शिक्षामे लगाइल लगानीके प्रतिफल तुरुन्त नैडेखाइठः गाउँपालिका अध्यक्ष राजसमझ

पहुरा समाचारदाता
धनगढी, १३ पुस । कैलाली जिल्लाके कैलारी गाउँपालिका वडा नम्बर १ मे रहल दिपेन्द्र माविके ४९औं वार्षिकोसत्सव कार्यक्रम अँटवारके रोज भव्यताके साथ सम्पन्न हुइल बा ।

कैलारी गाउँपालिका अध्यक्ष राजसमझ चौधरीके प्रमुख आतिथ्यतामे हुइल कार्यक्रममे शिक्षामे सुधार ल्यन्ना हर प्रयास कैना ओ ओकर व्यवस्थापनके लाग जिम्मा गाउँपालिकासे लेना बटैलै । उहाँ कहलै, ‘गाउँपालिकासे शिक्षा क्षेत्रमे सुधार ल्यानेक लाग लगानी बह्राइल मने सोचलहस प्रतिफल नैडेखल ओरसे यम्ने सक्कु जाने लागे पर्ना आवश्यक बा ।’

भौतिक पूर्वाधारमे लगानी करलेसे तुरुन्त डेखाइठ, गाउँपालिका अध्यक्ष कहलै, ‘शिक्षामे लगानी करलेसे ओकर प्रतिफल मजा आइक लाग दशौ बरस लागठ । बालबालिकाके भविष्य बनैना हो कलेसे अभिभावकहुक्रे आपन लर्कनमे छोटेम लगानी करी । ओइनमे जग बल्गर बनाइक लाग लर्कनमे ध्यान दि । अब्बे लगानी करली करलेसे ओकर प्रतिफल तुरुन्त डेखा नैपरठ ।’
गाउँपालिकामे बहुमुखी क्याम्पस स्थापना हुई नैसेक्ना दुखद बाट रहल कहटी गाउँपालिकासे मावि समके इजाजात डेहे सेक्ना यकर सम्बन्धन संघीय सरकारसे डेना हो । यहाँ बहुमुखी क्याम्पस स्थापनाके लाग अलगे समिति बा । पालिकासे समन्वयमे कौनो कसर बाँकी नैराखल हो, उहाँ कहलै ।

कार्यक्रमके विशिष्ट अतिथि गाउँपालिका उपाध्यक्ष भगवतीकुमारी चौधरी शिक्षामे सुधार ल्यानेक शिक्षकहुकनके एकल प्रयास नैहुइना बटैली । उहाँ कहली, विद्यार्थीनहे विद्यालय पठैली कहटीकी नैहुइना ओरसे लर्कनके पह्राईप्रति अभिभावक जागरुक हुइना जरुरी रहल बा ।

सामुदायिक विद्यालयमे विद्यार्थीनहे मजा शिक्षा डेलेसे मजा ठाउँमे पुग्ना ओ अवसरफे रहल उहाँ बटैली ।
वडा नम्बर ३ के वडा अध्यक्ष सन्तराम चौधरी यी विद्यालयके शिक्षामे सुधार हुइटी गैल बटैलै । गाउँपालिकाके शिक्षा शाखा प्रमुख गणेश प्रसाद मिश्र सामुदायिक विद्यालयमे विद्यार्थी सख्या घटटी गैल ओरसे शिक्षकहुकनहे समस्या रहल बटैलै । उहाँ कहलै, सामुदायिक विद्यालयमे टरे ओ उप्परके कक्षामे विद्यार्थी संख्या एकदम कम बटै । विचमे केल्ह विद्यार्थी संख्या ढेर डेखाइठ यकर कारण खोजे पर्ना जरुरी बा ।

विद्यालयके पूर्वअध्यक्ष तथा धनटीका युगान्त अक्षयकोष २०७२ के स्थापनाकर्ता होमबहादुर गुरुङ शिक्षा सुधारमे लाग शिक्षक, अभिभावक बराबर जिम्मेबार हुईपर्ना बटैलै ।

टेढी बाँध सिचाई आयोजनाके अध्यक्ष बसन्त चौधरी हरेक अभिभावकहुक्रे अभिभावकत्व निर्वाह करेसेक्ले केल्ह विद्यार्थीके भविष्य बन्ना बटैलै ।

विद्यालयहे जग्गादाता परिवारके गौरीशंकर महतों विगतके तुलनामे शिक्षा क्षेत्रमे प्रविधि फडको मारसेकल ओरसे उहे ढंगसे आघे बहे्र जरुरी रहल बटैलै ।

विद्यालयके प्रअ विनोद भट्टराई विद्यालयके प्रगती प्रतिवेदन तथा आयव्यय प्रस्तुत करल रहिट । कार्यक्रममे शिक्षक अभिभावक संघके अध्यक्ष विसराम चौधरी, विद्यार्थीे सुनिल विक, स्मिता चौधरीलगायत मन्तव्य राखल रहिट । विद्यालय व्यवस्थापन समितिके अध्यक्ष विर प्रसाद चौधरीके अध्यक्षतामे हुइल कार्यक्रममे स्वागत मन्तव्य प्लस टु संयोजक प्रिमराज पन्त करल रहिट ।

कार्यक्रमके संचालन शिक्षिका पशुपति कुवाँर करल रहिट । कार्यक्रम शिक्षक रामसिंह भुल ओ सन्तोष चौधरी सम्मानित हुइल रहिट । ओस्टेक गैल बरसके परिक्षामे उत्कृष्ट नतिजा ल्यन्ना सफल हुइल विद्यार्थीनहे सम्मान तथा पुरस्कृत कैगिल बा । कार्यक्रममे विद्यार्थीहुकनहे साँस्कृतिक नृत्यफे डेखागिल रहे ।