पहुरा थारू दैनिक लगटार ‘क’ वर्गमे पर्ना सफल
पहुरा समाचारदाता
धनगढी, १५ अगहन । कैलालीके धनगढीसे निरन्तर प्रकाशित हुइटी आइल पहुरा थारू दैनिक स्थानीय ‘क’ वर्गमे पर्ना सफल हुइल बा ।
प्रेस काउन्सिल नेपालसे आव २०७९/०८० के पत्रपत्रिका वर्गीकरण/मूल्यांकनके नतिजा अनुसार पहुरा स्थानीय ‘क’ वर्गमे पर्ना सफल हुइल हो ।
पहुरा थारू भाषा कला, संस्कृति ओ समाचारमूलक दैनिक पत्रिका हो । जिल्ला प्रशासन कार्यालय कैलालीमे २०६० चैत २४ गते साप्तहिक पत्रिकाके रुपमे दर्ता होके प्रकाशन सुरु करल पहुरा २०६६ चैत २९ गतेसे दैनिक पत्रिकाके रुपमे नियमित प्रकाशन हुइटी आइल बा ।
पहुराहे २०६७ चैत १० गते प्रेस काउन्सिल नेपालसे सम्मान फेन करल बा । थारू भाषा, पत्रकारिताके विकासके लाग विशेष पहल तथा योगदान पुगाइल कहटी ‘प्रेस काउन्सिल भाषागत पत्रकारिता पुरस्कार’से सम्मान करल हो ।
यकर साथे थारू भाषा, संस्कृति संरक्षण ओ सूचना तथा समाचारके माध्यमसे समाजमे महत्वपूर्ण योगदान पुगाइल कहटी टमान संघ संस्थासे फेन सम्मान करल बा । पहुरा प्रेस काउन्सिल नेपालसे कैना पत्रपत्रिका वर्गीकरणमे २०६८ से अब्बेसम नियमित ‘क’ वर्गमे परटी आइल बा । प्रिन्ट मिडियाके रुपमे नियमित प्रकाशन हुइटी आइल पहुरा अब्बे अनलाइन न्यूज पोर्टल अर्थात अनलाइन पत्रिका www.pahura.com के रुपमे फेन सञ्चालनमे रहल बा ।
प्रेस काउन्सिल नेपालसे अगहन १५ गते प्रकाशित नतिजा अनुसार वर्गीकरणके लाग परल ८९४ पत्रपत्रिका मध्ये ८२६ ठो पत्रपत्रिका वर्गीकरणमे परल जनाइल बा । ओस्टके २२ ठो पत्रपत्रिकाके कागजात अपुग होके स्थगन ओ ४७ ठो हुबहु कायम होके वर्गीकरणमे नैपरल जनाइल बा ।
ओस्टके वर्ग अनुसार क वर्गमे २०४, ख वर्गमे ४६२, ग वर्गमे १५४ ओ घ वर्गमे ६ ठो पत्रपत्रिका रहल बा । कलेसे स्तर अनुसार राष्ट्रिय १४०, प्रदेशमे १४२ ओ स्थानीयमे ५४४ पत्रपत्रिका रहल बा ।
ओस्टके दैनिक १८२, अर्धसाप्ताहिक ३, साप्ताहिक ४७३, पाक्षिक १२, मासिक ७८, द्ध्रैमासिक ४, त्रैमासिक ६, साहित्यिक ५६ ओ भाषाभाषीके १२ पत्रपत्रिका वर्गीकरणमे परल हो ।
