पथरी गाउँमे रातसम डिजे बजाइ नैपैना
पहुरा समाचारदाता
धनगढी, २९ अगहन । धनगढी उपमहानगरपालिका वडा नम्बर १७ पथरी गाउँमे भोजबिहाके समय आधारातसम जोर जोरसे डिजे बजाइ ओ खाइपिये नैपैना हुइल बा ।
शनिच्चरके रोज गाउँमे हुइल भेलासे भोजविहामे आधारातसम डिजेबाजा बजैटी नाचगान कैना ओ खापापिके होहल्ला करे नैपैना निर्णय करल हो । गाउँक भलमन्सा सीताराम चौधरी गाउँक भेलासे आधारातसम डिजे बजैना ओ खानपिनमे बन्देज कैना निर्णय करल बटैलै ।
उहाँ उहीसे गाउँमे होहल्ला हुइनाके साथे झैझगडा फेन हुइ सेक्ना मध्य नजर कैटी ओइसीन निर्णय करल जानकारी डेलै ।
ओस्टके उहाँ रातसम खानपिन कैनासे भोजहा घरक आर्थिक भार फेन बह्रना हुइल ओरसे गाउँक सक्कु जनहनके सहमतिमे निर्णय करल बटाइल हुइट । उहाँ कहलै, ‘भोजविहामे ओइसे फेन ढेर खर्च लागठ, रातसम डिजे बजैटी खानपान कैनासे होहल्ला, झैझगडा फेन हुइ सेकठ् । विपन्न, मुक्त कमैया परिवारहे आर्थिक समस्या फेन परल ओरसे गाउँक सक्कु किसानके सहमति अनुसार यी निर्णय करल हो ।’
