मानव अधिकार ओ आम निर्वाचनबारे अन्तरपुस्ता संवाद
पहुरा समाचारदाता
धनगढी, २४ अगहन । मानव अधिकार ओ आम निर्वाचनबारे बुधके रोज धनगढीमे अन्तरपुस्ता संवाद कार्यक्रम सम्पन्न हुइल बा । गैरसरकारी संस्था महासंघ सुदूरपश्चिम प्रदेशके आयोजना तथा यूरोपियन युनियनके सहयोगमे मानव अधिकार ओ आम निर्वाचनबारे अन्तरपुस्ता संवाद कार्यक्रम हुइल हो ।
गैरसरकारी संस्था महासंघ सुदूरपश्चिम प्रदेशके अध्यक्ष देवी खनालके अध्यक्षतामे हुइल कार्यक्रममे उहाँ साझा बुझाई ओ अनुभव साझा करेक लाग, मानव अधिकारके बर्तमान स्थिति मुल्यांकन, यूवाके राजनीतिक सहभागिता प्रवद्र्धन, गैरसरकारी संस्था ओ सरकारी निकायविच समन्वय, नीति सिफारिस ओ कार्यदिशा तयार करेक लाग मानव अधिकार ओ आम निर्वाचनबारे अन्तरपुस्ता संवाद कैगिल बटैलै ।
कार्यक्रमके प्रमुख अतिथि राष्ट्रिय मानव अधिकार आयोग सुदूरपश्चिम प्रदेश प्रमुख झंकर बहादुर रावल देशमे समृद्धिके लाग सुशासन जरुरी रहल बटैलै । राजनीतिक अस्थिरतासे विकास हुई नैसेक्ना कहटी सक्कु पुस्ताके समन्वय सहकार्यसे हुइना जरुरी रहल बटैलै ।
अन्तर संवाद कार्यक्रममे नेपाल पत्रकार महासंघके प्रदेश अध्यक्ष भरत शाह जेनजी पुस्ताके आन्दोलनमे गलत तत्वसे फाइदा उठाइल कहटी सक्कु जाने सजग हुई पर्ना बटैलै ।
परिवर्तन जरुरी रहे, उहाँ कहलै, भदौ २३ गते ढेर यूवा ज्यान गुमैलै, मने परिवर्तन कैना नाउँमे २४ गतेक रोज जेकर जहोर असुन्तष्ट रहे । ओहरे तोडफोड आगजानी करलै । उ चाही गलत हुइल ।
गैरसस महासंघके केन्द्रीय सदस्य सावित्रा घिमिरे अभिनफे भयरहित बातावरणमे चुनाव करे नैसेक्ना अवस्था नैरहल बटैली । अन्तरसंवाद कार्यक्रमहे निरन्तरता डेना जरुरी रहल उहाँ बटैली । जेनजी यूवा पदम साउद मतदाताहुक्रे निर्धक्कसे मतदान करेपैना हक रहल ओरसे यकर लाग वातावरण बनैना जरुरी रहल बटैलै । उहाँ यूवा समुहके सहभागिता अनिवार्य रहल बटैलै । ओस्टे यूवा समुहके सरिता जोशी अब्बे हुइना निर्वाचनमे विदेश रहल यूवाहुकनके मताधिकार सुनिश्चितता करेपर्नामे जोर डेहल रही ।
पत्रकार शिवराज भटट् जेनजी आन्दोलनके क्रममे कारागारसे भागल अपराधीके कारण ओ आन्दोलनके क्रममे लुटल हतियारसे चुनौती ठपल बटैलै ।
कार्यक्रमके संचालन गैरसरकारी संस्था महासंघ सुदूरपश्चिम प्रदेशके सचिव लोकमान धामी ओ स्वागत मन्तव्य महासंघके जिल्ला सचिव पवन भण्डारी करल रहिट ।
