जनप्रनिधि तथा सामुदायिक वनके पदाधिकारीनहे वन डढेलो नियन्त्रण सम्बन्धी अभिमुखीकरण

पहुरा समाचारदाता
धनगढी, २५ अगहन । कैलाली जिल्लास्थित कैलारी गाउँपालिकाके जनप्रतिनिधिहुकनहे वन डढेलो नियन्त्रण सम्बन्धी अभिमुखीकरण कार्यक्रम सम्पन्न हुइल बा ।

दलित महिला अधिकार मञ्चसे सञ्चालित सिढरा परियोजना अन्र्तगत दुरयोग निभारानके सहयोगमे कैलारी गाउँपालिकाके समन्वय तथा इआरआइ प्रालि काठमाण्डौके सहजीकरणमे स्थानीय तहके जनप्रतिनिधिहुकनहे एक दिने वन डढेलो नियन्त्रण तथा व्यवस्थापन सम्बन्धी अभिमुखीकरण कार्यक्रम कैगिलक हो ।

कैलारी गाउँपालिकाके वन तथा विपद व्यवस्थापन समितिके संयोजक ठागुराम चौधरीके अध्यक्षतामे हुइल कार्यक्रममे गाउँपालिका उपाध्यक्ष भगवतीकुमारी चौधरी प्रमुख अतिथि रहल रहिट । कार्यक्रममे सम्बोधन करटी उहाँ जनचेतनाके कमीसे वनुवामे आगी लगाडेना बटैली । वन जंगल जोगैना सक्कु जानेक दायित्व रहल कहटी सक्कु उपभोक्ताहुक्रे वनप्रति अप्नत्व हुइना जरुरी रहल बटैली ।

कैलारी गाउँपालिका आगलागी विपदमेफे उच्च जोखिममे रहल बा, उहाँ कहली, ‘वडा नम्बर ७ स्थित विपतपुर मुक्तकमैया बस्ती जरके भुवा बनल यर्थाथ हमारथेन बा । उ पाठ सिकाई कैटी गाउँपालिकासे डमकलफे खरिद करल ।
वनजंगलमे डढेलो नियन्त्रणके लाग सामुदायिक वन, वडा कार्यालय, स्थानीय सरकार ओ सरोकारवाला निकायसे समुदायमे चेतना फैलैना जरुरी रहल गाउँपालिका उपाध्यक्ष बटैली ।

कार्यक्रममे इआरआईके प्रशिक्षक मदन बस्याल ओ आयूष गौतम बनुवामे लग्ना डढेलो, वन डढेलोके प्रकार, आगी नियन्त्रणमे पूर्वतयारी तथा प्रतिकार्य, आगी नियन्त्रणके प्रयोग कैना औजारबारे जानकारी डेहल रहिट । कार्यक्रममे सक्कु वडा अध्यक्षहुक्रे, नेपाल प्रहरी, नेपाल रेडक्रस सोसाइटी, सव डिभिजन वन कार्यालयके प्रतिनिधिहुक्रे, महिला वालबालिका तथा जेष्ठ नागरिक शाखाके प्रमुख, विपद व्यवस्थापन शाखाके प्रमुख, सामुदायिक वनके पदाधिकारी, मानव अधिकार रक्षक संजाल, अगुवा भल्मन्साहुकनके सहभागिता रहे ।

कार्यक्रमके संचालन दलित महिला अधिकार मञ्चके सामाजिक परिचालक निलु चौधरी, स्वागत सामाजिक परिचालक सीमा महतौं ओ कार्यक्रमबारे दलित महिला अधिकार मञ्चके सिढरा परियोजनाके परियोजना अधिकृत मिनबहादुर हुडके करल रहिट ।

ओस्टेक करके विफेक रोजफे दलित महिला अधिकार मञ्चके आयोजनामे कैलारी गाउँपालिकाके २५ ठो सामुदायिक वनके पदाधिकारीहुकनसंग वन डढेलो नियन्त्रण सम्बन्धी अभिमुखीकरण कार्यक्रम कैगिल बा ।

कार्यक्रममे इआरआईके प्रशिक्षक मदन बस्याल ओ आयूष गौतम बनुवामे लग्ना डढेलो, वन डढेलोके प्रकार, आगी नियन्त्रणमे पूर्वतयारी तथा प्रतिकार्य, आगी नियन्त्रणके प्रयोग कैना औजारबारे जानकारी डेहल रहिट ।