किशोरी सशक्तकीकरण परियोजनाके सरोकारवालाहुकनसंग सिकाई आदान प्रदान

पहुरा समाचारदाता
धनगढी, १३ पुस । कैलालीके कैलारी गाउँपालिकामे लागु हुइल किशोरी सशक्तीकरण परियोजनाके सिकाई आदान प्रदान कार्यक्रम सम्पन्न हुइल बा ।

सामुदायिक विकास केन्द्र (सिडिसी) डोटीके आयोजना तथा यूनिसेफके सहयोग ओ कैलारी गाउँपालिकाके समन्वयमे कैलारीमे ‘किशोरी सशक्तकीकरण परियोजना’ मार्फत टमान गतिविधि सञ्चालन करल बा ।

गाउँपालिकाके उपाध्यक्ष भगवतीकुमारी चौधरीके अध्यक्षतामे हुइल कार्यक्रममे उहाँ सस्थासे सिखाइल मजा सिकाईहे संस्थागत करेपर्ना बटैलै । अब्बे श्रमदान कैना ओ मेहनत करके खउइयाके संख्यामे कमी आइल बा । विगतके दिनमे डगरघाट निर्माण, बेठबेगारी अपनही कैना चलन रहे । अब्बे छोट कामके लाग स्थानीय सरकारके मुख हेर्ना करल पाजाइठ । भौतिक विकासहे केल्ह विकास डेख्न करल हुइलेसेफे मानविय तथा सामाजिक विकास महत्वपूर्ण रहल गाउँपालिका उपाध्यक्ष बटैली ।

कार्यक्रममे परियोजनासे करल गतिविधिबारे जानकारी डेटी सामुदायिक विकास केन्द्र (सिडिसी) डोटीके कार्यक्रम संयोजक तिलक चौधरी परियोजना अन्र्तगत रुपान्तरण कक्षामे सहभागी हुइल बाल संरक्षणके क्षेत्रमे जोखिममे रह पाँच जाने परिवारहे २० हजारके दरले आयआर्जनमे लगानी करल, बालविवाह न्यूनिकरण कैना टमान तालिम संचालन करल बटैलै ।

अति सीमान्तकृतभिटर पर्ना सामाजिक सुरक्षाके दृष्टिले जोखिममे रहल १० जाने परिवारहे २५ हजारके दरले उद्यम संचालनके लाग सहयोग करल बटैलै । सामुदायिक विकास केन्द (सिडिसी) डोटीके कार्यक्रम अधिकृत करुणा चौधरी यूनिसेफके सहयोगमे उ परियोजना अन्र्तगत कैलारी गाउँपालिकाके टमान वडाके १५ जाने परिवारहे छोट उद्यम संचालनके लाग आर्थिक सहयोग करल बटैलै ।

सिडिसीसे सहयोग पाइलपाछे अपनेहुक्रे छेगरी पालन सुरुवाट करल कैलारी–७ के हरिशंकर चौधरी बटैलै । सिकाई आदनप्रदान कार्यक्रममे यूनिसेफके बाल संरक्षण अधिकृत प्रकाश कैनी यी परियोजना अन्र्तगत बालबालिकाहुकनहे शैक्षिक सामाग्री सहयोग, टमान मेरिक क्षमता अभिवृद्धि तालिमफे संचालन करल बटैलै ।

कैलारी गाउँपालिकाके महिला बालबालिका तथा जेष्ठ नागरिक शाखाके प्रमुख बालकुमारी चौधरी यी परियोजनासे बाल संरक्षणके क्षेत्रमे महत्वपूर्ण भूमिका निर्वाह करल बटैली ।

कार्यक्रममे वडा अध्यक्ष, टमान शाखाके प्रमुख, सामाजिक परिचालक सकुन्तला चौधरीलगायत सरोकारवाला निकायके प्रतिनिधिहुकनके सहभागिता रहल रहे । कार्यक्रम संचालन गाउँपालिकाके सामाजिक विकास शाखाके प्रमुख यगम कलेल करल रहिट ।