मुक्त कमैयाके सही तथ्यांक ल्यानी पुनःस्थापना हम्रे करबः मन्त्री थापा
पहुरा समाचारदाता
धनगढी, १५ पुस । सुदूरपश्चिम प्रदेश सरकारके भुमि व्यवस्था कृषि तथा सहकारी मन्त्री विरबहादुर थापा मुक्तकमैयाहुकनके सही तथ्यांक ल्यन्लेसे पुनस्र्थापना प्रदेश सरकारसे कैना बटैले बटै ।
मुक्त कमैया महिला विकास मञ्च धनगढीसे कैलालीके गोदावरी नगरपालिका, गौरीगंगा नगरपालिका, कैलारी गाउँपालिका ओ शुक्लाफाँटा नगरपालिकामे डिसिएके सहयोगमे सन २०२२ से २०२५ सम हुइल सहकार्य परियोजना समापन कार्यक्रममे सम्बोधन करटी उहाँ उ बाट बत्वाइल रहिट ।
उहाँ कहलै, संघीय सरकारसे स्थानीय सरकारहे पुनस्र्थापनाके जिम्मा लगाके पन्छल बा । संघीय सरकार आब मुक्तकमैया पुर्नस्थापना करे नैसेकी । टबमारे पुनस्र्थापना बाँकी मुक्तकमैयाहुकनके स्थानीय सरकारसे सही तथ्यांक संकलन करके ल्यानी पुनस्र्थापना कैना जिम्मा प्रदेश सरकार करी ।
संघीय सरकार २०७६ सालमे प्ुनस्र्थापनाके काम स्थानीय सरकारहे हस्तान्तरण करल, मन्त्री थापा कहलै, उ सँगे पैसाफे डेहल । मने पैसा असार २३ गते डेहल असार २५ गते खाता बन्द हुइल जेकर कारण कुछ हुई नैसेकल । उ चाही संघीय सरकारके बदमासी हो । अपन जिम्मेवारी पुरा नैकरके छोरले बा ।
प्रदेश सरकार कार्यविधि बनाके पुनस्र्थापनाके काम सुरु करले बा । घरजग्गा रहल परिचयपत्र रहलहुकनके लाग प्रदेश सरकारसे आवास घर बनैना काम करटी रहल बा । यी बरसफे १०० ठो घर बनैना कहटी ३ करोड ६० लाख बजेटफे विनियोजन करे बटी मन्त्री थापा कहलै ।
सुदूरपश्चिम प्रदेशके ३४ ठो पालिका कार्यविधि बनैले बा । पुनस्र्थापनाके काम प्रदेश सरकार करी तथ्यांक लेना काम स्थानीय सरकारसे करडेहे परल । एक चो लाग छुटलहुकनके फेर तथ्यांक लेके भुमि आयोग मार्फत जग्गा डेहे सेक्ना वहाँ बटैलै ।
ओस्टेक करके वहाँ मुक्त कमैया महिला विकास मञ्चसे संञ्चालन करल परियोजना मजा काम करल कहटी लक्षित वर्ग लाभान्वित हुइलफे बटैलै । यहाँसे सक्कु संघसंस्था आपन उद्देश्य अनुसार काम करडेलेसे सीमान्तकृत समुदाय आघे बह्रेपैना अवसर पैना मन्त्री थापा बटैलै ।
शुक्लाफाँटा नगरपालिकाके नगरप्रमुख रणबहादुर महरा मञ्चसे संचालन करल गतिविधि प्रभावकारी रहल कहटी यकर आवश्यकता अभिनफे खटकल बटैलै । उहाँ कहलै, सहकार्य परियोजना शुक्लाफाँटाके सक्कु मुक्त कमैया बस्तीमे पुगे नैसेकल हो जहाँ पुगल उहाँ बहुट मजा हुइल बा । बाँकी बस्तीमे गतिविधि संचालन करेसेक्लेसे और मजा हुइना रहे ।
शुक्लाफाँटाके भागीराम चौधरी यी संस्थाके योगदानसे मुक्त कमैयाह्ँक्रे बहुट आघे बह्रना मौका पाइल बटैलै ।
उहाँ कहलै, यहाँके मुक्त कमैया टिना खेती करके आत्मनिभर हुइल बटै कलेसे आर्थिक स्रोतमे बृद्धि समेट हुइल बा ।
