पहुरा दैनिक एक ठो अभिभावक गुमाइल

पहुरा समाचारदाता
धनगढी, ६ पुस । कैलाली जिल्लाके धनगढीसे प्रकाशित हुइटी आइल पहुरा थारु दैनिक एक ठो अभिभावक गुमैले बा । यी दैनिकके कानूनी सल्लाहकार अधिवक्ता जोहारीलाल चौधरीके असमायिक निधनसे पहुरा परिवार स्तब्ध हुइल बा ।

कैलाली जिल्लाके जानकी गाउँपालिका वडा नम्बर १ दुर्गौलीके जन्म हुके धनगढी उपमहानगरपालिका वडा नम्बर ८ शिक्षानगर टोल स्थित घरमे बैठटी आइल आदिवासी जनजाती थारु समुदायके बौद्धिक व्यक्तित्व नेपाल बार एसोशिएसनके पूर्व केन्द्रिय उपाध्यक्ष अधिवक्ता चौधरीके पौष ५ गते साँझाके ५५ बर्षके उमेर असमायिक निधन हुइल हो ।

उहाँ विगत तीन÷चार बर्षसे सुगरके समस्या झेल्टी आइल रहिट । अधिवक्ता चौधरीके निधनसँगे आदिबासी जनजाती समुदाय एक विद्वान अधिवक्ता, कानूनविद्, बौद्धिक व्यक्तित्व, विश्लेषक, समाजसेवी एवं बुद्धिजीवी गुमैले बा । स्वर्गिय अधिवक्ताके अँटवार धनगढी–७ स्थित शिवगंगा ओ खुटियाके दोभन पटेला शवघाटमे अन्तेष्टी करल बा ।

नेपाल बार एसोशिएसन कैलालीके अध्यक्ष नाथुराम महतों अन्तेष्टी स्थलमे हार्दिक श्रद्धाञ्जली व्यक्त करटी आदिवासी जनजाती समुदायसे बौद्धिक व्यक्तित्व गुमाइल बटैलै ।

उहाँ कहलै, उहाँक यी क्षेत्रमे ३१ बर्ष अतुलनिया योगदान रहल । नेपाल बार एसोशिएसन कानूनके क्षेत्रमे एक ठो न्यायिक क्षेत्रमे, कानून विदके रुपमे कुसल यौद्धा गुमैले बा । यिहीसे थारु समुदायमेफे अपुरणिय क्षति पुगल बा ।

अधिवक्ता जोहारी चौधरीके जन्म २०२७ साल कार्तिक २७ गते हुइल रहे । उहाँ कानून विषयमे स्नातक, राजनिति शास्त्रमे स्नाकोत्तर करले बटै । उहाँक एक गोसिनिया, दुई ठो छावा रहल बाटिन ।

ओस्टेक करके कैलारी गाउँपालिकाके पूर्व कानूनी सल्लाहकार अधिवक्ता जोहारीलाल चौधरीके असमायिक निधनपाछे गाउँपालिका अँटवारके रोज शोक वक्तव्य जारी करटी हार्दिक श्रद्धाञ्जली व्यक्त करले बा ।

उहाँ थारु कल्याणकारिणी सभा कैलालीके पूर्व कानूनी सल्लाहकार, हमार फाउण्डेशनके संस्थापक लगायत संघसंस्थाके कानूनी सल्लाहकार रहल रहिट ।