कैलारीमे महिलाहुकन मालापोते बनैना तालिम डेगिल
पहुरा समाचारदाता
धनगढी, ११ पुस । कैलाली जिल्ला स्थित कैलारी गाउँपालिकाके महिलाहुकनहे व्यवसायिक सीप सिखाके आत्मनिर्भर बनैना उद्देश्यसे एक महिने मालापोते बनैना तालिम डेहल बा ।
कैलारी गाउँपालिका ओ व्यवसायिक तथा सीप विकास तालिम केन्द्र धनगढीके संयूक्त आयोजनामे प्रत्येक वडासे दुई जाने करके २० जाने महिलाहुकनहे सीप विकास तालिम डेगिलक हो ।
कैलारी गाउँपालिकाके उपाध्यक्ष भगवतीकुमारी चौधरी प्रमुख आतिथ्यतामे हुइल कार्यक्रममे उहाँ सीप सबसे भारी सम्पति रहल बटैली । उहाँ कहली, हरेक व्यक्तिमे कुछ ना सीप हुइना जरुरी हो । हातेम सीप रही टे जहाँफे जाके काम करेसेक्ना हो । अब्बे मालापोतेके माग भारी रहल ओरसे यिहीहे व्यवसायिक रुपमे आघे बह्राई सेक्लेसे महिला आत्मनिर्भर बने सेक्ही ।
गाउँपालिका यिहीसे आघे महिलाहुकनके टमान मेरिक सीपमुलक तालिम प्रदान करसेकल कहटी महिलाहुक्रनमे इच्छा शक्ति हुइलेसे छोट लगानीसे व्यवसाय सुरु करेसेक्ना उहाँ बटैली ।
यहाँके महिलनसे सुरुवाट करल उद्यम व्यवसाय तथा उत्पादित बस्तु बजारीकरण कैना काम गाउँपालिकासे कैडेना उपाध्यक्ष बटैली । ओस्टेक करके उहाँ व्यवसायिक सीप तालिम लेहल महिलाहुकनहे व्यक्तिगत रुपमे व्यवसाय सुरुवाट करेनैसेक्लेसे सामुहित रुपमे संचालन कैना सुझाव डेली ।
कार्यक्रममे विशिष्ट अतिथि कैलारी गाउँपालिकाके सामाजिक विकास शाखा प्रमुख यगम कलेल ओ सीप विकास तालिम केन्द्र धनगढीके लक्ष्मी चन्द, पुष्पा जोशी रहल रहिट । एक महिने तालिमके प्रशिक्षक रूपा चौधरी रहल रहिट ।
