नमस्ते सहकारीके लौव संचालक कार्यसमितिके कार्यभार ग्रहण

पहुरा समाचारदाता
धनगढी, ११ पुस । नमस्ते बचत ऋण सहकारी संस्था लिमिटेड धनगढी कैलालीके नवनिर्वाचित लौव कार्यसमितिहे विफेक रोज कार्यभार हस्तान्तरण तथा शुभकामना कार्यक्रम सम्पन्न हुइल बा ।

कार्यभार हस्तान्तरण कार्यक्रम संस्थाके निवर्तमान अध्यक्ष जगतराम चौधरीके अध्यक्षतामे हुइल रहे । निर्वाचन समितिके संयोजक नाथुराम महतों निर्वाचन कार्यक्रमबारे जानकारी डेटी सर्वसहमतसे निर्वाचित हुइल सक्कु जनहनहे हार्दिक बधाई तथा कार्यकालके शुभकामना व्यक्त करल रहिट ।

संस्थाके प्रवन्धक विजय चौधरी निवर्तमान अध्यक्ष जगतराम चौधरीके दुई कार्यकालमे मजा प्रगती हुइल कहटी सक्कु जानेक योगदान सह्रनिय रहल बटैलै ।

वर्तमान सचिव नन्दलाल चौधरी साधारणसभासे पारित करल निर्णय सुनाइल रहिट । कलेसे कार्यक्रममे निवर्तमान अध्यक्ष जगतराम चौधरीसे नवनिर्वाचित अध्यक्ष रोहित चौधरीहे सञ्चालक समितिके मुख्य माइनट हस्तान्तरण करटी कार्यभर हस्तान्तरण करल रहिट । यिहे विच नवनिर्वाचित सक्कु जनहनके खादा ओ प्रमाणपत्र हस्तन्तरण कैगिल बा । कार्यभार हस्तान्तरण कार्यक्रमके संचालन निर्वाचन समितिके सदस्य राममणि चौधरी करल रहिट ।

ओस्टेक कार्यभार हस्तान्तरण कार्यक्रमपाछे लगटे हार्दिक बधाई तथा शुभकामना कार्यक्रम संस्थाके नवनिर्वाचित अध्यक्ष रोहित चौधरीके अध्यक्षतामे हुइल रहे । कार्यक्रममे उहाँ संस्थाहे आघेक बह्राइक लाग सक्कु शेयर सदस्य, कर्मचारी ओ संचालक समिति सक्कु साथ समन्वय आवश्यक रहल बटैलै ।

उहाँ संस्थाहे ठप उचाईमे पुगाइक लाग लौव रणनीतिके साथ आघे बह्रना बटैलै । कार्यक्रमके वरका पहुना संस्थाके निवर्तमान अध्यक्ष जगतराम चौधरी आपन दुई कार्यकार्यमे सहयोग करके सफल बनुइया सक्कुप्रति आभार व्यक्त करटी लौवा कार्यसमितिके सफलताके शुभकामना व्यक्त करलै । संस्थाके संस्थापक सदस्य तथा नेपाल सरकारके सहसचिव हिरालाल चौधरी अब्बेक कार्यसमितिहे चुनौती ओ अवसर रहल बटैलै । नमस्ते सहकारी थारु समुदायके पहिचानके रुपमे स्थापित हुइल बटैलै ।

पूर्व सांसद तथा संस्थाके सस्थापक सदस्य कँइया चौधरी सक्कु जानेक निरन्तर सहयोगसे संस्था यहाँसम पुगल बटैलै ।
नमस्ते बचत तया अण सहकारी संस्था लि धनगढी वि.स. २०६५ साल अगहन २७ गतेसे स्थापना हुके १८औं वर्षमे प्रवेश करल बा ।

संस्थाके पूँजी संरचनामे अधिकृत शेयर पूँजी रु.१५ करोड ओ वि.सं. २०८१ असार मसान्तसम रु. ४ करोड ४५ लाख ५२ हजार २ सय रहल बा । वि.सं. २०८२ असार मसान्तसम चुक्ता शेयर पूँजी रु.४ करोड ९८ लाख ३७ हजार ९ सय पुगल बा । गैल असार मसान्तसम शेयर सदस्य संख्या ७ हजार १५ जाने पुगल बा ।

निक्षेप संकलनमे गत बर्षके तुलनामे ३९.०८ प्रतिशतसे बचतमे वृद्धि भई वि.सं. २०८२ साल अषाढ मसान्तसम संस्थाके कुल निक्षेप रकम रु. ३५ करोड ५३ लाख ४० हजार २ सय रहल बा ।

कर्जा प्रवाह तथा असुलमे संस्थाके २०८१ असार मसान्तसमके लगानीमे रहल कर्जा रकम रु ३७ करोड ५१ लाख ५४ हजार ७८ रुप्या १४ रहलमे २०८१÷२०८२ ममे २.४७ प्रतिशतसे वृद्धि हुके वि.सं. २०८२ असार मसान्तसम लगानीमे रहल कर्जा रु ३८ करोड २८ लाख ३४ हजार ५५९ रुप्या ३४ रहल बा ।

मुनाफा आर्जनमे यी संस्थाके आ.व. २०८१÷०८२ मे कर पाछेक खुद मुनाफा रु ८२ लाख ९ हजार ७७१ रुप्या ११ पैसा आर्जन कैना सफल हुइल बा ।