अपाङता रहल बालबालिकाहुकनहे शैक्षिक सामाग्री वितरण
पहुरा समाचारदाता
धनगढी, १८ अगहन । कैलारी गाउँपालिकामे अपाङता रहल बालबालिकाहुकनहे शैक्षिक सामाग्री वितरण कैगिल बा ।
अपाङता हुइल व्यक्तिहुकनके ३४औं अन्तर्राष्ट्रिय दिवसके अवसरमे कैलारी गाउँपालिका महिला, बालबालिका तथा जेष्ठ नागरिक शाखाके आयोजना ओ कैलारीमे सक्रिय संघ संस्थाके सहकार्यमे टमान विद्यालयमे अध्ययनरत रहल अपाङता रहल नौ जाने बालबालिकाहुकनहे शैक्षिक सामाग्री वितरण करल हो । शैक्षिक सामाग्री राष्ट्रिय मावि उजलीशेमरा, जनकल्याण मावि के गाउँ, जनकल्याण आधारभूत विद्यालय सामारचौरा, जनता आधारभूूत विद्यालय रामपुर ओ दिपेन्द्र मावि हसुलियाके विद्यार्थीनहे शैक्षिक सामाग्री वितरण करल हो ।
दिप अपाङगता मानव अधिकार समुहके अध्यक्ष गौरीशंकर चौधरीके अध्यक्षतामे हुइल कार्यक्रमके प्रमुख अतिथि कैलारी गाउँपालिका वडा नम्बर ६ के वडा अध्यक्ष प्रेमबहादुर चौधरी ओ विशिष्ट अतिथि वडा नम्बर ५ के वडा अध्यक्ष विष्णु प्रसाद चौधरी रहल रहिट ।
कार्यक्रमके संचालन दलित महिला अधिकार मञ्चके सामाजिक परिचालक निलु चौधरी करल रहिट ।
कार्यक्रममे कार्यपालिका सदस्य सुन्दरीदेवी चौधरी, मनिराम कुमाल, कैलारी गाउँपालिका महिला बालबालिका तथा जेष्ठ नागरिक शाखाके प्रमुख बालकुमारी चौधरी, टमान संघसंस्थाके प्रतिनिधिहुकनके सहभागिता रहे ।दिवसके अवसरमे उहीसे आघे प्रभातफेरी ¥यालीके आयोजनाफे हुइल रहे ।
