मुक्तकमैया महिला विकास मञ्चसे सञ्चालित कार्यक्रमके अनुगमन
पहुरा समाचारदाता
धनगढी, २९ अगहन । मुक्तकमैया महिला विकास मञ्चसे एफसिए नेपालके आर्थिक सहयोगमे सहकार्य परियोजना अन्र्तगत कैलारी गाउँपालिकासे सञ्चालित कार्यक्रमके अनुगमन कैगिल बा ।
मञ्चसे गाउँपालिकाके टमान वडामे सञ्चालन करल कार्यक्रमके गाउँपालिका स्तरीय परियोजना सल्लाहकार समितिसे सोम्मारके रोज स्थलगत रुपमे अनुगमन कैगिल हो । मञ्चसे कैलारी गाउँपालिका वडा नम्बर २ कैलारी गाउँमे मुकेश चौधरीसे सञ्चालन पावर टिलर मर्मत, ग्रिल निर्माण वर्क सपमे कम्प्रेसर मेसिन ओ ग्रीलमे फोङग पर्ना मेसिन सहयोग ओ तालिम डेहल रहे । युवा मुकेश चौधरी उ सहयोगसे काममे सहजता हुइल बटैलै । अनुगमन टोलीसे उहाँहे व्यवसायहे विस्तार कैटी लैजैना सुझाव डेहल रहे ।
ओस्टेक कैलारी गाउँपालिका वडा नम्बर ८ मे मसला उद्योगके अनुगमन कैगिल बा । मञ्चसे वहाँ वेसार बनाइक लाग सुखुवइना प्लाष्टिक घर ओ मसला पिस्ना मेसिन सहयोग कैगिल बा । १० जानेक समुहसे मसला बनाके विक्री करल गैल बरस ५ कुन्टल बेसार विक्री करल समुहके सदस्य कोपिला चौधरी बटैली ।
टोलीसे कैलारी–८ लोहरपुरमे फुलझरियासे संचालन नास्ता पसल ओ कैलारी–२ उजलीसेमरामे संचालन हुइल सुनिता नास्ता पसलके अनुगमन करले बा । दुनु नास्ता पसलसे दैनिक रुपमे हजारसे दुई हजारसम विक्री कैना करटी रहल बटैलै ।
ओस्टेक वडा नम्बर ५ सपना बस्तीमे संचालन हुइल डोनिया टेपरी उद्योग ओ वडा नम्बर ७ विपतपुरमे बंगुर पालनके सहयोग कैगिल दाना निर्माण मिलके अनुगमन करल बा । सपना बस्तीमे मुक्तकमैयाहुक्रे डोनिया टेपारी बनाके बचत करटी रहल समुहके अध्यक्ष श्रीफल चौधरी बटैलै ।
विपतपुरमे दाना बनैना मिल सहयोग हुइलपाछे उ बस्तीमे ढेर मुक्तकमैया बगुंर पालन सुरुवाट करले बटै । ओस्टेक मञ्च एफसिए नेपालके आर्थिक सहयोग ओ मुक्तकमैया महिला विकास मञ्चसे कार्यान्वयन करल सहकार्य परियोजनाके लागतमे विपतपुरमे बंगुर पालन, मुरगी पालन, जस्ता पाता, मासु पसल, सिलाई कटाई, मिल स्थापनाके लाग संस्थागत लगानी १६ लाख ४२ हजार १३९ रुप्या, व्यक्ति तथा समुदायके लगानी २ लाख १४ हजार २१५ करके जम्मा १८ लाख ५६ लाख ३५४ रुप्या सहयोग हुइल बा ।
ओस्टेक करके २०७९ सालमे बैशाख ११ विपतपुर बस्तीमे भीषण आगलागीसे हुइल क्षति हुइल बेलाफे ३३ लाख ४४ हजार ६०४ रुप्या सहयोग कैगिल रहे ।
अनुगमनपाछे समिक्षा कार्यक्रममे गाउँपालिका उपाध्यक्ष तथा अनुगमन समिति संयोजक भगवतीकुमारी चौधरी संस्थासे सहयोग करल अनुसार व्यवसाय संचालन हुइल ओ उहाँहुक्रे जिविकोपार्जनमे सहजताके साथे बचतफे करटी रहल बटैली । उहाँ संस्थासे करल सहयोगप्रति धन्यावाद डेहटी सहकार्य समन्वय जरुरी रहल बटैली । उहाँ कहली, संस्थासे सहयोग करटसम उद्यम तथा व्यवसाय संचालन हुइल मने संस्था जासेकलपाछे ओकर जिम्मा विषयगत शाखासे लेहेपर्ना बटैली ।
मञ्चके संस्थापक अध्यक्ष कौशिला चौधरी सहकार्य परियोजनामार्फत कैलारीमे चार बर्षसे कार्यक्रम संचालन करल ओ आब हस्तान्तरण कैना जनैली । परियोजना अधिकृत चेतमान साउद सहकार्य परियोजनाके अवधि समाप्त हुइलेसे लाइसेट परियोजना जारी रना बटैलै । कार्यक्रममे सामाजिक विकास शाखा यी संस्थासे पालिका तथा फिल्डमे मजा कार्य करल बटैलै । वडा नम्बर ४ के वडा अध्यक्ष ठागुराम चौधरी संस्थाके सपोट अनुसार कार्य हुइल बटैलै । गैर सरकारी संस्था महासंघके प्रदेश कार्यक्रम संयोजक गोकुल खडका संस्थासे लगानी करलपाछे मजा प्रतिफल डेखल बटैलै ।
अनुगमनमे गाउँपालिका उपाध्यक्ष भगवतीकुमारी चौधरी, प्रमुख प्रशासकीय अधिकृत खगेन्द्रराज जोशी, वडा अध्यक्षहुक्रे, संस्थाके संस्थापक अध्यक्ष कौशिला चौधरी, परियोजना अधिकृत चेतमान साउद, फिल्ड संयोजक मिना चौधरी, सहजकर्ता राजेश चौधरी, रमेश चौधरीलगायत गाउँपालिकाके टमान शाखाके प्रमुखहुकनके सहभागिता रहे ।
