आपन अधिकार खोजेबेर औरेक मानव अधिकारके उलंघन करेनैपरल

पहुरा समाचारदाता
धनगढी, २४ अगहन । सुदूरपश्चिम प्रदेश सरकारके आन्तरिक मामिला तथा कानून मन्त्री हिरासिंह सार्की आपन अधिकार खोजेबेर औरेक मानव अधिकारके उलंघन करे नैहुइना बटैले बटै ।

७७औं अन्तर्राष्ट्रिय मानवअधिकार दिवस मूल समारोह समिति तथा संयोजक राष्ट्रिय मानव अधिकार आयोग, सुदूरपश्चिम प्रदेश कार्यालयके आयोजनामे बुधके रोज धनगढीके ट्राफिक चोक (चौराह)से जेन्जी मार्ग(पार्कमोड) सम प्रभातफेरी कार्यक्रम समापन कोणसभामे सम्बोधन करटी उहाँ उ बाट कहल रहिट । यहाँ अपन अधिकार खोज्न क्रममे औरेक अधिकार हनन हुई सेकठ ओम्ने ख्याल करेपरठ उहाँ कहलै ।

धनगढी उपमहानगर पालिकाके उपप्रमुख कन्दकला कुमारी राना मानव अधिकार सक्कु जानेक नैसगिंक अधिकार रहल कहटी कम्जोर, बल्गर, धनी, गरिब, सक्कु मानवके लाग बराबर रहल बटैली । अधिकार कम्जोर बल्गर नैहुइना कहटी लिङके आधारमे कुही भेदभाव करेनैहुइना उहाँ बटैली । समानता, नागरिक स्वतन्त्र हुइना जरुरी रहलफे उप प्रमुख बटैली ।
मानव अधिकार उलंघन जहाँ हुइल बा, ओकर खोजविन करके दोषीहे कार्वाही करेपर्नाफे उहाँ बटैली ।

कार्यक्रममे कैलाली प्रमुख जिल्ला अधिकारी हिरालाल रेग्मी, मानव अधिकारका महिला एकल महिला समुहके जिल्ला अध्यक्ष भगवती हमाल, यूवा समुहके पदम साउदलगायत मन्तव्य राखल रहिट । कार्यक्रममे संचालन गैसस महासंघ प्रदेश अध्यक्ष देवी खनाल करल रहिट ।

कोणसभासे आघे धनगढीके ट्राफिक चौराहासे सुरु हुइल र्‍यालीमे टमान गैसस संघ, प्रदेश सरकार, स्थानीय सरकार, सुरक्षा निकाय, यूवा तथा विद्यार्थीहुकनके सहभागिता रहे ।