कार्यक्रममे मुक्त कमैया महिला विकास मञ्चके कार्यक्रम संयोजक इन्द्र चौधरी सहकार्य परियोजनासे सन २०२२ से २०२५ सम कैलालीके गोदावरी नगरपालिका, गौरीगंगा नगरपालिका, कैलारी गाउँपालिका ओ शुक्लाफाँटा नगरपालिकामे करल गतिविधि ओ उपलब्धीबारे प्रस्तुतीकरण करल रहिट । मञ्चके सहयोगसे महिलाहुक्रे आत्मनिर्भर हुइनाके साथे आर्थिक रुपमे सशक्त हुइल उहाँ बटैलै ।
मञ्चसे कैलारी गाउँपालिका वडा नम्बर २ कैलारी गाउँमे मुकेश चौधरीहे पावर टिलर मर्मत, ग्रिल निर्माण वर्क सपमे कम्प्रेसर मेसिन ओ ग्रीलमे फोङग पर्ना मेसिन सहयोग ओ तालिम डेहल रहे ।
ओस्टेक कैलारी गाउँपालिका वडा नम्बर ८ मे मसला उद्योग स्थापनाके लाग सहयोग करले रहे । वहाँ वेसार बनाइक लाग सुखुवइना प्लाष्टिक घर ओ मसला पिस्ना मेसिन सहयोग कैगिल बा । १० जानेक समुहसे मसला बनाके विक्री करल गैल बरस ५ कुन्टल बेसार विक्री करल कैना सफल हुइल बटै ।
कैलारी–८ लोहरपुरमे फुलझरियासे संचालन नास्ता पसल ओ कैलारी–२ उजलीसेमरामे नास्ता पसल संचालनसे दैनिक रुपमे हजारसे दुई हजारसम विक्री कैना करटी रहल बटै ।
ओस्टेक वडा नम्बर ५ सपना बस्तीमे संचालन हुइल डोनिया टेपरी उद्योग ओ वडा नम्बर ७ विपतपुरमे बंगुर पालनके सहयोग कैगिल बा ।
विपतपुरमे दाना बनैना मिल सहयोग हुइलपाछे उ बस्तीमे ढेर मुक्तकमैया बगुंर पालन सुरुवाट करले बटै । ओस्टेक मञ्च एफसिए नेपालके आर्थिक सहयोग ओ मुक्तकमैया महिला विकास मञ्चसे कार्यान्वयन करल सहकार्य परियोजनाके लागतमे विपतपुरमे बंगुर पालन, मुरगी पालन, जस्ता पाता, मासु पसल, सिलाई कटाई, मिल स्थापनाके लाग संस्थागत लगानी १६ लाख ४२ हजार १३९ रुप्या, व्यक्ति तथा समुदायके लगानी २ लाख १४ हजार २१५ करके जम्मा १८ लाख ५६ लाख ३५४ रुप्या सहयोग हुइल बा ।
ओस्टेक करके २०७९ सालमे बैशाख ११ विपतपुर बस्तीमे भीषण आगलागीसे हुइल क्षति हुइल बेलाफे ३३ लाख ४४ हजार ६०४ रुप्या सहयोग कैगिल रहे ।
कार्यक्रममे परियोजना सफल बनैना योगदान पुगाइल कहटी कैलालीके गोदावरी नगरपालिका, गौरीगंगा नगरपालिका, कैलारी गाउँपालिका ओ शुक्लाफाँटा नगरपालिकाहे सम्मान कैगिल बा । कलेसे मञ्चके कर्मचारीहुकनहेफे सम्मान कैगिल बा । मञ्चके अध्यक्ष सीमा चौधरीके अध्यक्षतामे हुृइल कार्यक्रममे उद्देश्यबारे मञ्चके संस्थापक अध्यक्ष कौशिला चौधरी जानकारी डेहल रहिट ।
कार्यक्रममे कैलारी गाउँपालिकाके अध्यक्ष राजसमझ चौधरी, गौरीगंगा नगरपालिकाके नगरप्रमुख देवीदत्त कँडेल, गोदावरी नगरपालिकाके प्रमुख प्रशासकीय अधिकृत धर्मराज विनाडी, मञ्चके टमान परियोजनाके परियोजना अधिकृत लगायत टमान सरोकारवाला निकायके सहभागिता रहे । कार्यक्रमके संचालन परियोजना अधिकृत पदमराज जोशी करल रहिट ।
