भादा महोत्सव पुस १७ गतेसे
१३औँ थारू होमस्टे गाउँ भादा महोत्सवके तयारी तीव्र
पहुरा समाचारदाता
धनगढी, ९ पुस । कैलाली जिल्लाके धनगढी उपमहानगरपालिका वडा नम्बर १६ स्थित भादा गाउँमे १३औँ थारू होमस्टे महोत्सव २०८२ आयोजना हुइना बा ।
थारू होमस्टे गाउँ भादा पर्यटन विकास तथा व्यवस्थापन समितिसे पुस ९ गते पत्रकार सम्मेलन आयोजना करटी महोत्सवके विस्तृत कार्यतालिका सार्वजनिक करल हो ।
’संरक्षण सम्वद्र्धन के लाग सक्कुजन करी काम, संस्कृति भेष भूषा राखी हमार पहिचान’ कना मूल नाराके साथ यी वर्षके महोत्सव अइना पुस १७ गतेसे २१ गतेसम (सन् २०२६ जनवरी १ से ५ सम) सञ्चालन हुइना थारू होमस्टे गाउँ भादा पर्यटन विकास तथा व्यवस्थापन समितिके अध्यक्ष लक्ष्मी नारायण चौधरी जानकारी डेलै ।
महोत्सव धनगढी–१६ स्थित श्री दीपेन्द्र चारपाते माध्यमिक विद्यालयके खेलमैदानमे आयोजना कैना उहाँ जनैलै । महोत्सवहे व्यवस्थित रुपमे सभ्य ओ भव्य रूपमे सम्पन्न करेक लाग १ मूल आयोजक समिति, १ सल्लाहकार समिति ओ ९ ठो टमान उपसमिति गठन करल बा ।
महोत्सवके मुख्य उद्देश्य विशेष करके थारू समुदायके परम्परा, संस्कृति, खानपान, भेषभूषा ओ सीपकलाके संरक्षण तथा जगेर्ना कैना रहल उहाँ जनैलै ।
साथे स्थानीय स्तरमे स्वरोजगारके अवसर सिर्जना कैना ओ थारू जातिके पहिचानहे पर्यटन व्यवसायमार्फत राष्ट्रिय तथा अन्तर्राष्ट्रिय स्तरमे पुगैना लक्ष्य राखल बा ।
यी बरसके महोत्सवके प्रमुख आकर्षणमे महोत्सवमे अवलोकनकर्ताहुकनके लाग विविध सांस्कृतिक ओ मनोरञ्जनात्मक कार्यक्रम समावेश करल बा । सांस्कृतिक प्रस्तुतीमे प्रत्येक दिन स्थानीय तथा राष्ट्रिय कलाकारसे थारू नाँचगानके साथे डगौरा थारू, राना थारू, कठरिया थारू लगायत अन्य समुदायके सांस्कृतिक प्रस्तुति रना बा ।
खानपान ओ सीपमे दैनिक रूपमे थारू खानपानके परिकार ढिक्री, घोङ्गी, बरिया, फुलौरा, खेर्या, बंगुर ओ मुसके शिकार, गेंगटाके पकौरी, मच्छीक सिद्रा उपलब्ध हुइनाके साथे थारू सीपकला, भेषभूषा ओ प्रत्यक्ष हस्तकलाके प्रदर्शनी कैना बा ।
अवलोकन भ्रमणमे थारू देउथान, लहरूमे गाउँ ओ थारू संग्रहालयके अवलोकन भ्रमणके व्यवस्था मिलाइल बा ।
खेलकुद ओ मनोरञ्जनमे खुल्ला भलिबल प्रतियोगिता, रमाइलो मेला (काठे पिङ, शयर), फोटो प्रदर्शनी ओ कृषि प्रदर्शनी महोत्सवके थप आकर्षण हुइट ।
एक लाख दर्शकके अपेक्षा
थारू सामुदायिक होमस्टे गाउँ भादाके प्रचार–प्रसार कैना ओ टमान जातजाति तथा देश–विदेशके नागरिकबीच सामाजिक सद्भाव कायम कैना लक्ष्य लेहल यी महोत्सवमे करिब १ लाख जाने अवलोकनकर्ता सहभागी हुइना आयोजकके अपेक्षा बा ।
धनगढी उपमहानगरपालिकाके नगर प्रमुख गोपाल हमालसे महोत्सवके समुद्घाटन करैना निर्णय हुइल पत्रकार सम्मेलनमे अध्यक्ष लक्ष्मी नारायण चौधरी जानकारी डेलै । भादा गाउँके २० घरमे हाल होमस्टे सञ्चालनमे रहल बा । जेम्ने पाहुनाहुकनहे मौलिक थारू आतिथ्यता प्रदान कैजाइठ ।
कैलालीके भादा नेपालके उदाहरणीय थारु गाउँके रुपमे परिचित बा । भादासे अपन परम्परा, संस्कृति, भाषा ओ सभ्यताहे नम्मा समयसे जोगैटी रहल बा । लोप हुइटी गैल सखिया, छोक्रा, हुदङ्वा, झुम्रा, मघौटा, लठ्ठी, मुङग्रहुवा थारु नाँच हेरे सेक्जाइठ । थारु पहिरनमे सजके डेखैना यी नाँचके आकर्षण ओ महत्व अलग बा । थारु नाँच डेखैना सांस्कृतिक टोली बटै । पुराना पुस्तासे नयाँ पुस्तासे नाँच सिखे लागल बटै । २०६७ से होमस्टे सुरु हुइल भादामे माटीसे बनल घर बटै । यहाँ बास बैठे अइना पहुना पुरान रितिरिवाज, चलन, भेषभूषा ओ सरसामान डेखे पैठै ।
कैलालीके धनगढी उपमहानगरपालिका १६ स्थित थारु होमस्टे गाउँ भादा नेपालभरमे उत्कृष्ट होमस्टेके रुपमे छनोटमे परसेकल बा ।
