता
धनगढी, १४ अगहन । मुक्तकमैया महिला विकास मञ्चके अध्यक्षमे फेरसे सीमा चौधरी निर्वाचित हुइल बटी ।

अँटवारके रोज धनगढीमे हुइल १८औं वार्षिक साधारणसभा, छैठौ अधिवेशन तथा सामाजिक परिक्षण कार्यक्रमसे मञ्चके अध्यक्ष पदमे सीमा चौधरी सर्वसहमतिसे दुसरा कार्यकालके लाग निर्वाचित हुइलक हुइट । मञ्चके उपाध्यक्ष पदमे बजारी चौधरी, सचिवमे सोनी चौधरी ओ कोषाध्यक्ष पदमे कञ्चन कुश्मी चौधरी सर्वसहमतिसे निर्वाचित हुइल बटै । ओस्टेक करके सदस्य पदमे माया कुमारी चौधरी, लक्ष्मी चौधरी, राजकुमारी चौधरी, लक्ष्मीकुमारी चौधरी ओ सुनिता चौधरी निर्वाचित हुइल बटै ।

उहीसे आघे मुक्त कमैया महिला विकास मञ्चके अध्यक्ष सीमा चौधरीके अध्यक्षतामे उदघाटन कार्यक्रम हुइल रहे । जेम्ने प्रमुख अतिथि जिल्ला समन्वय समिति कैलालीके सभापति टीकाकुमारी चौधरी भुल रहल रहिट । ओ विशिष्ट अतिथिमे गैरसरकारी संस्था महासंघके प्रदेश अध्यक्ष देवी प्रसाद खनाल, जिल्ला अध्यक्ष चेतमान साउद ओ वेसके केन्द्रीय उपाध्यक्ष यज्ञराज चौधरी रहल रहिट ।

कार्यक्रममे सम्बोधन करटी जिल्ला समन्वय समिति कैलालीके सभापति टीकाकुमारी चौधरी भुल पुनस्र्थापनासे बञ्चित रहल मुक्तकमैया ओ परिचयपत्रसे नैपाइल मुक्तकमलरीहुकनके पुनर्स्थापना तथा परिचय पत्रके व्यवस्था कैना जरुरी रहल बटैली ।

मुक्तकमैया महिला विकास मञ्चके वकालत ओ पैरबीसे ढेर महिला आपन अधिकार बारे बोले सेक्ना, महिला उद्यमी बनके आर्थिक रुपमे सशक्त हुइटी गैल बटैली । संस्था ढेर जाने तालिम लेहल मने उद्यमीके रुपमे सक्कु जाने नैलागल डेखल उहाँ बटैली ।

गैरसरकारी संस्था महासंघके प्रदेश अध्यक्ष देवी प्रसाद खनाल गैरसरकारी संस्थासे गरिबी न्यूनिकरण ओ सचेतनाके कार्यक्रम संचालन करल बटैलै । गैसससे विकासमे समेट योगदान करल मने ओकर कदर नैहुके अलग आरोप लगैना करल बटैलै ।
वेसके केन्द्रीय उपाध्यक्ष यज्ञराज चौधरी यी संस्थासे मुक्तकमैया पुनस्र्थापनासे लेके जिविकोपार्जन, पैरवी तथा वकालटमे भारी भूमिका निर्वाह करल बटैलै ।

मञ्चके संस्थापक अध्यक्ष कौशिला चौधरी १८ बरसके दौरानमे भारी समस्याके सामाना करल बटैली । उहाँ कहली, २०७२ साल थेनसे मुक्तकमैया, कमलरी पुनस्र्थापनाके चेप्टर क्लोज हुइल बेला अपनेहुक्रे प्रदेश ऐन बनाके फेरसे पुनर्स्थापनाके कामहे आघे बह्रैना अवस्था पुगाइल बटैली ।

कार्यक्रममे संचारकर्मी प्रेम चौधरी संस्थाहे मुक्तकमैया, कमलरी केल्ह नाही सीमान्तकृत समुदायके महिला तथा पुरुषहुकनहे दिगोपार्जनके डगर डेखाइल ओ आर्थिक रुपमे शसक्त बनैना अभियानहे भारी योगदान पुगाइल बटैलै ।

कार्यक्रममे गुरुगोरख नाथ सहकारीके प्रतिनिधि यी संस्थाके कारण सहकारी ढेर फडको मारल बटैली ।

कार्यक्रममे नोखरी सजांल कञ्चनपुरके सुनिता चौधरी संस्थाके योगदानसे अपनेहुक्रे उद्यमी बनके आर्थिक रुपमे बल्गर बन्टी आपन गोरेम अपनही ठरहयइना बनल बटैली । कार्यक्रममे संचालन संस्थापक अध्यक्ष कौशिला चौधरी ओ स्वागत मन्तव्य उपाध्यक्ष जानकी चौधरी करल रहिट ।

संस्था २०६५ सालमे स्थापना हुके मुक्तकमैया तथा कमलरीके न्यायिक पुनःस्थापना सहित आर्थिक सामाजिक अधिकार सुनिश्चतके लाग वकालट करटी आयआर्जनके अवसर सृजना कैना टमान कार्यक्रम संचालन करटी आइल कार्यक्रम संयोजक इन्द्र चौधरी बटैलै ।

संस्थासे कैलाली कञ्चनपु्र बर्दियामे मुक्तकमैया÷कमलरी महिला सशक्तीकरण, लैङिक समानता ओ महिला अधिकार, उद्यमशिलता ओ जिविकोपार्जन सुदृढीकरण, वकालत तथा पैरबी ओ वातावरण परिवर्तन तथा अनुकुलनके क्षेत्रमे काम करटी आइल उहाँ बटैलै । कार्यक्रममे मञ्चके कार्यक्रम संयोजक इन्द्र चौधरी, परियोजना अधिकृत चेतमान साउद ओ लेखा प्रशासन अधिकृत आरती चौधरी परियोजनासे कैगिल गतिविधि प्रस्तुतीकरण कारण रहिट ।