उद्यम छोट लगानीसेफे करे सेक्जाइठः गाउँपालिका उपाध्यक्ष

पहुरा समाचारदाता
हसुलिया, २९ अगहन । उद्यमी कहटीकी भारी लगानीके व्यवसाय हो कना गलट मानसिक रहल कहटी उद्यम छोट लगानीसेफे करे सेक्ना कैलारी गाउँपालिकाके उपाध्क्ष भगवतीकुमारी चौधरी बटैले बटी ।

कैलारी गाउँपालिका उद्यम विकास शाखासे सोम्मारके रोज हसुलियाके आयोजना करल अभिमुखीकरण कार्यक्रममे उहाँ बाट बत्वाइल रहिट । एक व्यक्ति ढेर तालिममे सहभागी होसेकल ओरसे कोई व्यक्ति मै उद्यम संचालन करम कना मनसे इच्छा हुइलेसे छोट लगानीसे सुरुवाट करे सेक्ना उहाँ बटैली । छोट पुँजीसे सुरुवाट करके उहीहे विस्तार करल उद्यम दिगो रहल कहटी एकचोट्टे भारी लगानीसे सुरु करु नैहोक इच्छा शक्ति हुइलेसे छोटहीसे सुरु करेसेक्ना उहाँ बटैली ।

कैलारी गाउँपालिकासे वेरोगारहुकन अपने गाउँ ठाउँमे रोजगारी सृजना करेक लाग महिला तथा यूवाहुकनहे ढेर तालिम डेहल मने कम व्यक्ति व्यवसाय संचालन करल बटैली । सीपके सदुपयोग करलेसे जहाँफे रोजगार बनेसेक्ना उहाँ बटैली । गाउँपालिका अन्र्तगतके उद्यम विकास शाखासे वडा वडामे मेरमेराइक तालिम संचालन करल बटैली ।

उद्यमीहुकनसे बनाइल हेण्डीक्राफटहे बजारीकरणके लाग कैलाली उद्योग बाणिज्य संघसे संचालन करल सुदूरपश्चिम महोत्सवमे एक निशुल्क स्टलके व्यवस्था करुवा डेहल उहाँ बटैली । समाज रुपान्तरण तथा विकास करेकलाग सकारात्मक सोच हुइना जरुरी रहल उहाँ बटैली ।

वडा नम्बर ५ वडा अध्यक्ष विष्णु प्रसाद चौधरी संस्थासे सहयोग पाके उद्यम संचालन कैना मने पाछे संस्था गैलपाछे उद्यमफे बन्द कैना ढेर जैसिन डेखल बटैलै । नागरिक अब्बे अधिकारमुखी केल्ह हुइल मने आपन कर्तव्य पालन नैकरल बटैलै ।

कार्यक्रमके सहजकर्ता भीमबहादुर विष्ट बजारके आवश्यकता हेरके तालिम संचालन करेपर्ना ओ उद्यम तथा व्यवसाय कैना मेरिक मनै हेरके सहभागी छनौट करेपर्ना कहलै । उहाँ जनताके मागल विकास ओ कार्यक्रम ल्यन्ना जरुरी रहल बटैलै । उद्यम विकास कार्यक्रम गरिबीके रेखा टरे रहल वर्ग महिला ७० प्रतिशत, यूवा ६० प्रतिशतहे उद्यमशिलता तथा लद्यु उद्यम विकासके माध्यमसे स्थानीय स्रोत साधानके परिचालन करके स्थानीयस्तरमे रोजगारी सृजना कैना गरिबी घटाइक लाग यी कार्यक्रम सुरुवाट हुइल सहजकर्ता विष्ट बटैलै ।

उद्यम सृजना कैना हो कलेसे तालिम डेके केल्ह नैहुई, छोट छोट सहयोग जरुरी रहलफे उहाँ बटैलै ।

कार्यक्रमके संचालन उद्यम विकास शाखा मेडपाके निर्मला चौधरी करल रहिट । अभिमुखीकरण कार्यक्रममे वडा अध्यक्षहुक्रे, सामाजिक विकास शाखा प्रमुख यगम कलेल लगायत टमान शाखाके प्रमुख हुकनके सहभागिता रहे ।